704. "Facientes Signa ad abeundum ad Reges terrae et totius orbis ad congregandum illos in bellum diei illius magni Dei Omnipotentis" significat contestationes quod falsa eorum sint vera, et excitationes omnium in tota illa Ecclesia, qui in iisdem falsis sunt, ad impugnandum vera Novae Ecclesiae. - Quod "facere signa" sit testificari et quoque contestari quod verum sit, videatur supra (598, 599), hic quod falsa eorum sint vera; per "reges terrae et totius orbis" significantur qui principaliter in falsis ex malo sunt, hic omnes qui in iisdem falsis sunt in tota Ecclesia; per "reges" enim significantur qui in veris ex bono sunt, et in opposito sensu qui in falsis ex malo (483); per "terram" significatur Ecclesia (285) similiter per "orbem (551); per "abire ad congregandum illos in bellum" significatur excitare illos ad pugnam, seu ad impugnandum; per "bellum" enim significatur bellum spirituale, quod est falsi contra verum et veri contra falsum (500, 586); quod sit ad impugnandum vera Novae Ecclesiae, est quia dicitur "diei magni Dei Omnipotentis," et per diem illum significatur Adventus Domini, et tunc Nova Ecclesia; quod hoc per "diem magnum" ibi significetur, infra videbitur. Dicitur quod "spiritus daemonum" id facturi sint, quia per illos significantur cupiditates falsificandi vera, et ratiocinandi ex falsis, de quo mox supra (703). Ex his patet, quod per "spiritus daemonum facientes signa ad abeundum ad reges terrae et totius orbis ad congregandum illos in bellum diei illius magni Dei Omnipotentis," significentur contestationes ab illis qui intelliguntur per "Draconem," "Bestiam" et Pseudoprophetam," de quibus supra (701, 702), quod falsa eorum sint vera, et excitationes omnium in tota Ecclesia qui in iisdem falsis sunt, ad impugnandum vera Novae Ecclesiae. Quod per "diem magnum Dei Omnipotentis" significatur Adventus Domini, et tunc Nova Ecclesia, constat ex multis locis in Verbo, ut ex his:

"In Die illo exaltabitur Jehovah Solus," (Esaias 2:11);

"In Die illo Israel innitetur Jehovae, Sancto Israelis, in Veritate," (Esaias 10:20);

"In Die illo Radicem Jischaji gentes quaerent, et erit quies Ipsi gloria," (Esaias 11:10-11);

"In Die illo respicient oculi ad Sanctum Israelis," (Esaias 17:7, 9);

"In Die illo dicent, Ecce Deus noster Hic, Quem exspectavimus ut liberet nos," (Esaias 25:9);

"Cognoscet populus Meus Nomen Meum, et in Die illo, Ego Ille Qui loquens: ecce Me," (Esaias 52:6);

"Heu Magnus Dies Jehovae, et non erit sicut ille," (Jeremias 30:7; ¹

"Ecce Dies venientes, quibus pangam Foedus novum, et quibus aedificabitur Civitas Jehovae," (Jeremias 31:27, 31, 38);

"In Diebus illis germinare faciam Davidi Germen justum," (Jeremias 33:15); ²

"Non stabunt in bello Diei Jehovae," (Ezechiel 13:5);

"In Die illo surget Michael princeps magnus, qui stat pro filiis populi tui. ³ In Die illo eripietur omnis qui invenietur scriptus in Libro," (Daniel 12:(1));

"In Die illo vocabis, Marite mi. In Die illo feriam illis foedus. In Die illo exaudiam," (Hoschea 2:16, 18, 21);

"Ecce Ego mitto Eliam antequam venit Dies Jehovae magnus," (Malachias 3:23 (B.A. 4:5));

"In Dic illo servabit Jehovah sicut gregem populum Suum," (Sacharias 9:16);

"In Die illo proteget Jehovah habitatores Hierosolymae," (Sacharias 12:8); ⁴

"Ecce Dies Jehovae venit. Dies unus qui notus erit Jehovae. In Die illo erit Jehovah unus, et Nomen Ipsius unum. In Die illo erit tumultuatio magna. In Die illo erit super tintinnabulis equorum, Sanctitas Jehovae," (Sacharias 14:1, 4, 6-7, 8, (9,) 13, 20-21).

Praeter haec loca sunt plura alia in quibus per "Diem illum" ⁵ intelligitur Adventus Domini, et tunc Nova Ecclesia ab Ipso (Ut in his: Esaias 4:2; 19:16, 18, 21, 24; 20:6; ⁶ 22:20; 25:9; ⁷ 28:5; 29:18; 30:25-26; 31:7; Jeremias 3:16-18; 23:5-7, 12, 20; 50:4, 20, 27; Ezechiel 24:26-27; 29:21; 34:11-12; 36:33; Hoschea 3:5; 6:1-2; Joel 3:2 (B.A. 2:29); 4:1, 14, 18 (B.A. 3:1, 14, 18); Obadias 1:15; Amos 9:11, 13; Micham 4:6; Habakuk 3:2, (16); Zephanias 3:11, 16, 19-20; Sacharias 2:15 (B.A. 11); Psalm. 72:7-8);

ac dies ille vocatur "Dies Jehovae"

(Joel 1:15; 2:1-2, 11; Amos 5:13, 18, 20; Zephanias 1:7, 14; 2:2-3; Sacharias 14:1; et alibi).

Quoniam Consummatio saeculi, hoc est, finis Ecclesiae veteris, est quando Adventus Domini et principium Ecclesiae Novae, ideo per "Diem Jehovae" permultis in locis etiam significatur finis prioris Ecclesiae; et dicitur quod tunc rumores, tumultus et bella; quae loca videantur collata in Doctrina Novae Hierosolymae de Domino (4, 5).

脚注:

500. "Bestia ascendens ex abysso faciet bellum cum illis, et vincet illos, et occidet illos," significat quod illi qui in internis doctrinae de sola fide sunt, se opposituri sint, et illa duo Essentialia Novae Ecclesiae impugnaturi, et apud se, et quantum valent apud alios, rejecturi. - Per "Bestiam ascendentem ex abysso" intelliguntur qui ex abysso ascenderunt, et visi sunt sicut Locustae, (9:1-12). Qui quod fuerunt qui in internis doctrinae de sola fide sunt, videatur in Explicatione ibi per "bellum facere" significatur se opponere, et illa duo Essentialia Ecclesiae impugnare, de quo sequitur per "vincere illos et occidere" significatur illa apud se, et quantum valent apud alios, rejicere et exstirpare.

Causa quod illi qui in internis doctrinae de sola fide sunt, duo illa Essentialia impugnaturi et rejecturi sint, est quia apud se confirmaverunt duo illis adversantia, Primum, quod non Dominus, sed quod Deus Pater adeundus sit; et Alterum, quod vita secundum praecepta Decalogi non sit vita spiritualis, sed solum vita moralis et civilis, et hoc confirmant, ne aliquis credat quod salvetur per opera, sed per solam illorum fidem.

Omnes illi qui haec dogmata alte impresserunt mentibus suis in scholis et gymnasiis, postea non recedunt ab illis. Causae sunt tres, hactenus ignotae: - Prima; quod se in societatem cum similibus in mundo spirituali quoad spiritum suum immiserint, ubi plerique sunt satanae, qui unice falsis delectantur, a quibus nullatenus possunt exsolvi, nisi rejiciant falsa illa; quod nec fieri potest nisi immediate adeant Deum Salvatorem, et inchoent vitam Christianam secundum praecepta Decalogi. Secunda causa est, quod credant dari remissionem peccatorum et sic salvationem momento in Actu Fidei, et postea in Statu seu in Progressione per eundem Actum a Spiritu Sancto continuatum, conservatum et retentum separatim a charitatis exercitiis; ac qui semel illa imbuerunt, illi postea nihili faciunt peccata coram Deo, et sic in suis immundis vivunt: et quia talia sciunt argute confirmare per falsificationes Verbi apud ineruditos, et per sophistica apud eruditos, dicitur hic quod "Bestia ex abysso binos illos testes vicerit et occiderit;" sed hoc non fit apud alios, quam apud illos qui amant vivere genio, et feruntur a jucundis concupiscentiarum suarum; hi cum cogitant de salute, corde illis favent, et ambabus manibus amplectuntur fidem illorum, quia sic possunt per aliquas voces cum sono fiduciae enuntiatas salvari, et non opus habere ut attendant ad aliquod vitae suae propter Deum, sed modo propter mundum. Tertia causa est, quod qui fidei istius interna, quae vocantur arcana justificationis, in adolescentia hauserant, postea Ministerio honorato admoti, apud se non cogitent de Deo et Caelo, sed de se et mundo, solum retinendo arcana suae fidei propter famam ut sicut sapientes honorentur, et propter sapientiam digni aestimentur remunerari opibus. Quod hoc sit effectus illius fidei, est quia nihil religionis in illa est; quod ita sit, videatur Tertium Memorabile supra (484). Quod per "bella" in Verbo significentur bella spiritualia, quae sunt impugnationes veri, et fiunt per ratiocinia ex falsis, constat ex his locis:

"Spiritus daemonum exeunt ad congregandum illos in Bellum in die magno Dei Omnipotentis," (Apocalypsis 16:14);

Iratus Draco contra Mulierem, et abivit ut faceret Bellum cum reliquis seminis ejus qui tenebant mandata Dei, et habebant testimonium Jesu Christi," (Apocalypsis 12:17);

Datum est Bestiae Draconis "facere Bellum cum sanctis," (Apocalypsis 13:7);

"Sacrate contra filiam Sionis Bellum, et ascendamus in meridie," (Jeremias 6:4); ¹

"Non ascendistis in rupturas ad standum in Bello in die Jehovae," (Ezechiel 13:5);

"In Schalem habitaculum Dei, et habitatio in Sione, ubi fregit jacula ignita arcus, et Bellum," (Psalm. 76:3(, 4) (B.A. 2-3));

"Jehovah sicut Heros exibit, sicut Vir Bellorum suscitabit zelum," (Esaias 42:13; Psalm. 24:8);

"In die illo erit Jehovah in spiritum judicii, sedenti super judicio, qui repellunt Bellum a porta," (28:(5,) 6);

"Libera me ab homine malo, et a viro violentiarum serva me; toto die congregant ad Bella, exacuunt linguam suam sicut serpentes," (Psalm. 111:2-4 (B.A. 1-3));

"Multi venient in Nomine Meo, dicentes Ego sum Christus, et multos seducent: et audituri estis Bella et rumores Bellorum, videte ne turbemini," (Matthaeus 24:5-6; ² Marcus 13:6-7; ³ Luca 21:8-9). ⁴

Bella regum septentrionis et meridiei, et reliqua apud Danielem 10; 11; 12; non alia bella quam spiritualia significant; praeter "bella" aliis in locis (Ut Esaias 2:3-5; 13:4; 21:14-15; 31:4; Jeremias 49:25-26; Hoschea 2:18; Sacharias 10:5; 14:3; Psalm. 27:3; ⁵ Psalm. 46:9-10 (B.A. 8-9)).

Quoniam per "bella" in Verbo significantur bella spiritualia, ideo ministerium levitarum vocabatur "militia," ut patet ex his:

Mandatum est ut numerarentur Levitae, ad exercendum Militiam, ad faciendum opus in Tentorio conventus, (Numeri 4:23, 35, 39, 43, 47);

"Hoc Levitarum officium ad Militandum Militiam in ministerio Tentorii conventus; sed a filio quinquaginta annorum recedet a Militia ministerii, nec ministrabit amplius," (Numeri 8:24-25);

videatur etiam supra (447), ubi confirmatur ex Verbo, quod "exercitus" significent bona et vera Ecclesiae, et in opposito sensu mala et falsa ejus.

脚注: