¹ ויהי בימי אמרפל מלך שנער אריוך מלך אלסר כדרלעמר מלך עילם ותדעל מלך גוים׃

² עשו מלחמה את ברע מלך סדם ואת ברשע מלך עמרה שנאב מלך אדמה ושמאבר מלך צביים ומלך בלע היא צער׃

³ כל אלה חברו אל עמק השדים הוא ים המלח׃

⁴ שתים עשרה שנה עבדו את כדרלעמר ושלש עשרה שנה מרדו׃

⁵ ובארבע עשרה שנה בא כדרלעמר והמלכים אשר אתו ויכו את רפאים בעשתרת קרנים ואת הזוזים בהם ואת האימים בשוה קריתים׃

⁶ ואת החרי בהררם שעיר עד איל פארן אשר על המדבר׃

⁷ וישבו ויבאו אל עין משפט הוא קדש ויכו את כל שדה העמלקי וגם את האמרי הישב בחצצן תמר׃

⁸ ויצא מלך סדם ומלך עמרה ומלך אדמה ומלך צביים ומלך בלע הוא צער ויערכו אתם מלחמה בעמק השדים׃

⁹ את כדרלעמר מלך עילם ותדעל מלך גוים ואמרפל מלך שנער ואריוך מלך אלסר ארבעה מלכים את החמשה׃

¹⁰ ועמק השדים בארת בארת חמר וינסו מלך סדם ועמרה ויפלו שמה והנשארים הרה נסו׃

¹¹ ויקחו את כל רכש סדם ועמרה ואת כל אכלם וילכו׃

¹² ויקחו את לוט ואת רכשו בן אחי אברם וילכו והוא ישב בסדם׃

¹³ ויבא הפליט ויגד לאברם העברי והוא שכן באלני ממרא האמרי אחי אשכל ואחי ענר והם בעלי ברית אברם׃

¹⁴ וישמע אברם כי נשבה אחיו וירק את חניכיו ילידי ביתו שמנה עשר ושלש מאות וירדף עד דן׃

¹⁵ ויחלק עליהם לילה הוא ועבדיו ויכם וירדפם עד חובה אשר משמאל לדמשק׃

¹⁶ וישב את כל הרכש וגם את לוט אחיו ורכשו השיב וגם את הנשים ואת העם׃

¹⁷ ויצא מלך סדם לקראתו אחרי שובו מהכות את כדר לעמר ואת המלכים אשר אתו אל עמק שוה הוא עמק המלך׃

¹⁸ ומלכי צדק מלך שלם הוציא לחם ויין והוא כהן לאל עליון׃

¹⁹ ויברכהו ויאמר ברוך אברם לאל עליון קנה שמים וארץ׃

²⁰ וברוך אל עליון אשר מגן צריך בידך ויתן לו מעשר מכל׃

²¹ ויאמר מלך סדם אל אברם תן לי הנפש והרכש קח לך׃

²² ויאמר אברם אל מלך סדם הרימתי ידי אל יהוה אל עליון קנה שמים וארץ׃

²³ אם מחוט ועד שרוך נעל ואם אקח מכל אשר לך ולא תאמר אני העשרתי את אברם׃

²⁴ בלעדי רק אשר אכלו הנערים וחלק האנשים אשר הלכו אתי ענר אשכל וממרא הם יקחו חלקם׃

¹ כי זה מלכי צדק מלך שלם כהן לאל עליון אשר יצא לקראת אברהם בשובו מהכות את המלכים ויברכהו׃

² ואשר חלק לו אברהם מעשר מכל שמו יפרש מלך הצדק ועוד מלך שלם הוא מלך השלום׃

³ באין אב באין אם באין יחש ולימיו אין תחלה ולחייו אין סוף כי אם נדמה לבן האלהים הוא עומד בכהנתו לנצח׃

⁴ ראו עתה מה גדול הוא אשר גם אברהם אבינו נתן לו מעשר מראשית השלל׃

⁵ הן אלה מבני לוי אשר נחלי את הכהנה יש להם חק על פי התורה לקחת את המעשרות מן העם מן אחיהם אשר אף הם יצאי ירך אברהם׃

⁶ ואשר איננו מתיחש למשפחתם הוא לקח את המעשר מן אברהם ויברך את אשר היתה לו ההבטחה׃

⁷ והנה נכון הדבר כי הקטן יברך על ידי הגדול ממנו׃

⁸ ופה בני אדם שימותו לקחים את המעשר אבל שם לקחו מי שהועד עליו כי הוא חי׃

⁹ ויתכן לומר כי גם לוי הלקח את המעשרות היה מעשר בעשר אברהם׃

¹⁰ כי עוד בירך האב היה בצאת מלכי צדק לקראתו׃

¹¹ על כן אלו היתה שלמות על ידי כהנת בני לוי אשר בה נתנה התורה לעם למה זה צריך לקום עוד כהן אחר על דברתי מלכי צדק ולא יאמר על דברתי אהרן׃

¹² כי בהשתנות הכהנה מן הצרך שתשתנה גם התורה׃

¹³ כי אשר מדבר בו כזאת הוא משבט אחר אשר מעולם לא שרת איש ממנו את המזבח׃

¹⁴ כי גלוי לכל אשר אדנינו זרח מיהודה מן השבט אשר משה לא דבר אליו דבר על הכהנה׃

¹⁵ ועוד יותר ברור הוא אם יוקם על דמיון מלכי צדק כהן אחר׃

¹⁶ אשר איננו על פי חקת בשר ודם אלא על פי כח חיים בלתי נפסקים׃

¹⁷ כי העיד עליו אתה כהן לעולם על דברתי מלכי צדק׃

¹⁸ בעבור כי המצוה הקדמת הוסרה בהיותה חלושה וקצרת יד מהועיל׃

¹⁹ כי התורה לא השלימה דבר והנה נכנסה במקומה תקוה טובה ממנה אשר נקרב על ידה לאלהים׃

²⁰ וכפי אשר לא היתה זאת בלי שבועה׃

²¹ כי המה נתכהנו בלי שבועה וזה בשבועה על ידי האמר לו נשבע יהוה ולא ינחם אתה כהן לעולם על דברתי מלכי צדק׃

²² גם הברית טובה ויתרה היא אשר ישוע ערב אותה׃

²³ ושם נתכהנו רבים מפני אשר המות לא הניחם להותר בארץ׃

²⁴ אבל זה בעמדו לעולם יש לו כהנה אשר לא תעבר ממנו׃

²⁵ אשר על כן יוכל גם להושיע בכל וכל את הנגשים על ידו לאלהים כי חי הוא תמיד להפגיע בעדם׃

²⁶ כי נאוה לנו כהן כזה שהוא חסיד ותמים וטהור ונבדל מן החטאים ונשא מהשמים׃

²⁷ אשר איננו צריך יום יום ככהנים הגדולים ההם להקריב בראשונה על חטאתיו ואחרי כן על חטאת העם כי זאת עשה בפעם אחת בהקריבו את נפשו׃

²⁸ כי התורה העמידה לכהנים גדולים בני אדם חלשים אבל דבר השבועה הבאה אחרי התורה העמיד את הבן המשלם לעולם׃