¹ לא יבא פצוע דכא וכרות שפכה בקהל יהוה׃

² לא יבא ממזר בקהל יהוה גם דור עשירי לא יבא לו בקהל יהוה׃

³ לא יבא עמוני ומואבי בקהל יהוה גם דור עשירי לא יבא להם בקהל יהוה עד עולם׃

⁴ על דבר אשר לא קדמו אתכם בלחם ובמים בדרך בצאתכם ממצרים ואשר שכר עליך את בלעם בן בעור מפתור ארם נהרים לקללך׃

⁵ ולא אבה יהוה אלהיך לשמע אל בלעם ויהפך יהוה אלהיך לך את הקללה לברכה כי אהבך יהוה אלהיך׃

⁶ לא תדרש שלמם וטבתם כל ימיך לעולם׃

⁷ לא תתעב אדמי כי אחיך הוא לא תתעב מצרי כי גר היית בארצו׃

⁸ בנים אשר יולדו להם דור שלישי יבא להם בקהל יהוה׃

⁹ כי תצא מחנה על איביך ונשמרת מכל דבר רע׃

¹⁰ כי יהיה בך איש אשר לא יהיה טהור מקרה לילה ויצא אל מחוץ למחנה לא יבא אל תוך המחנה׃

¹¹ והיה לפנות ערב ירחץ במים וכבא השמש יבא אל תוך המחנה׃

¹² ויד תהיה לך מחוץ למחנה ויצאת שמה חוץ׃

¹³ ויתד תהיה לך על אזנך והיה בשבתך חוץ וחפרתה בה ושבת וכסית את צאתך׃

¹⁴ כי יהוה אלהיך מתהלך בקרב מחנך להצילך ולתת איביך לפניך והיה מחניך קדוש ולא יראה בך ערות דבר ושב מאחריך׃

¹⁵ לא תסגיר עבד אל אדניו אשר ינצל אליך מעם אדניו׃

¹⁶ עמך ישב בקרבך במקום אשר יבחר באחד שעריך בטוב לו לא תוננו׃

¹⁷ לא תהיה קדשה מבנות ישראל ולא יהיה קדש מבני ישראל׃

¹⁸ לא תביא אתנן זונה ומחיר כלב בית יהוה אלהיך לכל נדר כי תועבת יהוה אלהיך גם שניהם׃

¹⁹ לא תשיך לאחיך נשך כסף נשך אכל נשך כל דבר אשר ישך׃

²⁰ לנכרי תשיך ולאחיך לא תשיך למען יברכך יהוה אלהיך בכל משלח ידך על הארץ אשר אתה בא שמה לרשתה׃

²¹ כי תדר נדר ליהוה אלהיך לא תאחר לשלמו כי דרש ידרשנו יהוה אלהיך מעמך והיה בך חטא׃

²² וכי תחדל לנדר לא יהיה בך חטא׃

²³ מוצא שפתיך תשמר ועשית כאשר נדרת ליהוה אלהיך נדבה אשר דברת בפיך׃

²⁴ כי תבא בכרם רעך ואכלת ענבים כנפשך שבעך ואל כליך לא תתן׃

²⁵ כי תבא בקמת רעך וקטפת מלילת בידך וחרמש לא תניף על קמת רעך׃