Zephania 1

¹ Zudah beipa Amawna sawchapawpa Zôsiah a bei nota, ABEIPA bie Zephania, Kusi sawchapawpa, Kedalia sawchapawpa, Amariah sawchapawpa, Hezakiah sawchapawpa hnohta a vaw tlôpa cha.

² “Alei chô tawhtapa hmo zydua ei pahleipadia khai aw,” ABEIPA ta a tah.

³ “Chyhsa nata sazy pahleipadia aw na ta; A zawpa pavawzy nata tilaipi ngazy pahleipadia aw na ta. Moleipazy papao aw na ta; alei chô tawhtapa chyhsapa ei pahlei aw,” ABEIPA ta a tah.

⁴ “Zudahzy nata Zerusale pahrâtuhpa zydua chô liata ei ku hy aw na ta; he su tawhna heta Baal laibâhpazy cha chhaw pathla aw na ta, ama nohthlahpa theihthaipazy chhao;

⁵ o laki liata vâ lâ hmozy lâta a bôh tyhpazy, ABEIPA lâta chhiesapa ta Milkô moh reipa ta chhiesapa ta a bôh tyhpazy,

⁶ ABEIPA a heisaituhpazy nata ABEIPA tlua leipa ta, ano a chhohia leituhpazy cha ei pahleipadia aw,” tah ta.

⁷ Abeipa KHAZOHPA hmiakô liana chata a thlih thlâh ha teh! ABEIPA noh cha a hnia hawpa vâta; ABEIPA chata atheihna a chhuahnoh aw ta, a chyhsa hmâpazy chhao pathaisa haw tlôh ta.

⁸ ABEIPA atheihna noh liana chata “Hyutuhpazy nata abei sawchapawzy nata pho hropa chysia ta a tobipa zydua cha ei hrie aw.

⁹ Cha noh liana chata chhikao a chakâpa zydua, ama hyutuhpazy o nôchhiena nata dona ta a pabietuhpazy ei hrie aw.”

¹⁰ “Cha noh liana chata Nga Chhikao tawhta awna pyu zy, Misneh tawhta sâh ngâna zy, tlâh tawhta paro ngâpazy a y aw,” ABEIPA ta a tah.

¹¹ Môrta mo saih u, Kana mo zydua ama leidia vâta sâh ngâ thlâh teh u! Tâkâri a phaohtuhpa zydua ama leidia khai haw.

¹² Cha daihti liana cha meiôh pakhaihpa ta Zerusale tlua aw na ta, chyhsa kresawti didâpa hawhta ypa ta, ama palôhrupa ta, ‘ABEIPA ta papha leipa aw ta, parao hra aw vei,’ a tahtuhpazy cha ei hrie aw.

¹³ Ama sôhzy cha hraona ta châ aw ta, ama ozy cha a ry aw. Ozy sa aw ei ta, châhrasala pahrâ aw veih ei; kresahdôzy tao aw ei ta, châhrasala a kresawti cha doh aw veih ei,” tah ta.

¹⁴ ABEIPA noh rôhnah ngaitapa cha a hnia na; a hniapa ta a tlô patoh aw, ABEIPA pyu cha, cha liana chata chyhsa thatlôpa cha thata a sâh aw.

¹⁵ Cha noh cha hiehâhna noh châ ta, nôpona nata rietheina noh, raona nata roryhrana noh, zohna nata vâpanoh noh, amei nata zohkaluhna noh châ ta,

¹⁶ kuh dôhpa khihpizy chô liata nata khihchaki kuh sâhpazy chô liana chata chiahmie nata chariah pyu y noh châ ta.

¹⁷ Chyhsazy chô liata rietheina vaw patlôsa aw na ta, mochaopa hawh tlaita sie aw ei ta, ABEIPA chô liata ama moleipa vâta; ama thisaih cha doh-lei hawhta patlai aw na ta, ama sapazy chhao ie haw tlaita.

¹⁸ ABEIPA hiehâhna noh liana chata ama ngôh tlyma, ama tâkâri tlyma chhaota âmo pachha thei leipa aw ta. Râh tlokhu he a hiatliana mei liana chata a kâ khai aw, râh liata a pahrâpa zydua pahlei aw ta, pahleina rarôh y ngaitapa tao tlôh aw ta.