¹ לא תשא שמע שוא אל תשת ידך עם רשע להית עד חמס׃

² לא תהיה אחרי רבים לרעת ולא תענה על רב לנטת אחרי רבים להטת׃

³ ודל לא תהדר בריבו׃

⁴ כי תפגע שור איבך או חמרו תעה השב תשיבנו לו׃

⁵ כי תראה חמור שנאך רבץ תחת משאו וחדלת מעזב לו עזב תעזב עמו׃

⁶ לא תטה משפט אבינך בריבו׃

⁷ מדבר שקר תרחק ונקי וצדיק אל תהרג כי לא אצדיק רשע׃

⁸ ושחד לא תקח כי השחד יעור פקחים ויסלף דברי צדיקים׃

⁹ וגר לא תלחץ ואתם ידעתם את נפש הגר כי גרים הייתם בארץ מצרים׃

¹⁰ ושש שנים תזרע את ארצך ואספת את תבואתה׃

¹¹ והשביעת תשמטנה ונטשתה ואכלו אביני עמך ויתרם תאכל חית השדה כן תעשה לכרמך לזיתך׃

¹² ששת ימים תעשה מעשיך וביום השביעי תשבת למען ינוח שורך וחמרך וינפש בן אמתך והגר׃

¹³ ובכל אשר אמרתי אליכם תשמרו ושם אלהים אחרים לא תזכירו לא ישמע על פיך׃

¹⁴ שלש רגלים תחג לי בשנה׃

¹⁵ את חג המצות תשמר שבעת ימים תאכל מצות כאשר צויתך למועד חדש האביב כי בו יצאת ממצרים ולא יראו פני ריקם׃

¹⁶ וחג הקציר בכורי מעשיך אשר תזרע בשדה וחג האסף בצאת השנה באספך את מעשיך מן השדה׃

¹⁷ שלש פעמים בשנה יראה כל זכורך אל פני האדן יהוה׃

¹⁸ לא תזבח על חמץ דם זבחי ולא ילין חלב חגי עד בקר׃

¹⁹ ראשית בכורי אדמתך תביא בית יהוה אלהיך לא תבשל גדי בחלב אמו׃

²⁰ הנה אנכי שלח מלאך לפניך לשמרך בדרך ולהביאך אל המקום אשר הכנתי׃

²¹ השמר מפניו ושמע בקלו אל תמר בו כי לא ישא לפשעכם כי שמי בקרבו׃

²² כי אם שמע תשמע בקלו ועשית כל אשר אדבר ואיבתי את איביך וצרתי את צרריך׃

²³ כי ילך מלאכי לפניך והביאך אל האמרי והחתי והפרזי והכנעני החוי והיבוסי והכחדתיו׃

²⁴ לא תשתחוה לאלהיהם ולא תעבדם ולא תעשה כמעשיהם כי הרס תהרסם ושבר תשבר מצבתיהם׃

²⁵ ועבדתם את יהוה אלהיכם וברך את לחמך ואת מימיך והסרתי מחלה מקרבך׃

²⁶ לא תהיה משכלה ועקרה בארצך את מספר ימיך אמלא׃

²⁷ את אימתי אשלח לפניך והמתי את כל העם אשר תבא בהם ונתתי את כל איביך אליך ערף׃

²⁸ ושלחתי את הצרעה לפניך וגרשה את החוי את הכנעני ואת החתי מלפניך׃

²⁹ לא אגרשנו מפניך בשנה אחת פן תהיה הארץ שממה ורבה עליך חית השדה׃

³⁰ מעט מעט אגרשנו מפניך עד אשר תפרה ונחלת את הארץ׃

³¹ ושתי את גבלך מים סוף ועד ים פלשתים וממדבר עד הנהר כי אתן בידכם את ישבי הארץ וגרשתמו מפניך׃

³² לא תכרת להם ולאלהיהם ברית׃

³³ לא ישבו בארצך פן יחטיאו אתך לי כי תעבד את אלהיהם כי יהיה לך למוקש׃

¹ למנצח משכיל לבני קרח כאיל תערג על אפיקי מים כן נפשי תערג אליך אלהים׃

² צמאה נפשי לאלהים לאל חי מתי אבוא ואראה פני אלהים׃

³ היתה לי דמעתי לחם יומם ולילה באמר אלי כל היום איה אלהיך׃

⁴ אלה אזכרה ואשפכה עלי נפשי כי אעבר בסך אדדם עד בית אלהים בקול רנה ותודה המון חוגג׃

⁵ מה תשתוחחי נפשי ותהמי עלי הוחילי לאלהים כי עוד אודנו ישועות פניו׃

⁶ אלהי עלי נפשי תשתוחח על כן אזכרך מארץ ירדן וחרמונים מהר מצער׃

⁷ תהום אל תהום קורא לקול צנוריך כל משבריך וגליך עלי עברו׃

⁸ יומם יצוה יהוה חסדו ובלילה שירה עמי תפלה לאל חיי׃

⁹ אומרה לאל סלעי למה שכחתני למה קדר אלך בלחץ אויב׃

¹⁰ ברצח בעצמותי חרפוני צוררי באמרם אלי כל היום איה אלהיך׃

¹¹ מה תשתוחחי נפשי ומה תהמי עלי הוחילי לאלהים כי עוד אודנו ישועת פני ואלהי׃