¹ כי יגנב איש שור או שה וטבחו או מכרו חמשה בקר ישלם תחת השור וארבע צאן תחת השה׃

² אם במחתרת ימצא הגנב והכה ומת אין לו דמים׃

³ אם זרחה השמש עליו דמים לו שלם ישלם אם אין לו ונמכר בגנבתו׃

⁴ אם המצא תמצא בידו הגנבה משור עד חמור עד שה חיים שנים ישלם׃

⁵ כי יבער איש שדה או כרם ושלח את בעירה ובער בשדה אחר מיטב שדהו ומיטב כרמו ישלם׃

⁶ כי תצא אש ומצאה קצים ונאכל גדיש או הקמה או השדה שלם ישלם המבער את הבערה׃

⁷ כי יתן איש אל רעהו כסף או כלים לשמר וגנב מבית האיש אם ימצא הגנב ישלם שנים׃

⁸ אם לא ימצא הגנב ונקרב בעל הבית אל האלהים אם לא שלח ידו במלאכת רעהו׃

⁹ על כל דבר פשע על שור על חמור על שה על שלמה על כל אבדה אשר יאמר כי הוא זה עד האלהים יבא דבר שניהם אשר ירשיען אלהים ישלם שנים לרעהו׃

¹⁰ כי יתן איש אל רעהו חמור או שור או שה וכל בהמה לשמר ומת או נשבר או נשבה אין ראה׃

¹¹ שבעת יהוה תהיה בין שניהם אם לא שלח ידו במלאכת רעהו ולקח בעליו ולא ישלם׃

¹² ואם גנב יגנב מעמו ישלם לבעליו׃

¹³ אם טרף יטרף יבאהו עד הטרפה לא ישלם׃

¹⁴ וכי ישאל איש מעם רעהו ונשבר או מת בעליו אין עמו שלם ישלם׃

¹⁵ אם בעליו עמו לא ישלם אם שכיר הוא בא בשכרו׃

¹⁶ וכי יפתה איש בתולה אשר לא ארשה ושכב עמה מהר ימהרנה לו לאשה׃

¹⁷ אם מאן ימאן אביה לתתה לו כסף ישקל כמהר הבתולת׃

¹⁸ מכשפה לא תחיה׃

¹⁹ כל שכב עם בהמה מות יומת׃

²⁰ זבח לאלהים יחרם בלתי ליהוה לבדו׃

²¹ וגר לא תונה ולא תלחצנו כי גרים הייתם בארץ מצרים׃

²² כל אלמנה ויתום לא תענון׃

²³ אם ענה תענה אתו כי אם צעק יצעק אלי שמע אשמע צעקתו׃

²⁴ וחרה אפי והרגתי אתכם בחרב והיו נשיכם אלמנות ובניכם יתמים׃

²⁵ אם כסף תלוה את עמי את העני עמך לא תהיה לו כנשה לא תשימון עליו נשך׃

²⁶ אם חבל תחבל שלמת רעך עד בא השמש תשיבנו לו׃

²⁷ כי הוא כסותה לבדה הוא שמלתו לערו במה ישכב והיה כי יצעק אלי ושמעתי כי חנון אני׃

²⁸ אלהים לא תקלל ונשיא בעמך לא תאר׃

²⁹ מלאתך ודמעך לא תאחר בכור בניך תתן לי׃

³⁰ כן תעשה לשרך לצאנך שבעת ימים יהיה עם אמו ביום השמיני תתנו לי׃

³¹ ואנשי קדש תהיון לי ובשר בשדה טרפה לא תאכלו לכלב תשלכון אתו׃

²⁰ The man gave names to all livestock, and to the birds of the sky, and to every animal of the field; but for man there was not found a helper suitable for him.