Arcana Coelestia #7220
7220. ‘Veni, loquere ad Pharaonem regem Aegypti’: quod significet admonitionem ad illos qui infestant per mera falsa, constat ex significatione ‘loqui’ cum ex mandato Divino, quod sit admonitio; et ex repraesentatione ‘Pharaonis’ quod sint qui infestant per falsa, de qua n. 7107, 7110, 7126, 7142; et quia per mera falsa, dicitur ‘Pharao 1 rex Aegypti’, nam per ‘regem’ significatur in genuino sensu verum, et in opposito falsum, n. 2015, 2069.
Note a piè di pagina:
1. The Manuscript inserts etiam.
Arcana Coelestia #7142
7142. ‘Et clamaverunt ad Pharaonem’: quod significet indignationem contestatam coram illis qui infestabant, constat ex significatione ‘clamare’ quod hic sit indignationem contestari, 1 nempe quod percussi sint, hoc est, ex injectis falsis laesi, et quod palea non daretur ad laterificandum, hoc est, quod modo ficticia et falsa reciperent et injicerent; et ex repraesentatione ‘Pharaonis’ quod sint qui infestant, de qua n. 6651, 6679, 6683, 7126.
Note a piè di pagina:
1. quia in indignatione fuerunt