1
Shinara abeipa Amraphel zy, Elasa abeipa Ariôka zy, Elama abeipa Kedaolaoma zy, Kôima abeipa Tidal zy ama hro nona cha châ ta.
2
âmo chata Sawdawma abeipa Bera zy, Kawmawra abeipa Birasa zy, Adamah abeipa Shinaba zy, Zebô abeipa Shemeba zy, nata Bela abeipazy cha a dyuh ei ta. (Cha cha Zawa a châ..
3
Cha sahlao zydua cha Sidima saikao liata a pazaopakhy khai ei ta (cha saikao cha Tilaipi Iahpa a châ).
4
Kô hrawhleino chhôh cha Kedaolaoma ry ta y ei ta, kô hrawhleithôhna lia deikua cha a tyh haw ei ta.
5
Kô hrawhleipalihna liana cha Kedaolaoma nata a hnohta abeipa ypazy cha a vy ei ta, Asterôkanai liata Rephai mozy thie ei ta, Hama liata Zuzi mozy thie ei ta, Kiriatha bypi liata Emi mozy thie ei ta,
6
Ama yna Seira Tlâh liata Elparan taihta Hôri mozy thie ei ta, cha cha râhpathohpa daih lâchhâh a châ.
7
chatawhcha kua heih ei ta, Emipa tlô ei ta(cha cha Kadesa a châ). Amaleka mo râh zydua nata Hazazôtama a pahrâpa Amawri mo zydua thie heih ei ta.
8
Chatanachata Sawdawma abeipa zy, Kawmawra abeipa zy, Adamah abeipa zy, Zebô abeipa zy, Bela abeipa zy pua ei ta (cha cha Zawa a châ). Sidima saikao liana cha adyuhpa ta a tyh ei ta,
9
Elama abeipa Kedaolaoma zy, Kôima abeipa Tidal zy, Shinara abeipa Amraphel zy, Elasa abeipa Ariôka zy cha a dyuh ei ta, abeipa papalih ta abei papangawh amâ dyuh.
10
Chatawhcha Sidima saikao cha chiatlao khaoh ta bie ha ta; Sawdawma nata Kawmawra khih abeipazy a râ ei ta, cha liana cha tla ei ta, a tla laibâhpazy cha tlâh lâta a râ ei ta.
11
Chatanachata Sawdawma nata Kawmawra mozy, hmo zydua nata ama nie awpa zydua cha la ei ta, sie ha ei ta,
12
Lawta Abara uhnawhpa sawchapawpa Sawdawma khih liata a pahrâpa cha, a hmo zydua chhaota la ei ta, siekhei haw ei ta.
13
Chatanachata chyhsa pakha â râpa a vy ta, Hebrai chyhsa Abara cha chho ta, ano cha Amawri chyhsa Mamre aoka kiapâhta pahrâ ta, Mamre cha Eskawl uhnawhpa nata Anera uhnawhpa châ ta; hezy he Abara nata aparaohpa châ ei ta.
14
Abara chata a uhnawhpa saw cha sei ta amâ chhi tahpa a pahnopa ta nahta, a o chhôh liata a pihpa, ano chyhsa, a thai chiehpa za thôh nata pahrawhleicharie a chhi ta, Dana khih taihta a chadai lymâ ta.
15
Chatawhcha zâ ta âmo sahlao adyuh awpa ta âmo nata a seizy cha a pachhaih ei ta, âmo sahlao cha thie ei ta. Hôbah khih taihta a chadai ei ta, Hôbah cha Damaska khih maw lâ chhâhta a y.
16
Chatawhcha hmo zydua cha vaw kuakhei khai ta, a uhnawhpa saw Lawta nata a sôhzy cha vaw la khai ta, chanôzy nata mo hropa zydua chhaota.
17
Chatawhcha Kedaolaoma nata a hnohta ypa abeizy pahnie ta a vaw kua tawhna chata, Sawdawma abeipa cha Shaveh saikao liana cha dy awpa ta pua ta (cha cha Abeipa Saikao a châ).
18
Chatawhcha Salema abeipa Melkizedeka chata viahchhâ nata kresawti vaw cheih ta, ano cha Khazohpa Chônôchaipa theihthaipa châ ta.
19
Chatawhcha ano chata Abara cha byhnâ awpa ta: “Avâ nata alei a taotuhpa Khazohpa Chônôchaipa chata Abara cha byhnâ pie mawh sy;
20
Khazohpa Chônôchaipa cha reithaita y mawh sy,na chariahpazy a châ pahniesapa vâta”tah ta.Chatawhcha Abara chata ano cha a to su hrawh liata su kha pie ta.
21
Chatawhcha Sawdawma khih abeipa chata Abara hnohta, “Chyhsazy he na pie la, hmozy he cha nâma a la mah y,” tah ta.
22
Chatawhcha Abara chata Sawdawma khih abeipa hnohna chata, “Avâ nata alei a taotuhpa ABEIPA Khazohpa Chônôchaipa lâna chata ei ku ei pazawh haw.
23
lari sâkha ta chhao pheiky ri sâkha ta chhao la aw va na, chata leipa ta la ‘Abara cha keima ta ei pahneirôhsapa ma a châ tâh,’ na tah pathlei aw na.
24
Satliapazy nie chiepa nata ei sielâhpa chyhsazy tovyuh dei leipa cha la aw va na, Anera zy, Eskawl zy, Mamre zy chata ama tovyuh cha a la ei se,” tah ta.
