新基督教圣经研究

圣经文本

 

Exodus第19章

学习

   

1 Mense tertio egressionis Israël de terra Ægypti, in die hac venerunt in solitudinem Sinai.

2 Nam profecti de Raphidim, et pervenientes usque in desertum Sinai, castrametati sunt in eodem loco, ibique Israël fixit tentoria e regione montis.

3 Moyses autem ascendit ad Deum : vocavitque eum Dominus de monte, et ait : Hæc dices domui Jacob, et annuntiabis filiis Israël :

4 Vos ipsi vidistis quæ fecerim Ægyptiis, quomodo portaverim vos super alas aquilarum, et assumpserim mihi.

5 Si ergo audieritis vocem meam, et custodieritis pactum meum, eritis mihi in peculium de cunctis populis : mea est enim omnis terra :

6 et vos eritis mihi in regnum sacerdotale, et gens sancta. Hæc sunt verba quæ loqueris ad filios Israël.

7 Venit Moyses : et convocatis majoribus natu populi, exposuit omnes sermones quos mandaverat Dominus.

8 Responditque omnis populus simul : Cuncta quæ locutus est Dominus, faciemus. Cumque retulisset Moyses verba populi ad Dominum,

9 ait ei Dominus : Jam nunc veniam ad te in caligine nubis, ut audiat me populus loquentem ad te, et credat tibi in perpetuum. Nuntiavit ergo Moyses verba populi ad Dominum.

10 Qui dixit ei : Vade ad populum, et sanctifica illos hodie, et cras, laventque vestimenta sua.

11 Et sint parati in diem tertium : in die enim tertia descendet Dominus coram omni plebe super montem Sinai.

12 Constituesque terminos populo per circuitum, et dices ad eos : Cavete ne ascendatis in montem, nec tangatis fines illius : omnis qui tetigerit montem, morte morietur.

13 Manus non tanget eum, sed lapidibus opprimetur, aut confodietur jaculis : sive jumentum fuerit, sive homo, non vivet : cum cœperit clangere buccina, tunc ascendant in montem.

14 Descenditque Moyses de monte ad populum, et sanctificavit eum. Cumque lavissent vestimenta sua,

15 ait ad eos : Estote parati in diem tertium, et ne appropinquetis uxoribus vestris.

16 Jamque advenerat tertius dies, et mane inclaruerat : et ecce cœperunt audiri tonitrua, ac micare fulgura, et nubes densissima operire montem, clangorque buccinæ vehementius perstrepebat : et timuit populus qui erat in castris.

17 Cumque eduxisset eos Moyses in occursum Dei de loco castrorum, steterunt ad radices montis.

18 Totus autem mons Sinai fumabat, eo quod descendisset Dominus super eum in igne : et ascenderet fumus ex eo quasi de fornace, eratque omnis mons terribilis.

19 Et sonitus buccinæ paulatim crescebat in majus, et prolixius tendebatur : Moyses loquebatur, et Deus respondebat ei.

20 Descenditque Dominus super montem Sinai in ipso montis vertice, et vocavit Moysen in cacumen ejus. Quo cum ascendisset,

21 dixit ad eum : Descende, et contestare populum : ne forte velit transcendere terminos ad videndum Dominum, et pereat ex eis plurima multitudo.

22 Sacerdotes quoque qui accedunt ad Dominum, sanctificentur, ne percutiat eos.

23 Dixitque Moyses ad Dominum : Non poterit vulgus ascendere in montem Sinai : tu enim testificatus es, et jussisti, dicens : Pone terminos circa montem, et sanctifica illum.

24 Cui ait Dominus : Vade, descende : ascendesque tu, et Aaron tecum : sacerdotes autem et populus ne transeant terminos, nec ascendant ad Dominum, ne forte interficiat illos.

25 Descenditque Moyses ad populum, et omnia narravit eis.

   

来自斯威登堡的著作

 

Arcana Coelestia#8773

学习本章节

  
/10837  
  

8773. ‘Et venit Moscheh, et vocavit seniores populi’: quod significet electionem illorum qui primario in intelligentia veri, constat ex significatione ‘vocare ad se’ quod sit electio, et ex significatione ‘seniorum populi’ quod sint qui primario in intelligentia veri sunt, et in sensu a persona abstracto, primaria vera, de qua n. 1 6524, 6525, 6890, 2 8578, 8585. Cum his ita se habet: qui in bono sunt nondum formato per vera, de quo bono in hoc capite agitur, illi a Domino primum formantur per primaria vera, hoc est, per vera communia, in quibus et a quibus reliqua; primaria vera sunt, quod Deus unus sit, quod Dominus natus sit homo ut salvaret genus humanum, quod caelum sit et quod infernum, quod in caelum veniant qui bene vixerant et in infernum qui male, tum quod amor in Deum et amor erga proximum 3 sint praecepta a quibus pendent reliqua, et quod amor ille dari nequeat nisi per fidem; haec et similia sunt primaria vera quae a Domino primum insinuantur bono apud hominem qui regeneratur; haec vera, cum insinuata sunt et facta boni, tunc 4 reliqua insinuantur, et in communibus illis seu primariis, ac sub illis ordinantur secundum formam caelestem, et sic per gradus faciunt ut in homine illo sit vita caeli, et 5 is quasi caelum in parva imagine, hoc est, ut omnia quae sunt intellectus et quae sunt voluntatis apud illum in consociatione sint cum bonis et veris apud angelos, ita cum angelis.

脚注:

1. The editors of the third Latin edition made a minor correction here. For details, see the end of the appropriate volume of that edition.

2. The editors of the third Latin edition made a minor correction here. For details, see the end of the appropriate volume of that edition.

3. The following two (or in some cases more) words are transposed in the Manuscript.

4. The editors of the third Latin edition made a minor correction here. For details, see the end of the appropriate volume of that edition.

5. quasi sit

  
/10837  
  

This is the Third Latin Edition, published by the Swedenborg Society, in London, between 1949 and 1973.

来自斯威登堡的著作

 

Arcana Coelestia#6524

学习本章节

  
/10837  
  

6524. ‘Seniores domus ejus’: quod significet quae concordarent cum bono, constat ex significatione ‘seniorum’ quod sint praecipua sapientiae, ita concordantia cum bono, de qua sequitur; et ex significatione ‘domus’ quod sit bonum, de qua n. 2559, 3652, 3720, 4982. Quod ‘seniores’ sint praecipua sapientiae, est quia ‘senes’ in Verbo significant sapientes, ac in sensu a persona abstracto sapientiam; quoniam ‘duodecim tribus Israelis’ significabant omnia vera et bona in complexu, super illos positi sunt principes et quoque seniores, et per ‘principes’ significabantur primaria vera quae sunt intelligentiae, et per ‘seniores’ praecipua sapientiae, ita quae sunt boni;

[2] quod ‘principes’ significent primaria vera quae sunt intelligentiae, videatur n. 1482, 2089, 5044; quod autem ‘seniores’ 1 significarent praecipua sapientiae, et ‘senes’ sapientiam, patet ab his locis:

apud Davidem,

Extollent Jehovam in congregatione populi, et in consessu senum laudabunt Ipsum, Ps. 107:32 2 ,

‘congregatio populi’ pro illis qui sunt in veris quae sunt intelligentiae, nam congregatio praedicatur de veris, n. 6355, 3 et quoque populus, n. 4 1259, 1260, 2928, 3295, 3581; ‘consessus senum’ pro illis qui sunt in bono quod est sapientiae; sapientia enim est vitae, ita boni, intelligentia autem est cognitionum, ita veri, n. 1555:

apud eundem,

Prae senibus sapiens sum, quia mandata tua custodivi, Ps. 119:100;

‘senes’ manifeste pro sapiente: pariter apud Hiobum, In senibus est sapientia, in longitudine dierum intelligentia, 12:12:

apud Mosen,

Coram canitie surges, et honorabis facies senis, Lev. 19:32;

hoc mandatum est, quia ‘senes’ repraesentabant sapientiam:

[3] apud Johannem, Super thronis vidi viginti quatuor seniores sedentes, indutos vestimentis albis, qui habebant super capitibus suis coronas aureas, Apoc. 4:4;

‘seniores’ pro illis quae sunt sapientiae, ita quae sunt boni; quod seniores sint illa, patet ex descriptione, quod nempe ‘sederint super thronis, induti fuerint vestimentis albis, et habuerint coronas aureas super capitibus’; ‘throni’ enim sunt Vera intelligentiae ex bono quod sapientiae, n. 5313, ‘vestimenta alba’ similiter; quod vestimenta sint Vera, n. 1073, 4545, 4763, 5248, 5954, et quod ‘album’ praedicetur de vero, n. 3301, 5319; ‘coronae aureae super capitibus’ sunt bona sapientiae, ‘aurum’ enim est bonum amoris, n. 113, 1551, 1552, 5658, et ‘caput’ est caeleste ubi sapientia, n. 4938, 4939, 5328, 6436; sapientes dicuntur qui in tertio seu intimo caelo, ita qui proximi Domino; intelligentes autem qui in medio seu secundo caelo, ita qui non ita prope sunt Domino:

[4] apud eundem,

Omnes angeli steterunt circa thronum, et seniores, et quatuor animalia, Apoc. 7:11;

‘seniores’ etiam pro illis quae sunt sapientiae: etiam in sequentibus his locis, apud Esaiam,

Efferet se puer contra 5 senem, et contemptus contra honoratum, 3:5:

apud eundem,

Regnabit Jehovah Zebaoth in monte Zionis, et in Hierosolyma, et coram senioribus ejus gloria, 24:23:

apud Jeremiam,

Sacerdotes mei et seniores mei in urbe exspirarunt, quia quaesiverunt cibum 6 sibi, quo recrearent animam suam, Thren. 1:19:

apud eundem,

Rex ejus et principes ejus inter gentes, non lex, ... sedent in terra, conticescunt seniores filiae Zionis, Thren. 2:9, 10:

apud eundem,

Mulieres in Zione compresserunt, virgines in urbibus Jehudae, principes manu eorum suspensi sunt, facies senum non honoratae, ... seniores a porta cessarunt, Thren. 5:11, 12, 14:

apud Ezechielem,

Miseria super miseriam veniet, et fama super famam erit, ideo quaerent visionem a propheta, sed lex periit a sacerdote, et consilium a senioribus; rex lugebit, et princeps induetur stupore, 7:26, 27:

apud Zachariam, Adhuc habitabunt senes mares et mulieres in plateis Hierosolymae, et vir cujus in manu scipio ejus prae multitudine dierum, 8:4 7 .

Ut ‘seniores’ repraesentarent illa quae sapientiae sunt, sumptum est de spiritu Mosis et datum illis, unde prophetarunt, Num. 11:16 seq. Seniores 8 in opposito sensu pro illis 9 quae contraria sapientiae sunt, Ezech. 8:11, 12.

脚注:

1. significent

2. The editors of the third Latin edition made a minor correction here. For details, see the end of the appropriate volume of that edition.

3. tum

4. The editors of the third Latin edition made a minor correction here. For details, see the end of the appropriate volume of that edition.

5. The editors of the third Latin edition made a minor correction here. For details, see the end of the appropriate volume of that edition.

6. The editors of the third Latin edition made a minor correction here. For details, see the end of the appropriate volume of that edition.

7. The editors of the third Latin edition made a minor correction here. For details, see the end of the appropriate volume of that edition.

8. The Manuscript inserts etiam.

9. qui in contrariis

  
/10837  
  

This is the Third Latin Edition, published by the Swedenborg Society, in London, between 1949 and 1973.

©2024 New Christian Bible Study Corporation. All rights reserved. Printed from newchristianbiblestudy.org