1
ABEIPA ta Mawsi nata Arawna chho ta.
2
Izarel pathlazy cha chho ula, alei chôta sa zydua hry liata hrona a hneipa nama nie awpazy cha hezy he a châ.
3
Sa hry liata a chakie’ pachiahpa ta, a chakie sâno liata a pachhaihpa, hârie a cha-eihpa maih cha nie thei aw eichi ta.
4
Anodeikuacha hârie a cha-eihpa tlyma, chakie a pachiahpa tlyma hryta, hezy he cha nama nie awpa châ vei; râraoseipa hârie chaeih hrasala a chakie pachiah leipa vâta nama châta pathaih leipa a châ.
5
Tlâh pazupi hârie chaeih taraw ta, châhrasala a chakie a pachiah leipa vâta nama châta pathaih leipa a châ.
6
Pazupi hârie chaeih taraw ta, a chakie a pachiah leipa vâta nama châta pathaih leipa a châ.
7
Vao a chakie cha pachiah ta, a chakie sâno lâta a pachhaih tarawpata, châhrasala hârie a chaeih leipa vâta nama châta pathaih leipa a châ.
8
Ama sapa nama nie awpa châ leipata, a thipa chhao nama hria awpa châ vei; nama châta pathaih leipa a châ.
9
Ti liata a pahrâpa zydua liata hezy he nama nie thei aw. Tilaipi zy, chavah zy, ti liata a ypa mathlaw nata phuhlupa a hneipa maih cha nama nie thei aw.
10
Ti liata a pahrâpa zydua nata ti liata hrona a hneipa zydua hry liata tilaipi liatahpa zy, chavah liatahpa zy, mathlaw nata phuhlupa a hnei leipa maih cha nama châta pasichhihpa châ ta.
11
Nama châta pasichhihpa a châ aw; ama sapa nama nie awpa châ leipata, a thipazy cha nama châta pasichhihpa a châ.
12
Ti liatahpa mathlaw nata phuhlupa a hnei leipa maih cha nama châta pasichhihpa a châ.
13
“Chatawhcha pavaw hry liatahpa cha hezy he hmo pasichhihpa ta nama hnei awpa ta a châ, nie awpa châ leipata, hmo pasi a chhihpa ama châ; pahmôpi zy, vâkhie zy, hmôchhi zy.
14
vaku zy, riarâtao chi maih zy.
15
ra-awh chi maih zy.
16
pavaw asâhpa chi zy, valâtla zy, seihaopa zy, pahmô chi maih zy.
17
vaku chyhpa zy, tyhphy nga niepa zy, tutahlupa zy.
18
varapi zy, vâkhie zy.
19
vawpô zy, riasi chi maih zy, nôpinô nata pazu tâbalâpa zy.
20
“Alyhthaipa mathlaw a hneipa, phei palih ta a siepa maih cha, nama châta hmo pasichhihpa a châ.
21
Anodeikuacha alyhthaipa mathlaw a hneipa, phei palih ta a siepa chi chhao alei chô liata a chapie nawpata ama phei chô lâta a pheipi a hneipa zydua hry liatahpazy he nama nie thei aw.
22
Hezy chhao he nama nie thei aw, khawsu chi maih zy, khawsu lahmei leipa chi maih zy, chiacharipa chi maih nata khaw-thlôhraipa chi maih zy.
23
Anodeikuacha alyhthaipa mathlaw a hneipa, phei palih a hneipa zydua cha nama châta pasichhihpa a châ khai aw.
24
“Hezy vâna heta pathaih leipa nama châ aw; ahyrai thi chiehpa a hriapa maih cha zâlâ taihta pathaih leipa châ aw ei ta,
25
ahyrai he a thi chiehpa a latuhpa maih heta ama pohzy ama pasu awpa châ ta; zâlâ taihta pathaih leipa ama châ aw.
26
Sahroh a chakie pachiahpata chakie sâno lâta a pachhaih leipa, hârie chhao a chaeih leipa chi maih, nama châta pathaih leipa châ ta, ahyrai chazy a hriapa maih cha pathaih leipa ama châ aw.
27
Chatawhcha sa zydua phei palih ta a siepa hry liata phei padihpata a siepa maih cha, nama châta pathaih leipa châ ta, a thi chiehpa a hriapa maih cha, zâlâ taihta pathaih leipa a châ aw.
28
a thi chiehpa a latuhpa maih chata ama pohzy ama pasu awpa châ ta, zâlâ taihta pathaih leipa ama châ aw; nama châta hmo pathaih leipa a châ.
29
Alei liata alyhthaipa chi hry liata nama châta hmo pathaih leipa cha hezy he a châ: zabi zy, siahlo zy, sawsâ chi zy,
30
taokie zy, tlypahniapa zy, ohâpa zy, ti sawsâ zy, ka-uapa zy.
31
Hezy he alyhthaipa chi zydua hry liata nama châta pathaih leipazy cha ama châ; ahyrai ta he a thi chiehpazy he ama hria khiatala zâlâ taihta pathaih leipa ama châ aw.
32
Chatawhcha ama thi nota khâparai ama veipa cha, a pathaih leipa a châ lymâ aw, chhaichhi hmâpa maih cha, tho hmobao tlyma, poh tlyma, savo tlyma, sykhao tlyma rai châ sala; ti liata pachie awpa a châ, zâlâ taihta pathaih leipa a châ aw; cha khai tawhta a pathaih aw.
33
Alei beih a kheihawhpa rai a chhôh liata a tlana maih cha, a chhôh liata a ypa zydua cha pathaih leipa châ ta, nama pakei lymâ awpa a châ.
34
Cha beih liata niepa a ypa zydua chhao, cha liata ti liata tla hawpa cha, pathaih leipa a châ aw; do theipa chi zydua chhao cha beih liatahpa maih cha pathaih leipa a châ aw.
35
Hmo khâpa rai a thi chiehpata a chô liata a tlapa cha pathaih leipa a châ lymâ aw; viahchhâ chhona tlyma, a pasana beih tlyma rai, pakei khai awpa a châ; pathaih leipa châ haw ta, nama châta pathaih leipa a châ aw.
36
Anodeikuacha tikhaoh tlyma, khaotlô tlyma, ti â opa cha pathaih leipa châ leipa aw ta, a thi chiehpa a hriapa maih deikua cha pathaih leipa a châ aw.
37
Chatawhcha chikao cheih awpa rai cha a thi chiehpata a chô liata tla thlu haw sala, pathaih leipa châ aw vei;
38
anodeikuacha chikao ti liata pachie chiehpa a thi chiehpata a chô liata tla sala nama châta pathaih leipa a châ.
39
Sahroh nama nie theipa chi rai chhao thi sala, a thi chiehpa a hriapa maih cha zâlâ taihta pathaih leipa a châ aw.
40
a sapa a niepa maih ta a pohzy a pasu awpa châ ta, zâlâ taihta pathaih leipa a châ aw; chatawhcha a thi chiehpa a latuhpa chhaota, a pohzy pasu awpa châ ta, zâlâ taihta pathaih leipa a châ aw.
41
Alyhthaipa alei chô liata alyhpa chi zydua cha pasichhihpa châ ei ta; nie awpa châ vei.
42
A py ta a siepa chi nata phei palih ta a siepa chi tlyma, phei hluhpi a hneipa chi tlyma, alei chô liata alyhpa chi rai cha nama nie awpa châ vei; pasichhihpa châ tlôh ei ta.
43
Alyhthaipa chi rai ta nâma sasyh ta pasichhihpata nama tao awpa châ leipata; nama papua pana awpata chazy chata nama papua awpa châ vei.
44
Kei he ABEIPA nama Khazohpa châ tlôh na ta; chavâta a pathai ula, pathaihpata y teh u, kei pathaih tlôh na ta. Alei chô liata a pahrâpa alyhpa a kheihawhpa chi ta hmahta a papua khah u.
45
Nama Khazohpa châ awpata Izi râh tawhtapa cha kaw chhituhpa ABEIPA cha, châ tlôh na ta, kei pathaih tlôh na ta; chavâta nâmo chhao nama pathaih awpa a châ.
46
He he sa nata pavawzy nata hmohrohneipa ti liata a pahrâpa to nata alei liata alyhpa chi tozy kyh liata ryhpa awpa a châ.
47
pathaihpa nata pathaih leipa pananona awpa nata hmohrohneipa nie theipa nata hmohrohneipa nie beih leipa pananona awpata tao teh u, tahpa ta.
