Novokřesťanské studium Bible

Bible

 

Threni 1

Studie

1 PROLOGUS. Et factum est, postquam in captivitatem redactus est Israël, et Jerusalem deserta est, sedit Jeremias propheta flens, et planxit lamentatione hac in Jerusalem : et amaro animo suspirans et ejulans, dixit : ALEPH. Quomodo sedet sola civitas plena populo ! Facta est quasi vidua domina gentium ; princeps provinciarum facta est sub tributo.

2 BETH. Plorans ploravit in nocte, et lacrimæ ejus in maxillis ejus : non est qui consoletur eam, et omnibus caris ejus ; omnes amici ejus spreverunt eam, et facti sunt ei inimici.

3 GHIMEL. Migravit Judas propter afflictionem, et multitudinem servitutis ; habitavit inter gentes, nec invenit requiem : omnes persecutores ejus apprehenderunt eam inter angustias.

4 DALETH. Viæ Sion lugent, eo quod non sint qui veniant ad solemnitatem : omnes portæ ejus destructæ, sacerdotes ejus gementes ; virgines ejus squalidæ, et ipsa oppressa amaritudine.

5 HE. Facti sunt hostes ejus in capite ; inimici ejus locupletati sunt : quia Dominus locutus est super eam propter multitudinem iniquitatum ejus. Parvuli ejus ducti sunt in captivitatem ante faciem tribulantis.

6 VAU. Et egressus est a filia Sion omnis decor ejus ; facti sunt principes ejus velut arietes non invenientes pascua, et abierunt absque fortitudine ante faciem subsequentis.

7 ZAIN. Recordata est Jerusalem dierum afflictionis suæ, et prævaricationis, omnium desiderabilium suorum, quæ habuerat a diebus antiquis, cum caderet populus ejus in manu hostili, et non esset auxiliator : viderunt eam hostes, et deriserunt sabbata ejus.

8 HETH. Peccatum peccavit Jerusalem, propterea instabilis facta est ; omnes qui glorificabant eam spreverunt illam, quia viderunt ignominiam ejus : ipsa autem gemens conversa est retrorsum.

9 TETH. Sordes ejus in pedibus ejus, nec recordata est finis sui ; deposita est vehementer, non habens consolatorem. Vide, Domine, afflictionem meam, quoniam erectus est inimicus.

10 JOD. Manum suam misit hostis ad omnia desiderabilia ejus, quia vidit gentes ingressas sanctuarium suum, de quibus præceperas ne intrarent in ecclesiam tuam.

11 CAPH. Omnis populus ejus gemens, et quærens panem ; dederunt pretiosa quæque pro cibo ad refocillandam animam. Vide, Domine, et considera quoniam facta sum vilis !

12 LAMED. O vos omnes qui transitis per viam, attendite, et videte si est dolor sicut dolor meus ! quoniam vindemiavit me, ut locutus est Dominus, in die iræ furoris sui.

13 MEM. De excelso misit ignem in ossibus meis, et erudivit me : expandit rete pedibus meis, convertit me retrorsum ; posuit me desolatam, tota die mœrore confectam.

14 NUN. Vigilavit jugum iniquitatum mearum ; in manu ejus convolutæ sunt, et impositæ collo meo. Infirmata est virtus mea : dedit me Dominus in manu de qua non potero surgere.

15 SAMECH. Abstulit omnes magnificos meos Dominus de medio mei ; vocavit adversum me tempus ut contereret electos meos. Torcular calcavit Dominus virgini filiæ Juda.

16 AIN. Idcirco ego plorans, et oculus meus deducens aquas, quia longe factus est a me consolator, convertens animam meam. Facti sunt filii mei perditi, quoniam invaluit inimicus.

17 PHE. Expandit Sion manus suas ; non est qui consoletur eam. Mandavit Dominus adversum Jacob in circuitu ejus hostes ejus ; facta est Jerusalem quasi polluta menstruis inter eos.

18 SADE. Justus est Dominus, quia os ejus ad iracundiam provocavi. Audite, obsecro, universi populi, et videte dolorem meum : virgines meæ et juvenes mei abierunt in captivitatem.

19 COPH. Vocavi amicos meos, et ipsi deceperunt me ; sacerdotes mei et senes mei in urbe consumpti sunt, quia quæsierunt cibum sibi ut refocillarent animam suam.

20 RES. Vide, Domine, quoniam tribulor : conturbatus est venter meus, subversum est cor meum in memetipsa, quoniam amaritudine plena sum. Foris interfecit gladius, et domi mors similis est.

21 SIN. Audierunt quia ingemisco ego, et non est qui consoletur me ; omnes inimici mei audierunt malum meum, lætati sunt quoniam tu fecisti : adduxisti diem consolationis, et fient similes mei.

22 THAU. Ingrediatur omne malum eorum coram te : et vindemia eos, sicut vindemiasti me propter omnes iniquitates meas : multi enim gemitus mei, et cor meum mœrens.

Ze Swedenborgových děl

 

Coronis # 58

  
/ 60  
  

58. Status consummationis Ecclesiae Israeliticae describitur tam in Verbi historicis quam in ejus propheticis: in Verbi propheticis per enormia facta regum, primum Israelitarum et postea Judaeorum; per quos et sub quibus terra dicitur profanata: sed recensere illa non interest, quia nota sunt; duntaxat adducentur loca ex propheticis ubi agitur de consummatione et devastatione istius Ecclesiae. In his locis, per "Terram," "Zionem," "Hierosolymam," "Urbes," "Montes," "Colles," "Valles," "fluvios," similia quae supra (n. 55), significantur.

Ex propheticis Verbi sunt haec:

"Vidi terram, et ecce vacuum et inane, et versus caelos, et non lux eorum.....Vidi cum ecce Carmel desertum, et omnes urbes [ejus] desolatae sunt coram Jehovah.... Quia sic dixit Jehovah, Vastitas erit tota terra; consummationem tamen non faciam; propterea lugebit terra, et atrati erunt caeli desuper.....Tu ergo vastata, quid facies?" (Jeremias 4:23-31; cap. 5:10, 18;)

"Ascendit leo e vepreto suo, et perditor gentium...exivit e loco suo ad redigendum terram in vastitatem;....in die illo....peribit cor regis, et cor principum, et obstupescent sacerdotes" (Jeremias 4:7, 9);

"In die illo erit omnis locus, in quo fuerunt mille vites,....in senticetum et vepretum,....quia senticetum et vepretum tota terra" (Esaias 7:23, 24):

"Vox clamoris pastorum, et....potentium gregis, quia vastans Jehovah pascuum eorum 1 ; unde devastatae sunt caulae pacis. Jehovah deseruit tabernaculum suum, quia redacta est terra eorum in desolationem" (Jeremias 25:36-38);

"Sicut Schilo erit domus haec, et [urbs haec]" Hierosolyma "erit devastatio" (Jeremias 26:9; cap. 27:17);

Hierosolyma et omnes urbes Jehudae erunt desolatio et devastatio in die hoc;...."propter malitiam operum vestrorum,....facta est terra vestra in desolationem, in stuporem, et maledictionem" (Jeremias 44:2, 6, 22);

"Terram dabo devastationem, ideo quod praevaricati sunt praevaricationem" (Ezechiel 15:8);

"Devastabuntur in medio terrarum devastatarum, et urbes ejus in medio urbium desolatarum.....Tunc dabo fluvios aridam,....terram in manum malorum, vastaboque terram et plenitudinem ejus" (Ezechiel 30:7, 12);

"Obtegam, cum exstinxero te, caelos, et atrabo stellas eorum; solem nube obtegam, et luna non lucere faciet lumen suum; ....et dabo tenebras super terram,....cum adduxero confractionem tui" (Ezechiel 32:7-9);

similiter sicut Dominus praedixit de consummatione Ecclesiae Christianae hodiernae (Matthaeus 24:29).

"Dabo montem Seir in vastitatem et devastationem;.... vastitates aeternitatis dabo te" (Ezechiel 35:3, 4, 7, 9, 12, 14, 15).

"In die illo efferent super vos proverbium,....et dicent, Vastando vastati sumus" (Mich. 2:4 4 ).

"Timor et fovea contigit nobis, devastatio et confractio" (Thren. 3:41);

Mons Zionis "vastatus est" (Thren. 5:18);

"Consummata est iniquitas tua, filia Zionis" (Thren. 4:22).

"Vae genti peccatrici, [populo] gravi iniquitate;....provocarunt Sanctum Israelis.....A vola pedis usque ad caput non est integritas.....Terra vestra solitudo....Relicta est filia Zionis sicut tentorium in vinea,....sicut urbs obsessa" (Esaias 1:4-9, seq.);

"Quid facietis die visitationis et devastationis?....Consummatio est definita, inundata est justitia; nam 3 consummationem et decisionem Adonai Jehovih faciens in tota terra" (Esaias 10:3, 5 seq.,22, 23);

"Consummationem et decisionem audivi a cum Adonai Jehovih Zebaoth super universam terram 6 " (Esaias 28:22);

Propheta cecidit super facies et dixit, "Adonai Jehovih, consummationem Tu faciens reliquiis Israelis" (Ezechiel 11:13);

"Sanctuarium meum profanatum est, et terra Israelis devastata est" (Ezechiel 25:3);

Etiam [si] Noach, Daniel et Hiob fuerint "in medio ejus,....illi soli eripientur, terra autem fiet desolatio" (Ezechiel 14:16).

Ultimum consummationis Ecclesiae Israeliticae et Judaicae peractum est quando Dominus noster Salvator, postquam accepit spongiam aceti, super cruce exclamavit,

"Consummatum est" (Johannes 19:29, 30);

nam dicitur apud Davidem,

Dederunt in cibum meum fel, et in siti mea potarunt Me aceto;....sit habitatio eorum devastata" (Psalmuss 69:22, 26 [Biblia Anglia Psalmuss 69:21, 25]).

Et alibi:

"Sine causa occultarunt Mihi foveam retis, sine causa foderunt animae meae. Veniat ei devastatio, antequam sciat; ....in devastationem incidat.....Reduc animam meam a devastatoribus eorum, et a juvencis leonum unicam meam," hoc est, Ecclesiam (Psalmuss 35:7, 8, 17);

"Dabo 7 Hierosolymam in acervos, habitaculum draconum; urbes Jehudae redigam in vastitatem.....Ecce Ego cibans eos, populum hunc, absinthio; et potabo eos aquis fellis" (Jeremias 9:10-16 8 ).

Consummatio plenaria post hoc describitur apud Hoscham ita:

"Dies multos sedebunt filii Israelis; non rex, non princeps, non sacrificium, non statua, non ephodum, et non teraphim" (cap. 3:4).

Talis status illorum est hodie. Plura adducere non vacat. Citabuntur solum loca in quibus vastatio, desolatio, et consummatio hujus Ecclesiae adhuc nominantur:

Ut Esaias 9:13-21 9 ; cap. 22:4-14: Jeremias 7:31-34; cap.25:33; cap. 47:4: Ezechiel 13:14, 15; cap. 14:8, 15; cap. 19:7; cap. 25:12, 13; cap. 26:2; cap. xxix. [2] 9, 10, 12; cap. 32:12, 15: Joel 1:15-20; cap. 2:3; cap. 3:19 10 : Nahum 1:8, 9: Zephanias 1:15; cap. 2:9: Threni 1:16: Psalmuss 73:17-19: Psalmuss 74:3.

Devastati etiam vocantur "Confessi" (Ezechiel 11:6, 7; cap. 21:30, 34; cap. 26:6[, 15]; cap. 28:8, 23; cap. 31:17, 18; cap. 32:20, 21, 22, 23, 24, 28, 29, 30, 31, 32; cap. 35:8: Zeph. 2:12: Thren. 4:9: Psalmuss 69:26 11 ]; et alibi); "confessi" dicuntur, quia "gladius," per quem fit, significat falsum destruens verum.

Poznámky pod čarou:

1. This reference has been corrected to match chapter/verse numbering in the English Bible text.

2. This reference has been corrected to match chapter/verse numbering in the English Bible text.

3. This reference has been corrected to match chapter/verse numbering in the English Bible text.

4. This reference has been corrected; the printed Latin edition has xi. 4, but the phrase appears in ii. 4.

5. This reference has been corrected to match chapter/verse numbering in the English Bible text.

6. This reference has been corrected to match chapter/verse numbering in the English Bible text.

7. This reference has been corrected to match chapter/verse numbering in the English Bible text.

8. This reference has been corrected to match chapter/verse numbering in the English Bible text.

9. This reference has been corrected to match chapter/verse numbering in the English Bible text.

10. This reference has been corrected to match chapter/verse numbering in the English Bible text.

  
/ 60  
  

©2024 New Christian Bible Study Corporation. All rights reserved. Printed from newchristianbiblestudy.org