1 Thatihzy Rona 12

¹ Chatanachata Kisa sawchapawpa Sawla vâta Davi cha Zikla liata khâchâ a khawhlôh no ta, ano lâna a vypa zy cha hezy he ama châ; âmo cha adyuhna liata ano a baotuhpa chyhsa riahphapazy hry liatahpa ama châ.

² Libaw a cheipa chachâh lâ nata chavei lâta vawna ta alô a vawhpa nata libaw ta châtai a ka thaipa châ ei ta; Benzami chyhsa Sawla chizy ama châ.

³ Pawhrâh chaipa cha Ahieza châ ta, Kibia chyhsa Shemah sawchapawpa Zôasa; Azamave sawchapawpa Zeziel nata Pele zy; Beraka zy, Anathô chyhsa Zahu zy,

⁴ sythôh hry liata chyhsa riahpha sythôh hyutuhpa Kibia chyhsa Isamai zy, Zeremiah zy, Zahaziel zy, Zôhana zy, Kedera chyhsa Zôzaba zy,

⁵ Eluzai zy, Zerimao zy, Bialiah zy, Shemariah zy, Haru chyhsa Shephatiah zy,

⁶ Kôrah chyhsa Elkanah zy, Isiah zy, Azarel zy, Zôeza zy, Zasôbia zy,

⁷ Kedaw chyhsa Zerôha sawchapawpa Zôelah nata Zebadia zy ama châ.

⁸ Kada mozy hry liatahpa chyhsa thatlôpa riahphapa adyuh a thaipa, vyhphao nata asei a hmâh thaipa thokhazy cha râhpathohpa liata kuh liata Davi lâna khata a bai ei ta, ama hmiazy cha chakeibarôhneipa hmia hawhta châ ta, tlâh liata sakhih zeinô hawhta chatliechakohpa ama châ:

⁹ Pakhana cha Eza châ ta, a panona cha Ôbadia, a pathôhna cha Eliaba.

¹⁰ a papalihna cha Mismanah, a papangawhna cha Zeremiah,

¹¹ a pacharuna cha Atai, a pasarina cha Eliel,

¹² a pachariena cha Zôhana, a pachakina cha Elzaba,

¹³ a pahrawhna cha Zeremiah, a hleikhana cha Makhabanai.

¹⁴ Cha Kada chyhsazy cha pheisaih hyutuhpazy ama châ, ama hry liata thatlô lei chaipa chhao cha za kha atlupa châ ta, a tha tlô chaipa cha sâh kha a tlupa a châ.

¹⁵ Cha sahlao cha thla khana liata Zawdah a kao zydua a khô no ta chakapa ta saikao liata a pahrâpa sahlao zydua nochhi lâ nata notla lâta a parâpaisatuhpazy kha ama châ.

¹⁶ Benzami sahlao nata Zudah sahlao hry ta chyhsa thokha cha kuh liata Davi lâta vawh ei ta.

¹⁷ Davi cha âmo dy awpa ta sie ta, “Phana lâ kyh ta na bao awpa ta kei lâta a vypa nama châ khiahtala ei pathipalôh ta khâchâ châ zao aw ei ta; anodeikua cha ei ku ta a peina hmo hria vei tahpa pahno thlâh ha tlôhpa ta, ei khakhaipazy na patusa a chhuahpa ta a vypa nama châ khiahtala eima mahpaw zy Khazohpa chata cha ngiapa ta cha chhorei ei se,” tah ta.

¹⁸ Chatanachata sythôh chô liata hyutuhpa Amasai chô liana chata Thlahpa vaw tlô ta, “Davi y, na chyhsa zy eima châ; Zese sawchapawpa y, na chhâh a châpa eima châ! Na chô liata thlahlôhna y mawh sy. nâma châ baotuhpa zy chô liata chhao thlahlôhna y mawh sy! Na Khazohpa ta cha bao tyh tlôh ta, ” tah ta. Chatanachata Davi chata âmo cha a ly ta, pheisaih hlao hyutuhpa zy ta tao haw ta.

¹⁹ Philistina mozy ta Sawla adyuh awpa ta ama pua no ta a hlao hrapazy khata Manase mozy hryta thokha zy chhao Davi lâta a bai hra ei ta. Châhrasala bao hlei khao veih ei. Philistina mozy hyutuhpa cha a chhohia ei ta, “A zibeipa Sawla lâta a bai aw ei ta, eima luh eimâ pahlei pathlei aw na,” tahpa ta ama pakuasa haw heih.

²⁰ Zikla khih a tlô nahta Manase mo hryta pheisaih sâh kha hyutuhpa Adanah zy, Zôzaba zy, Zediael, zy, Mikhael zy, Zôzaba zy, Elihu zy, Zilethai zy, cha ano lâta a bai ei ta.

²¹ Davi ta chariah sahlao adyuhpa cha a dyuhkhei hra ei ta; ama zydua ta chyhsa thatlôpa riahphapa pheisaih hyutuhpa châ ei ta.

²² Noh chareih Davi chhâh a châ awpa ta a vy ngâthlâh ei ta, Khazohpa pheisaih sahlao hawh tlaita pheisaih hlao rôhnah ngaitapa vaw châ haw ei ta.

²³ ABEIPA bie hawhta Sawla khihnarâh Davi patosa awpa ta Hebraw liata Davi lâta adyuhna chhaichhi a tobipa ta a siepa hluhzie cha he hawhta a châ.

²⁴ Zudah pathla adyuhna chhaichhi atobipa vyhphao nata asei a chabapa cha sâh charu nata za charie ama châ.

²⁵ Simeôna pathla adyuhna liata chyhsa thatlôpa nata riahphapa cha sâh sari nata za kha.

²⁶ Livai pathla sâh palih nata za charu.

²⁷ Zehôiada cha Arawna pathla chhihthatuhpa châ ta, ano hnohta sâh thôh nata za sari a hlao hra ei ta.

²⁸ Zadôka satliapa thatlôpa riahphapa a chhôhkha hry tahpa pheisaih hyutuhpa syno nata pano chhaota.

²⁹ Benzami pathlazy hry tahpa Sawla chizy sâh thôh, cha hlâta cha a hluh via zy cha Sawla sahlao chhâh a châpa châ tyh ei ta.

³⁰ Ephrai pathlazy hry liatahpa chyhsa thatlôpa riahphapa ama chhôhkha hryta chyhsa mohpathâhpa thy no nata za charie.

³¹ Manase pho khophiezy hry tahpa moh liahsa a piepa, Davi abei ta tao a chhuahpa ta a vypa zy thy kha nata sâh charie.

³² Iskara pathlazy hry tahpa cha no ta daihti hmo yzie pahnopa, Izarelzy ta ama hmotao awpa a byuhpa a pahnopa hyutuh viapa za no, ama unawhpa zydua cha ama bie ry liata a ypa châ ei ta.

³³ Zebulawna mo hry tahpa chariah adyuh tlâhpa adyuhna chhaichhi to chhaota adyuh thaipa thy pangawh, palôhrupa â i ngaitapa a phaohpa châ ei ta.

³⁴ Nathalai mo hry tahpa pheisaih hyutuhpa sâh kha, vyhphao nata asei a chabapa thy thôh nata sâh sari chhaota.

³⁵ Dana mo hry tahpa pheisaih adyuh a thaipa thy no nata sâh charie nata za charu.

³⁶ Asera mo hry tahpa chariah adyuh tlâhpa adyuh thaipa thy palih.

³⁷ Zawdah haosâ ta Rubena mo hry tahpa zy, Kada mo hry tahpa zy, Manase pho khophie hry tahpa zy, adyuhna chhaichhi to chhaota a puapa, thy sy kha nata thy no.

³⁸ Cha zydua cha adyuhpa chyhsa adyuh thaipa châ ei ta, Davi cha Izarel mo zydua chô liata abei ta tao awpa ta palôhrupa miakha phaohpa ta Hebraw lâta sie ei ta; chatawhcha Izarel hropa zydua chhaota, Davi cha abei ta tao awpa ta palôhrupa miakha phaoh chyu ei ta.

³⁹ Davi hnohta noh thôh nie nata dopa ta y ei ta, ama unawhpa zy ta amâ chhuahdypa khai haw.

⁴⁰ Cha dei chhao châ leipa ta ama kiapâh ta a ypa Iskara râh tawhta zy, Zebulawna râh tawhta zy, Nathalai râh tawhta zy taihta, alâ zy, râraoseihpa zy, arâ zy, viahchao tôhpa zy ta niepa viahchhâ zy, theiku tlo zy, kresao pachawhpa zy, kresawti zy, sathaw zy, paphaosa ei ta, viahchao tôhpa zy, mietahkupa zy a hluhpi vaw cheih hra ei ta, Izarel râh cha alyna ta bie ta.