Hlazy 66

¹ Zawpi zydua saih u, Khazohpa lâta thaphana pyu parosa ula;

² ano moh rôhnah zie cha hla ta sa ula; a reithaina cha parôhnahsa teh u!

³ Khazohpa lâta, “Na hmotaopazy cha a rarôh y kaw dia! Na hmotaotheina rôhnah zie vâta nama khakhaipa zy cha nâ lâta ama panawhsa aw.

⁴ Zawpi zydua ta châ chhy aw ei ta; nâma reithaipa ta sa aw ei ta, na moh reithaipa ta ama sa aw,” tah ei ta. Selah

⁵ A vy ula, Khazohpa hmotaopa zy he moh teh u; chyhsa sawzy chôta a hmotaopa liana heta a rarôh a y na.

⁶ Ano chata tilaipi kha alei hipa lâta pachâsa ta; vapi kha phei ta sie haw ei ta. Cha liana cha ano liata thaphapa ta y pi ta,

⁷ a hmotaotheina chata chhâzaw ryurei ta, a mo ta phopizy a moh tyh, aty hmâhpa zy cha a palyupalih khah ei se. Selah

⁸ Hy mo to saih u, eima Khazohpa cha reithai ula, ano reithaina pyu cha patheisa teh u,

⁹ ano chata eima hrona he pahro thlâh ha ta, eima pheizy he pasie pasaih vei.

¹⁰ Hy Khazohpa, nâ ta maniah pasia chi ta, tâkâri pasiapa hawhta maniah pasia chi ta.

¹¹ Nâ ta sao liata maniah chhihtha chi ta; eima chai liana heta phao hri ngaitapa pahnieh chi ta;

¹² chyhsa zy eima luh chô liata pasiesa chi ta; mei nata ti sie pahlie pi ta; châhrasala su pha ngaitapa liata a ngia awpa ta maniah a chhi haw chi ta.

¹³ Raona hlâna zy chhaota na o liata a ngia aw na ta; ei chhiesakhâhna zy cha nâ liata ei patlô aw,

¹⁴ ei hmao ta reih ta, Nôpopa ta ei y nota ei pakah ta a reihpazy cha.

¹⁵ Sâh thawhpa raona hlâna zy nâ lâta hlâ aw na ta, mietahkupa tôhpa raopa rohpahâhpa chhaota; viahchao tôhpa zy, mie zy chhaota ei hlâ aw. Selah

¹⁶ A vy ula, Khazohpa a chipa zydua saih u, thei teh u, chatanachata ei hrona chata a hmotaopa cha ei cha pahnosa aw ei.

¹⁷ ano cha ei pakah ta aw na ta, ei paleih ta palyupalihpa ta y ta.

¹⁸ Ei pathipalôh ta moleina ei pachâ kaw khiahtala, ABEIPA ta na thei aw vei.

¹⁹ Châhrasala Khazohpa ta na thei hmeihseih ta; ei thlahchhâna ao cha a pachâ.

²⁰ Khazohpa, ei thlahchhâna a heisaih leipa, kei liata a zawngiahna a bâh beih leipa cha reithaipa ta y mawh sy!