Hlazy 51

Studie

          |

1 Hy Khazohpa, na kyhpachâ ngiachhiena lymâ hawhta na ngiachhie la; na zawngiahna thaphana lymâ hawhta ei paraona zy he pahlei khai mah y.

2 Ei hmoparaona tawhtapa liahsa na pasi khai ha la, ei moleina tawhtapa chhao na pathaihsa mah y!

3 Ei paraona zy he pahno haw tlôh na ta, ei moleina he ei hmiakô liata khâ y tyh ta.

4 Na chô liata, nâma dei chô liata, ei molei haw, na mohmô liata hmo moleina tao haw na ta, bie na rei nota thai na châ theipa ta, na pachia nota seina hnei leipa ta na châ thei nawpa ta.

5 Hmoparaona liata taopa ta y na ta, ei nô ta moleina ta na phaoh ta.

6 Chhôh lâ liana zy heta hmeihseihna khoh chi ta; â lâ leipa lâna heta eina pahnosa aw chi.

7 Hisaw ta na pasi la, ei pathai aw; na pathai la, dâhaw hlâta ei ngyu aw.

8 Thaphana nata alyna cha na pabie mah y; ru na thliepa zy he a tha a pha thei nawpa ta.

9 Ei moleina zy tawhna heta na hmia nyu la, ei hmoparaona zydua he pahlei khai mah y.

10 “Hy Khazohpa, keima liana heta pathipalôh pathaihpa tao la, ei chhôh liana heta thlahpa a dopa tao pathi heih mah y.

11 Na hmiakô tawhtapa he na thy leipa la, na Thlahpa Pathaihpa he na lapa kha y.

12 Na pachhana thaphana cha na pie heih la, thlahpa khona ta na patu thlâh ha mah y.

13 Chatanachata paraotuhpa zy cha na lâpi THÂTIHZY pachu aw na ta, moleipa zy cha nâ lâta amâ heih heih aw.

14 Hy Khazohpa, nâ, ei pachhana Khazohpa, thisaih palona zy tawhta na pachha mah y, chatanachata ei palei heta na siana kyh he thaphapa ta hla ta a sa aw.

15 Hy ABEIPA, nâ ta ei hmao he na pa-âsa la, chatanachata ei pakah he na reithaina cha a pahnosa aw.

16 Atheihna chô liata alyna hnei tlôh leipa chi ta; chata châ vei sala ei cha pie aw, raopa hlâna chô liata palôh châna rai hnei va chi.

17 Khazohpa kho viapa atheihna zy cha thlahpa palôh chhiepa he a châ; hy Khazohpa, pathipalôh chhiepa nata ngiachhiepa he mohnao aw va chi.

18 Na khozie hawh tlaita Zaio chô liata hmophapa tao la; Zerusale kuh dôhna zy cha sa mah y,

19 chatanachata siana atheihna zy chô liata alyna hnei ha aw chi ta, raopa hlâna nata raopa pôhpa hlâna chô liana chata; chatanachata na maisâh chô liana chata viahchao tôhpa zy ama hlâ ha aw.

Scroll to see more.