Ryureihtuhpazy 5

¹ Chatanachata Debôrah nata Abinôami sawchapawpa Baraka chata, cha nona chata:

² Hyutuhpa zy chata Izarel hry liata chhihtha ei ta, zawpizy chata thathyu ngaitapa ta ama vaw hlâ hih. ABEIPA cha reithai teh u!

³ “Hy nâmo abeizy saih u, nahthlie ula; hy nâmo hyutuhpa saih u, nah pachôh teh u, kei tlaita ABEIPA palyupalihpa ta hlasa aw na ta, ABEIPA Izarel zy Khazohpa reithaipa ta hla ei sa aw.

⁴ “ABEIPA, Seira tawhtapa nâ vy nahta, Edôma sibiepa su tawhtapa na vaw pua nona khata, alei cha a chalyu ngâ ta, avâ zy chhao vaw suah ta, amei zy cha avâ pasuasa ta.

⁵ Tlâh zy cha, ABEIPA hmiakô liata cho ta, Sinai tlâh taih chhao hao, ABEIPA Izarel zy Khazohpa hmiakô liana chata.

⁶ “Anatha sawchapawpa Shamaka hro nohzy nata, Zael hro noh zy khata, lâlaizy cha maoh kaw ta, khitlyhpa zy cha lâpi chakhypa zy liata sie tyh ei ta.

⁷ Izarel râh liata khihzy cha pahrâ leipa ta, rypa ta y ta, kei Debôrah thyu na ta, Izarel râh no he ei thyu hlâ lei kha cha,

⁸ Khazoh thiehpa zy patu ei ta, chatanacha kuh ochhi kiapâh liana zy khata adyuhna y ta, Izarel râh liata chyhsa thy palih tlai hry liana khata, vyhphao nata asei kha a ypa rai a y mâ?

⁹ Ei palôhrupa cha Izarel sahlao zy pachiatuhpa zawpi zy hnohta thathyu ngaitapa ta a piepa zy lâna cha a y. ABEIPA cha reithai teh u.

¹⁰ “Nâmo alâ râhpa chô a kiahpa zy saih u, nama poh phaw chha ngaitapa liata a tyuhpa saih u, nâmo lâpi liata a chareipa saih u, cha biezy cha phuah teh u.

¹¹ Châtai a katuhpa zy pyu rai theileipa, ti thaina su liana chata ABEIPA hmo siapa taopa zy cha, ama rei ngâ aw. Izarel râh chô liata a hmo siapa taopa zy tlai cha. “Chatanachata ABEIPA zawpizy cha kuh ochhi lâna zy chata zu ei ta.

¹² “A hra la, a hra la, Debôrah! A hra la, a hra la, hla sa teh! Thyu la, Baraka, nâ Abinôami sawchapaw, na patupa zy cha sei ta a chhi teh.

¹³ Chatanachata molaipa a y chhôhpazy nata zawpizy cha a zu ei ta; chyhsa thatlô ngaitapa nâ dyukhei awpa ta ABEIPA cha a za chô haw.

¹⁴ Amale liata thari a hneipa zy cha Ephrai tawhta za chô ta, Benzami, na chyhsa hry liatahpa zy ta, ama cha zi hih, Makhia tawhta râh pachiatuhpa zy a zu ei ta, Zebulawna tawhta châ rohtuhpa chôhchahrei chabatuhpa zy cha amâ zu;

¹⁵ Iskara molaipa zy cha Debôrah hnohta a hlao ei ta, Iskara hawhta Baraka chhao; saikao lâna chata ano nata zâ râ ei ta, Rubena mo ti lona zy lâna chata amâ chhuahpa pathipalôh thata y ta.

¹⁶ Khazia mietahkupa sahdô likawh liata nâ tyuh thlâh haw, mietahkupa zaw awna siaramo nahthlie awpa hawhta? Rubena mo ti lona zy liana chata pathipalôh pasiana thata a y.

¹⁷ Kilia mo cha Zawdâh haosâ ta y ei ta, Dana mozy cha khazia e balyh liata ama y thlâh haw? Asera mo cha tilaipi ngiakâ liata atyuh molo ei ta, ama lichakohpa liana chata ama y thlâh haw.

¹⁸ Zebulawna mo nata Nathalai mo he, sibiepa su a sâhpa liata thi riah a chi leipa ama châ.

¹⁹ Abeizy ta a vy ei ta, adyuh ei ta, Kana abeizy chata Mekidô ti kiapâh Tana khih liata adyuh ei ta, hraona sôh lapa rai hnei veih ei.

²⁰ Avâ tawhta a vaw dyuh ei ta, awhsizy ta ama su tawhta, Sisera cha a vaw dyuh ei ta.

²¹ Kishaw ta âmo cha phaoh khai ta, hlâno Kishaw chata. Hy ei thlahpa, thatlô ngaitapa ta sie lymâ teh!

²² Chatanachata arâ zy cha a thluah ngâ ta, arâ chahrapa zy cha amâ zaw ngâpa vâta.

²³ “Merô cha a chhie sapa teh u, ABEIPA vâlyuhchâpa ta a tah, cha liata a ypa zy cha thata chhiesa pa teh u, ABEIPA baopa ta amâ vy leipa vâta, ABEIPA ta chyhsa thatlô ngaitapa adyuhna liata bao awpa ta amâ vy leipa vâta.

²⁴ “Chanô zydua hry liata Zael, Keni chyhsa, Heba lahpinô he, nohhlao chaipa a châ aw, chanô poh-o liata a pahrâpa sahlao zydua hry liana chata noh hlao chaipa a châ aw.

²⁵ Ano chata ti vaw hiah, sâhpiti vaw pie ta, chyhsa phapa nyu ta sâhpiti kuapa vaw pie ta.

²⁶ Khaipâna a chaba ta, a chachâh lâta raihriapa syulô; a luh liata khaipahlie ta a siali liata khai pahlie ta, alei liata a chalona taihta khai ta.

²⁷ A phei thaby liata pao ta, a khu thlâh ha ta; a phei thaby liata pao haw ta; a paona su liana chata a thipa ta a pao thlâh haw.

²⁸ “Sisera nô cha opy liata a vaw luah ta, diahpai kao liata aw ta; ‘Khazia e, a talaili a vaw tlô to vei, khazia e, a talaili phei nainô a sô? ‘tah ta.

²⁹ A chanô sopa zy ta a chhy ei ta, anosasyh ta a chhy hei ta.

³⁰ Hmo thei khao vei ei ma? Chyhsa to ta laihsa pakha, pano chyu tlyma; Sisera to awpa cha hraona poh chi nanopa, hraona poh a ngiapa chi nanopa, hraona rao liata a ao awpa poh, a kârâno ta pakypa, chi nanopa ma?’ tahpa ta.

³¹ “Cha hawhna chata, hy ABEIPA, na khakhaipa zydua cha leidia khai ei sala! Ano kyh a pachutuhpa zy deikua cha, thatlô ngaitapa ta a siepa noh hawhna he châ mawh sy,” tahpa ta hla sa ei ta. Chatawhcha râh cha kô sypalih chhôh thlalôhpa ta y ta.