1
Davi chata hyutuhpa zydua sâh kha hyutuhpa zy, za kha hyutuhpa zy cha a chhohia ta.
2
Davi chata Izarel apahmaohpakhypa sahlao zydua hnohna chata, “A pha nama tahna zie nata ABEIPA eima Khazohpa a ryh a tahna zie a châ hra khiahtala, Izarel râh zydua liata eima unawhpa a ypazy cha khichapei a hneipa khih liana a ypa theihthaipa zy nata Livai mozy chhaota eima hnohta a vaw pakhy hra awpa ta hrua ei suh vy.
3
Chatawhcha eima Khazohpa Byh he la heih ei suh u; Sawla abei nota cha pachâ beih leipa pi ta,” tah ta.
4
Ahmaohpakhypa sahlao zydua chata cha hawhta tao awpa cha khoh ei ta, chyhsa zydua pachâna liata hmo dopa châ ta.
5
Chatanachata Davi ta Izi chavah Sihôra tawhta Hama khih a ngiana taihta, Izarel chyhsa zydua cha Kiriaziari khih liata Khazohpa Byh cha la awpa ta pakhy khai ta.
6
Chatanachata Davi nata chyhsa zydua cha Zudah râh liata Baalah, Kiriaziari ama tahpa liana chata, Khazohpa Byh, ABEIPA cherubizy liata atyuhpa mo ama tahpa cha la awpa ta khy ei ta.
7
Khazohpa Byh cha Abinada o tawhtapa talaili thiehpa ta siekhei ei ta, Uza nata Ahiô ta talaili cha pasiesa ei ta.
8
Davi nata Izarel chyhsa zydua chata hlasapa ta, totâ zy, tlaipi zy, khoh chyhpa ta zy, paotlâ zy, chiahmie zy chhaota, Khazohpa hmiakô liata thapha ngaitapa ta y ei ta.
9
Kidaw sawhri ama tlô nahta Uza ta Byh cha patu a chhuahpa ta pazah ta, viahchao zy cha amâ chapiapa vâta.
10
Chatawhcha ABEIPA pathi cha Uza liata ia ta; Byh a patupa vâna chata thie haw ta; cha liana chata Khazohpa hmiakô liata thie haw ta.
11
ABEIPA chata Uza chô liata a ku a pathlapa vâta Davi cha a pathi-ia ta; cha su cha Perezuza bi ta, atanoh taihta a châ thlâh haw.
12
Davi chata cha noh liana chata Khazohpa cha chita; “Kheihta e Khazohpa Byh cha ei tlôkhei thei aw?” tah ta.
13
Chatanachata Davi chata Byh cha Davi khih liata ano hnohta cheih khao leipa ta, Kiti chyhsa Ôbededôma o liata tlao soh ta.
14
Khazohpa Byh cha Obededôma o liata a sanawh zy hnohta thla thôh y ta; chatanachata Ôbedadôma chhôhkha zy nata a hneipa zydua cha ABEIPA ta byhnâ pie ta.
