¹ ויעקב הלך לדרכו ויפגעו בו מלאכי אלהים׃

² ויאמר יעקב כאשר ראם מחנה אלהים זה ויקרא שם המקום ההוא מחנים׃

³ וישלח יעקב מלאכים לפניו אל עשו אחיו ארצה שעיר שדה אדום׃

⁴ ויצו אתם לאמר כה תאמרון לאדני לעשו כה אמר עבדך יעקב עם לבן גרתי ואחר עד עתה׃

⁵ ויהי לי שור וחמור צאן ועבד ושפחה ואשלחה להגיד לאדני למצא חן בעיניך׃

⁶ וישבו המלאכים אל יעקב לאמר באנו אל אחיך אל עשו וגם הלך לקראתך וארבע מאות איש עמו׃

⁷ ויירא יעקב מאד ויצר לו ויחץ את העם אשר אתו ואת הצאן ואת הבקר והגמלים לשני מחנות׃

⁸ ויאמר אם יבוא עשו אל המחנה האחת והכהו והיה המחנה הנשאר לפליטה׃

⁹ ויאמר יעקב אלהי אבי אברהם ואלהי אבי יצחק יהוה האמר אלי שוב לארצך ולמולדתך ואיטיבה עמך׃

¹⁰ קטנתי מכל החסדים ומכל האמת אשר עשית את עבדך כי במקלי עברתי את הירדן הזה ועתה הייתי לשני מחנות׃

¹¹ הצילני נא מיד אחי מיד עשו כי ירא אנכי אתו פן יבוא והכני אם על בנים׃

¹² ואתה אמרת היטב איטיב עמך ושמתי את זרעך כחול הים אשר לא יספר מרב׃

¹³ וילן שם בלילה ההוא ויקח מן הבא בידו מנחה לעשו אחיו׃

¹⁴ עזים מאתים ותישים עשרים רחלים מאתים ואילים עשרים׃

¹⁵ גמלים מיניקות ובניהם שלשים פרות ארבעים ופרים עשרה אתנת עשרים ועירם עשרה׃

¹⁶ ויתן ביד עבדיו עדר עדר לבדו ויאמר אל עבדיו עברו לפני ורוח תשימו בין עדר ובין עדר׃

¹⁷ ויצו את הראשון לאמר כי יפגשך עשו אחי ושאלך לאמר למי אתה ואנה תלך ולמי אלה לפניך׃

¹⁸ ואמרת לעבדך ליעקב מנחה הוא שלוחה לאדני לעשו והנה גם הוא אחרינו׃

¹⁹ ויצו גם את השני גם את השלישי גם את כל ההלכים אחרי העדרים לאמר כדבר הזה תדברון אל עשו במצאכם אתו׃

²⁰ ואמרתם גם הנה עבדך יעקב אחרינו כי אמר אכפרה פניו במנחה ההלכת לפני ואחרי כן אראה פניו אולי ישא פני׃

²¹ ותעבר המנחה על פניו והוא לן בלילה ההוא במחנה׃

²² ויקם בלילה הוא ויקח את שתי נשיו ואת שתי שפחתיו ואת אחד עשר ילדיו ויעבר את מעבר יבק׃

²³ ויקחם ויעברם את הנחל ויעבר את אשר לו׃

²⁴ ויותר יעקב לבדו ויאבק איש עמו עד עלות השחר׃

²⁵ וירא כי לא יכל לו ויגע בכף ירכו ותקע כף ירך יעקב בהאבקו עמו׃

²⁶ ויאמר שלחני כי עלה השחר ויאמר לא אשלחך כי אם ברכתני׃

²⁷ ויאמר אליו מה שמך ויאמר יעקב׃

²⁸ ויאמר לא יעקב יאמר עוד שמך כי אם ישראל כי שרית עם אלהים ועם אנשים ותוכל׃

²⁹ וישאל יעקב ויאמר הגידה נא שמך ויאמר למה זה תשאל לשמי ויברך אתו שם׃

³⁰ ויקרא יעקב שם המקום פניאל כי ראיתי אלהים פנים אל פנים ותנצל נפשי׃

³¹ ויזרח לו השמש כאשר עבר את פנואל והוא צלע על ירכו׃

³² על כן לא יאכלו בני ישראל את גיד הנשה אשר על כף הירך עד היום הזה כי נגע בכף ירך יעקב בגיד הנשה׃

¹ ואלה תלדות עשו הוא אדום׃

² עשו לקח את נשיו מבנות כנען את עדה בת אילון החתי ואת אהליבמה בת ענה בת צבעון החוי׃

³ ואת בשמת בת ישמעאל אחות נביות׃

⁴ ותלד עדה לעשו את אליפז ובשמת ילדה את רעואל׃

⁵ ואהליבמה ילדה את יעיש ואת יעלם ואת קרח אלה בני עשו אשר ילדו לו בארץ כנען׃

⁶ ויקח עשו את נשיו ואת בניו ואת בנתיו ואת כל נפשות ביתו ואת מקנהו ואת כל בהמתו ואת כל קנינו אשר רכש בארץ כנען וילך אל ארץ מפני יעקב אחיו׃

⁷ כי היה רכושם רב משבת יחדו ולא יכלה ארץ מגוריהם לשאת אתם מפני מקניהם׃

⁸ וישב עשו בהר שעיר עשו הוא אדום׃

⁹ ואלה תלדות עשו אבי אדום בהר שעיר׃

¹⁰ אלה שמות בני עשו אליפז בן עדה אשת עשו רעואל בן בשמת אשת עשו׃

¹¹ ויהיו בני אליפז תימן אומר צפו וגעתם וקנז׃

¹² ותמנע היתה פילגש לאליפז בן עשו ותלד לאליפז את עמלק אלה בני עדה אשת עשו׃

¹³ ואלה בני רעואל נחת וזרח שמה ומזה אלה היו בני בשמת אשת עשו׃

¹⁴ ואלה היו בני אהליבמה בת ענה בת צבעון אשת עשו ותלד לעשו את יעיש ואת יעלם ואת קרח׃

¹⁵ אלה אלופי בני עשו בני אליפז בכור עשו אלוף תימן אלוף אומר אלוף צפו אלוף קנז׃

¹⁶ אלוף קרח אלוף געתם אלוף עמלק אלה אלופי אליפז בארץ אדום אלה בני עדה׃

¹⁷ ואלה בני רעואל בן עשו אלוף נחת אלוף זרח אלוף שמה אלוף מזה אלה אלופי רעואל בארץ אדום אלה בני בשמת אשת עשו׃

¹⁸ ואלה בני אהליבמה אשת עשו אלוף יעוש אלוף יעלם אלוף קרח אלה אלופי אהליבמה בת ענה אשת עשו׃

¹⁹ אלה בני עשו ואלה אלופיהם הוא אדום׃

²⁰ אלה בני שעיר החרי ישבי הארץ לוטן ושובל וצבעון וענה׃

²¹ ודשון ואצר ודישן אלה אלופי החרי בני שעיר בארץ אדום׃

²² ויהיו בני לוטן חרי והימם ואחות לוטן תמנע׃

²³ ואלה בני שובל עלון ומנחת ועיבל שפו ואונם׃

²⁴ ואלה בני צבעון ואיה וענה הוא ענה אשר מצא את הימם במדבר ברעתו את החמרים לצבעון אביו׃

²⁵ ואלה בני ענה דשן ואהליבמה בת ענה׃

²⁶ ואלה בני דישן חמדן ואשבן ויתרן וכרן׃

²⁷ אלה בני אצר בלהן וזעון ועקן׃

²⁸ אלה בני דישן עוץ וארן׃

²⁹ אלה אלופי החרי אלוף לוטן אלוף שובל אלוף צבעון אלוף ענה׃

³⁰ אלוף דשן אלוף אצר אלוף דישן אלה אלופי החרי לאלפיהם בארץ שעיר׃

³¹ ואלה המלכים אשר מלכו בארץ אדום לפני מלך מלך לבני ישראל׃

³² וימלך באדום בלע בן בעור ושם עירו דנהבה׃

³³ וימת בלע וימלך תחתיו יובב בן זרח מבצרה׃

³⁴ וימת יובב וימלך תחתיו חשם מארץ התימני׃

³⁵ וימת חשם וימלך תחתיו הדד בן בדד המכה את מדין בשדה מואב ושם עירו עוית׃

³⁶ וימת הדד וימלך תחתיו שמלה ממשרקה׃

³⁷ וימת שמלה וימלך תחתיו שאול מרחבות הנהר׃

³⁸ וימת שאול וימלך תחתיו בעל חנן בן עכבור׃

³⁹ וימת בעל חנן בן עכבור וימלך תחתיו הדר ושם עירו פעו ושם אשתו מהיטבאל בת מטרד בת מי זהב׃

⁴⁰ ואלה שמות אלופי עשו למשפחתם למקמתם בשמתם אלוף תמנע אלוף עלוה אלוף יתת׃

⁴¹ אלוף אהליבמה אלוף אלה אלוף פינן׃

⁴² אלוף קנז אלוף תימן אלוף מבצר׃

⁴³ אלוף מגדיאל אלוף עירם אלה אלופי אדום למשבתם בארץ אחזתם הוא עשו אבי אדום׃