圣经文本

 

Ezechiel第29章

学习

   

1 In anno decimo, decimo mense, undecima die mensis, factum est verbum Domini ad me, dicens :

2 Fili hominis, pone faciem tuam contra Pharaonem regem Ægypti, et prophetabis de eo, et de Ægypto universa.

3 Loquere, et dices : Hæc dicit Dominus Deus : Ecce ego ad te, Pharao rex Ægypti, draco magne, qui cubas in medio fluminum tuorum, et dicis : Meus est fluvius, et ego feci memetipsum.

4 Et ponam frenum in maxillis tuis, et agglutinabo pisces fluminum tuorum squamis tuis, et extraham te de medio fluminum tuorum, et universi pisces tui squamis tuis adhærebunt.

5 Et projiciam te in desertum, et omnes pisces fluminis tui : super faciem terræ cades ; non colligeris, neque congregaberis : bestiis terræ et volatilibus cæli dedi te ad devorandum.

6 Et scient omnes habitatores Ægypti quia ego Dominus, pro eo quod fuisti baculus arundineus domui Israël :

7 quando apprehenderunt te manu, et confractus es, et lacerasti omnem humerum eorum : et innitentibus eis super te comminutus es, et dissolvisti omnes renes eorum.

8 Proptera hæc dicit Dominus Deus : Ecce ego adducam super te gladium, et interficiam de te hominem et jumentum.

9 Et erit terra Ægypti in desertum et in solitudinem : et scient quia ego Dominus, pro eo quod dixeris : Fluvius meus est, et ego feci eum.

10 Idcirco ecce ego ad te, et ad flumina tua : daboque terram Ægypti in solitudines, gladio dissipatam, a turre Syenes usque ad terminos Æthiopiæ.

11 Non pertransibit eam pes hominis, neque pes jumenti gradietur in ea, et non habitabitur quadraginta annis.

12 Daboque terram Ægypti desertam in medio terrarum desertarum, et civitates ejus in medio urbium subversarum, et erunt desolatæ quadraginta annis : et dispergam Ægyptios in nationes, et ventilabo eos in terras.

13 Quia hæc dicit Dominus Deus : Post finem quadraginta annorum congregabo Ægyptum de populis in quibus dispersi fuerant.

14 Et reducam captivitatem Ægypti, et collocabo eos in terra Phathures, in terra nativitatis suæ, et erunt ibi in regnum humile.

15 Inter cetera regna erit humillima, et non elevabitur ultra super nationes, et imminuam eos ne imperent gentibus.

16 Neque erunt ultra domui Israël in confidentia, docentes iniquitatem ut fugiant, et sequantur eos : et scient quia ego Dominus Deus.

17 Et factum est in vigesimo et septimo anno, in primo, in una mensis : factum est verbum Domini ad me, dicens :

18 Fili hominis, Nabuchodonosor rex Babylonis servire fecit exercitum suum servitute magna adversum Tyrum : omne caput decalvatum, et omnis humerus depilatus est : et merces non est reddita ei, neque exercitui ejus, de Tyro, pro servitute qua servivit mihi adversus eam.

19 Propterea hæc dicit Dominus Deus : Ecce ego dabo Nabuchodonosor regem Babylonis in terra Ægypti : et accipiet multitudinem ejus, et deprædabitur manubias ejus, et diripiet spolia ejus : et erit merces exercitui illius,

20 et operi quo servivit adversus eam : dedi ei terram Ægypti pro eo quod laboraverit mihi, ait Dominus Deus.

21 In die illo pullulabit cornu domui Israël, et tibi dabo apertum os in medio eorum, et scient quia ego Dominus.

   

来自斯威登堡的著作

 

Apocalypsis Revelata#705

学习本章节

  
/962  
  

705. (Vers. 15.) "Ecce venio sicut fur; beatus qui vigilat et servat vestimenta sua" significat Adventum Domini, et tunc Caelum illis qui spectant ad Ipsum, et permanent in vita secundum praecepta Ipsius, quae sunt vera Verbi. - Quod "venire sicut fur," cum de Domino, significet Adventum Ipsius, et tunc Caelum illis qui bene vixerunt, ac Infernum illis qui male vixerunt, videatur supra (164); quod "beatus" dicatur qui vitam aeternam accipit (639); quod "vigilare" significet spiritualiter vivere, hoc est, in veris esse et in vita secundum illa, et spectare ad Dominum (158); et quod "servare vestimenta sua" significet permanere in illis usque ad finem vitae, "vestimenta" enim significant vera investientia (166, 212, 328), ita praecepta Domini in Verbo, quia haec sunt vera. Haec nunc sequuntur in ordine ex illis quae praecedunt; nam praecedit de Adventu Domini, et de Nova Ecclesia; tum de impugnatione ejus ab illis qui e veteri Ecclesia sunt; et quia pugna instat, admonentur qui in veris sunt ex Verbo ut in illis permaneant, ne in praelio (de quo in versu sequente) succumbant.

  
/962  
  

来自斯威登堡的著作

 

Apocalypsis Revelata#639

学习本章节

  
/962  
  

639. (Vers. 13.) "Et audivi vocem e Caelo dicentem mihi, Scribe, Beati mortui in Domino morientes a nunc," significat praedictionem a Domino de statu illorum post mortem qui e Nova Ecclesia Ipsius erunt, quae est, quod illis qui tentationes patiuntur propter fidem in Dominum et vitam secundum praecepta Ipsius, vita et felicitas aeterna sit.--Per "audire vocem e Caelo dicentem" significatur praedictio a Domino; quod sit de statu illorum post mortem qui e Nova Ecclesia Ipsius erunt, est quia de illo statu in hoc versu agitur; per "morientes a nunc" significatur status eorum post mortem; "scribe," significat ut sit in recordationem posteritati (39, 63); per "beatos" significantur illi quibus vita et felicitas aeterna est, quoniam hi beati sunt; per "mortuos" significantur qui afflixerunt animam suam, crucifixerunt carnem suam, et tentationes passi sunt; quod hi intelligantur hic per "mortuos" videbitur infra; quod illis vita et felicitas aeterna sit, qui tentationes passi sunt propter fidem in Dominum et propter vitam secundum praecepta Ipsius, patet a mox antecedentibus, ubi dicitur, "Hic 1 patientia sanctorum, hic custodientes mandata Dei et fidem Jesu," per quae significatur quod homo Novae Ecclesiae per tentationes exploretur qualis est quoad vitam secundum praecepta, et quoad fidem in Dominum (videatur mox supra 638); et ex sequentibus, et "requiescent ex laboribus suis," per quae significatur quod pacem habituri sint in Domino, qui tentati sunt (de quibus mox infra 640); 2 per "tentationes" hic intelliguntur tentationes spirituales, quae existunt apud illos qui fidem in Dominum habent et vivunt secundum praecepta Ipsius, dum malos spiritus apud se, qui unum agunt cum concupiscentiis eorum, abigunt. Tentationes illae significantur per "crucem" in his locis:

"Quisquis non suscipit crucem suam, et sequitur post Me, non est Me dignus," (Matthaeus 10:38);

"Jesus dixit, Si quis vult post Me venire, abneget se ipsum, tollat crucem suam, et sequatur Me," (Matthaeus 16:24; Luca 9:23-25; 14:26-27);

tum per "crucifixionem carnis" apud Paulum:

"Qui Christi sunt, carnem crucifigunt cum passionibus et concupiscentiis," (5:24).

Quod per "mortuos" significentur qui afflixerunt animam suam, crucifixerunt carnem suam, et tentationes passi sunt, est quia per illa mortificaverunt vitam priorem, et inde sicut mortui facti sunt coram mundo; nam dixit Dominus,

"Nisi granum tritici in terram cadens Moriatur, id solum manet; si vero Moriatur, multum fructum fert," (Johannes 12:24).

Nec alii per "mortuos" intelliguntur apud Johannem:

Jesus dixit, "Sicut Pater suscitat Mortuos et vivificat, ita Filius quos vult vivificat," (5:21);

Apud eundem, Jesus dixit quod "Veniet hora, quando Mortui audient vocem Filii Dei, et vivent," (5:25);

et quoque per Resurrectionem Mortuorum, (Luca 14:14; 3 Apocalypsis 20:5, 12-13; 4 et alibi), (106);

et apud Davidem:

"Pretiosa in oculis Jehovae Mors Sanctorum Ipsius," (Psalm. 116:15).

Jesus etiam dixit,

"Quisquis perdiderit animam suam propter Me, inveniet eam," (Matthaeus 10:39; 16:25; Luca 9:24-25; 17:33; Johannes 12:25).

脚注:

1. Hic pro "Haec"

2. 640 pro "641"

3. xiv. pro "iv."

4. xx. pro "xix."

  
/962