Malureina 21

¹ Kana mo Arada abeipa Neke liata a ypa chata Izarel chyhsazy Athari lâpi lâta ama vaw sie tahpa, thei ta, Izarel chyhsazy cha a dyuh ta, sei ta patu ta.

² Izarel mozy chata ABEIPA hnohta chhie a sakhâh ei ta, “He chyhsazy he eima ku liata maniah na pie khiahtala ama khihzy he liahsa eima pahleipadia aw na,” tah ei ta.

³ ABEIPA ta Izarel mozy bie cha a pyh ta, Kana mozy cha pie ta; âmo nata ama khihzy cha liahsa pahleipadia haw ei ta; a su moh ta Hôma* bi ei ta.

⁴ Hawra Tlâh tawhna chata Tilaipi Saihpa lâta Edôma râh chahlôpa ta sie ei ta; a lâpi vâta zawpizy palôhrupa cha ama palôh châ leipa ta y ta.

⁵ Zawpizy chata Khazohpa nata Mawsi ei pata, “Râhpathohpa liata thi awpa ta khazia ma Izi râh tawhtapa maniah nama papua? Viahchhâ y va, ti chhao y va, he viahchhâ pasichhihpa chhao he eima hrona ta a pasi,” tah ei ta.

⁶ Chatanachata ABEIPA ta zawpi hry liana chata parih pachu pasapa tuah ta, zawpizy pachu ta, Izarel mozy a hluhpi thi ei ta.

⁷ Zawpizy cha Mawsi lâta vawh ei ta, “ABEIPA nata nâma ei pata bie eima vaw reih hawpa he, eima molei ha na; eima hry liata parihzy he pahlei awpa ta ABEIPA lâta thlahchhâ teh,” tah ei ta. Chatanachata zawpizy chata Mawsi ta thlahchhâpa ta.

⁸ ABEIPA ta Mawsi hnohta, “Parih pachu pasapa a nohthlapa tao la, a tôh liata chaluah teh; parih pachupa maihta cha cha ama moh khiahtala ama hroh aw,” tah ta.

⁹ Chatanachata Mawsi ta dawh parih tao ta, a tôh liata bangie ta; parih a pachupa maihta, dawh parih cha ama moh nahta hroh lymâ ei ta.

¹⁰ Izarel pathlazy cha sie lymâ ei ta, Ôbô liata ariena su tao ei ta.

¹¹ Chatawhcha Ôbô tawhta sie heih ei ta, nochhina lâ Môaba râhpathohpa kiapâh ta Iziabari liata ariena su tao ei ta.

¹² Cha tawhna chata sie heih ei ta, Zere saikao liata yna su tao ei ta.

¹³ Cha tawhna chata sie heih ei ta, Amawri mo râhri tawhta a vaw saohpatluapa râhpathohpa liata Arnaw hiakha lâ liata yna su tao ei ta; Arnaw cha Môaba râhri, Môaba nata Amawri mo likawhta a ypa châ ta.

¹⁴ Chavâta ABEIPA adyuhnazy châbu liana chata, Suphah liata Vahe,nata Arnaw saikaozy,

¹⁵ Ar yna lata pakawpa,Môaba râhri liata â hniehpa saikao padawpazy cha,”tahpa ta reipa a châ.

¹⁶ Cha tawhna chata Be lâta sie heih ei ta, cha cha ABEIPA ta Mawsi hnohta, “Zawpizy cha aw la, ti ei pie aw na,” a tahna, tikhaoh rei cha a châ.

¹⁷ He hla he Izarelzy ta sa ei ta:“Hy tikhaoh, vaw palih la! Hla sa la.

¹⁸ Abeizy chaopa tikhaoh cha, ama ryureina chôchahrei nata sômasih ta zawpizy molaipa sahlao chaopa cha.” Râhpathohpa tawhna chata Matanah lâta sie heih ei ta.

¹⁹ Matanah tawhta Nahaliel lâta, Nahaliel tawhna chata Bamaw lâta.

²⁰ Bamaw tawhna chata Môaba lyu liata saikao nata râhpathohpa a zâ dypa Piska laki lâta.

²¹ Izarel mozy chata Amawri sahlao beipa Sihaw hnohta.

²² Na râh liata maniah pasiesa mah y; lyu liata tlyma, kresadô liata tlyma, tlei leipa aw pi ta; tikhaohrei tizy cha doh leipa aw pi ta; na râh eima khô hlâ lei cha abei lâlai liata eima sie lymâ aw na,” tahpa ta chyhsa tuah ei ta.

²³ Châhrasala Sihaw chata Izarel mozy cha a râh liata sie palâh awpa ta pasaih leipa ta. Sihaw chata a chyhsa zydua cha pakhy ta, Izarel mozy adyuh awpa ta râhpathohpa lâna chata tlao pua haw ei ta, Zahaza kei tlô ei ta, Izarel mozy cha adyuh ei ta.

²⁴ Izarel mozy chata zaozi ta thie ei ta, a râh cha Arnaw tawhta Zabaw taihta Amawna pathlazy taihta chhu ei ta; Amawna pathlazy râhri cha pachyu kaw ta.

²⁵ Izarel mozy chata cha khih zydua cha la ei ta, chatanachata Izarel mozy cha Amawri mozy khi zydua liana chata y ei ta. Hesbaw nata a khih tawh zydua liana chhao chata.

²⁶ Hesbaw khih cha Amawri sahlao abeipa Sihaw khih châ ta, ano cha, cha hlâta Môaba abeipa a vaw dyuhpa ta a ku tawhtapa a râh zydua Arnaw taihta a lapatuhpa a châ.

²⁷ Chavâta hla phituhpazy chata.“Hesbaw lâ a vy ula, Sihaw khihpi cha sapa nata pa-ipa châ se.

²⁸ Hesbaw tawhta mei pua ta, Sihaw khihpi tawhta mei palei.Môaba liata Ar a kâ patlô, Arnaw su a sapa abei sahlaozy cha.

²⁹ Na hu a pona Môaba y! Nama leidia haw, hy Khemaw y! A sawchapawpazy cha a râ awpa ta a sawchanônôzy sei ta a pie, Amawri mo abeipa Sihaw hnohta.

³⁰ Vaw ka pi ta, Hesbaw a leidia, Dibô taihta, Medeba taihta roryhrapa ta eima tao, cha chata Medeba a tlô,”ama tah.

³¹ Cha hawhna chata Amawri mozy râh liata Izarel mozy cha ama pahrâ.

³² Mawsi ta Zaza kei mohparu awpa ta tuah ta; cha liata khihzy cha la ei ta. Amawri mo a ypazy cha papua ei ta.

³³ Chatawhcha kua ei ta, Basana lâpi lâta khy ei ta; Basana beipa Ôka cha âmo a dyuh awpa ta âmo nata a chyhsa zydua Edrei liata a vaw dyuh awpa ta pua ta.

³⁴ ABEIPA ta Mawsi hnohta, “Ano cha chi khâ; ano chhao, a chyhsa zydua chhao, a râh chhao na ku liata ei cha pie haw, Hesbaw liata a ypa Amawri mozy abeipa Sihaw chô liata na taopa hawhta na tao awpa a châ,” tah ta.

³⁵ Chatanachata ano chhao, a sawchapawpazy chhao pahlôhpa rai hnei leipa ta; a chyhsa zydua chhaota thie ei ta, a râh cha hnei haw ei ta.