¹ Auxskultu tion, ho pastroj, atentu, ho domo de Izrael, kaj prenu en viajn orelojn, ho regxa domo; cxar vin trafos jugxo pro tio, ke vi estis kaptilo en Micpa kaj etendita reto sur Tabor.

² Per premado ili profundigis la pekojn; Mi punos cxiujn.

³ Mi konas Efraimon, kaj Izrael ne estas kasxita antaux Mi:vi nun malcxastas, ho Efraim, kaj Izrael malpurigxis.

⁴ Iliaj agoj ne permesas al ili reveni al ilia Dio, cxar spirito de malcxasteco estas en ili kaj la Eternulon ili ne konas.

⁵ La malmodesteco de Izrael parolas kontraux li antaux lia vizagxo; tial Izrael kaj Efraim falos pro siaj malbonagoj; ankaux Jehuda falos kun ili.

⁶ Kun siaj sxafoj kaj bovoj ili iros sercxi la Eternulon, sed ne trovos; Li forigxis de ili.

⁷ Ili perfidis al la Eternulo, kaj naskis fremdajn infanojn; tial ekstermos ilin la monato kune kun ilia havajxo.

⁸ Blovu per korno en Gibea, per trumpeto en Rama; bruu en Bet-Aven, post vi, ho Benjamen!

⁹ Efraim farigxos dezerto en la tago de la puno; inter la triboj de Izrael Mi avertis fidele.

¹⁰ La princoj de Jehuda farigxis similaj al forsxovantoj de limo; Mi elversxos sur ilin Mian koleron kiel akvon.

¹¹ Efraim estas premata, frapita de la jugxo; cxar li memvole sekvis homan ordonon.

¹² Mi estos por Efraim kiel tineo, kiel putro por la domo de Jehuda.

¹³ Efraim vidis sian malsanon, kaj Jehuda sian vundon; tiam Efraim iris al Asirio, kaj sendis al regxo, kiu vengxus pro li; sed li ne povas sanigi vin, ne forigos de vi la vundon.

¹⁴ CXar Mi estas kiel leono por Efraim, kiel leonido por la domo de Jehuda; Mi, Mi dissxiros kaj foriros; Mi forportos, kaj neniu povos savi.

¹⁵ Mi iros returne sur Mian lokon, gxis ili konfesos sian kulpon kaj sercxos Mian vizagxon; kiam ili suferos, ili Min sercxos, kaj diros:

¹ Malvera pesilo estas abomenajxo por la Eternulo; Sed plena pezo placxas al Li.

² Se venis malhumileco, venos ankaux honto; Sed cxe la humiluloj estas sagxo.

³ La senkulpeco de la piuloj gvidos ilin; Sed la falsemo pereigos la maliculojn.

⁴ Ne helpos ricxo en la tago de kolero; Sed bonfaremo savas de morto.

⁵ La justeco de piulo ebenigas lian vojon; Sed malpiulo falos per sia malpieco.

⁶ La justeco de piuloj savos ilin; Sed la pasio de maliculoj ilin kaptos.

⁷ Kiam mortas homo pia, ne pereas lia espero; Sed la atendo de la pekuloj pereas.

⁸ Piulo estas savata kontraux mizero, Kaj malpiulo venas sur lian lokon.

⁹ Per la busxo de hipokritulo difektigxas lia proksimulo; Sed per kompreno piuloj savigxas.

¹⁰ Kiam al la piuloj estas bone, la urbo gxojas; Kaj kiam pereas malpiuloj, gxi estas gaja.

¹¹ Per la beno de piuloj urbo altigxas; Kaj per la busxo de malpiuloj gxi ruinigxas.

¹² Kiu mokas sian proksimulon, tiu estas malsagxulo; Sed homo prudenta silentas.

¹³ Kiu iras kun kalumnioj, tiu elperfidas sekreton; Sed kiu havas fidelan spiriton, tiu konservas aferon.

¹⁴ CXe manko de prikonsiligxo popolo pereas; Sed cxe multe da konsilantoj estas bonstato.

¹⁵ Malbonon faras al si tiu, kiu garantias por fremdulo; Sed kiu malamas donadon de mano, tiu estas ekster dangxero.

¹⁶ Aminda virino akiras honoron, Kaj potenculoj akiras ricxon.

¹⁷ Bonkora homo donos bonon al sia animo, Kaj kruelulo detruas sian karnon.

¹⁸ Malvirtulo akiras profiton malveran, Kaj la semanto de virto veran rekompencon.

¹⁹ Bonfarado kondukas al vivo; Kaj kiu celas malbonon, tiu iras al sia morto.

²⁰ Abomenajxo por la Eternulo estas la malickoruloj; Sed placxas al Li tiuj, kiuj iras vojon pian.

²¹ Oni povas esti certa, ke malvirtulo ne restos senpuna; Sed la idaro de virtuloj estos savita.

²² Kiel ora ringo sur la nazo de porko, Tiel estas virino bela, sed malbonkonduta.

²³ La deziro de virtuloj estas nur bono; Sed malvirtuloj povas esperi nur koleron.

²⁴ Unu disdonas, kaj ricxigxas cxiam pli; Alia tro avaras, kaj tamen nur malricxigxas.

²⁵ Animo benanta gxuos bonstaton; Kaj kiu trinkigas, tiu mem havos suficxe por trinki.

²⁶ Kiu retenas grenon, tiun malbenas la popolo; Sed beno venas sur la kapon de tiu, kiu disdonas.

²⁷ Kiu celas bonon, tiu atingos placxon; Sed kiu sercxas malbonon, tiun gxi trafos.

²⁸ Kiu fidas sian ricxecon, tiu falos; Sed virtuloj floros kiel juna folio.

²⁹ Kiu detruas sian domon, tiu heredos venton; Kaj malsagxulo estas sklavo de sagxulo.

³⁰ La frukto de virtulo estas arbo de vivo; Kaj akiranto de animoj estas sagxulo.

³¹ Se virtulo ricevas redonon sur la tero, Tiom pli malvirtulo kaj pekulo!