Maka 4

¹ Tilaipi kiah liata pachu pathao heih ta. Zawpi hluhpi a hnohta a vy pakhy ei ta, tilaipi liata balyh liana chata kiah ta a tyuh ta; zawpi zydua deikua cha tilaipi kiah liana chata y ei ta.

² Chatawhcha pakhona bie ta, hmo hluhpi âmo pachu ta, a pachuna liana cha ama hnohta;

³ “Nahthlie ula! Moh teh u, chi hietuhpa cha chi hiepa ta pua ta.

⁴ A hi nahta thokha cha lâpi kiah liata tla ei ta, pavawzy a vy ei ta, dy khai haw ei ta.

⁵ Thokha cha lôphiariapa, alei a pahna su liata tla ta, alei a chha leipa vâta thlai kaw pyuh ta, a lei a papa vâta;

⁶ chatawhcha noh a sa nata vaw aih ta, a thari a hnei leipa vâta uah ha ta.

⁷ Chi thokha cha ahloh hryta tla ta, ahloh cha vaw seih ta, di sao ha ta, a thei rai pathei khao vei.

⁸ Chatawhcha a hrohpa cha alei phapa liana cha tla ta, thlai pyuh ta, kaw lai ta, vaw pathei ha ta. A lie sythôh zy, a lie sycharu ta zy, alie za kha zy ta vaw pôh ha ta,” tah ta.

⁹ Chatawhcha ano cha, “Ahyrai theina awpa ta nahkhao a hneipa ta cha thei se,” tah ta.

¹⁰ Zisu deita ta a y nota, a kiapâh ta a ypazy nata pahrawhleinopazy chata pakhona bie cha hiahri ei ta.

¹¹ Chatawhcha ano chata ama hnohta; “Khazohpa Khihnarâh bienyupa cha nâmo pahnopa cha pasaipa châ ta, khôtho lâtahpazy châta deikua cha ato pakhona ta reipa a châ;

¹² cha vâna chata hmô la hmô ei ta, châhrasala pahno veih ei, nahkhao ta thei ei ta, a pachânazie cha pahno veih ei; chata leipa ta la a vaw heih heih aw ei ta, a ngiahthaipa ama châ pathlei aw na,” tah ta.

¹³ Chatawhcha ama hnohta, “He pakhona bie he pahno thai vei chi ma? Kheihta e pakhona bie hropa zydua nama pahno thei aw?

¹⁴ Chi hietuhpa chata bie cha hie ta.

¹⁵ Lâpi kiah liata tlapa cha he he ama châ; bie cha ama thei nahta Sâtâ chata ama palôhrupa liata bie ama hiepa cha thlai a lapa tyh ei.

¹⁶ Cha hawhna hra chata lôphiariapa liata hiepa cha he he ama châ, bie ama pahno pata nahta aly ngaitapa ta thlai a pyhpazy hih;

¹⁷ châhrasala âmo liata thari rai ama hnei leipa vâta bohpi leipa ta ama tha azei tyh; cha khai nah chata bie vâta rietheina tlyma, pasa taona tlyma a vaw y pata nahta thlai ama pao tyh.

¹⁸ Chatawhcha a hropazy cha ahloh hryta hiepa cha ama châ; chazy chata bie cha thei ei ta,

¹⁹ châhrasala khizaw pachâna kyh zy, hneirôna dôna kyh zy, hmo hropa byuhnazy cha a vaw ngia nahta, bie cha disao ta, pathei leipa ta a y tyh.

²⁰ Châhrasala alei phapa liata hiepa cha hezy he ama châ, bie cha thei ta a pyh ta, lie sythôh ta zy, a lie sycharu nata a lie za kha zy ta a patheipa he ama châ,” tah ta.

²¹ Zisu chata ama hnohta, “Meiôh cha rao ei sala, a sona liata soh leipa ta, bai ry liata tlyma, rakhô ryta tlyma soh awpa ta ama la beih ma?

²² Phuah leipa ta nyupa khâpahmah y vei;

²³ Ahyrai theina awpa ta nahkhao a hneipa ta cha thei se,” tah ta.

²⁴ Ano chata ama hnohta, “Nama nahthliepa cha khâpa e a châ, a chado teh u; nama panuana lilaw ta cha panuapa hra aw ei ta, cha hlâta hluh viapa chhaota.

²⁵ Ahyrai a hneipa cha pie baichha aw ei ta; ahyrai a hnei leipa cha a hnei chhôhpa chhao lapa a châ hra aw,” tah ta.

²⁶ Zisu chata, “Khazohpa Khihnarâh cha chyhsa ta alei liata chi hie sala,

²⁷ zâ ta a môpa ta, chhô ta thyu tyh sala, chi cha a yzie pahno leipa ta vaw pyuh ta, vaw laiseih sala, cha hawhpa cha a châ.

²⁸ Alei ta ano tlaita patheisa sala; a hmiatua ta a kô, cha khaihna ta a su, cha khaih heihna chata a thei a vaw châ.

²⁹ Châhrasala chyhsa ta a thei cha a vaw hmô nahta, sâh hriana daihti a châ hapa vâta savâ ta a tai tyh,” tah ta.

³⁰ Zisu chata, “Khazohpa Khihnarâh cha kheihta e eima pakhopâ aw, cha leipa ta kheihawhpa pakhona e eima hmâh aw?

³¹ Ahrâ chi hmô kha alei liata hiepa hawhpa he a châ. Alei liata chi zydua hlâta chyh chai hra sala;

³² a hie nata kaw pyuh ta chicheipa zydua hlâta lai chai ha ta, chiah lai ngaitapa ta pachiah ta. chatanachata avâ liata pavawzy chata a chiah liata amâ rie tyh,” tah ta.

³³ Pakhona bie a hluhpi cha ama pahno theina awpa ta ama hnohta a reih tyh;

³⁴ châhrasala pakhona bie leipa ta cha ama hnohta reih beih vei; a pachupazy hnohta deikua cha a ru lâta ato a chhopasia tyh ei.

³⁵ Cha noh tlai chata zâlâ a vaw châ nahta ama hnohta, “Haosâ lâ chakâ ei suh vy,” tah ta.

³⁶ Chatawhcha zawpizy cha siesaipa ta, ano cha a y tyhpa ualua ta balyh liana chata siekhei haw ei ta. Balyh chyhpazy chhao a hnohta ama y.

³⁷ Chatawhcha thlihpipa ru ngaitapa vaw pathli ta, ti chalâparâpazy cha balyh liata thata a chathôh ta, balyh cha ti ta bie daihmâ ta.

³⁸ Châhrasala ano cha balyh chao lâna cha lahua a huapa ta a mô thlâh ha ta; ano cha kei pathyu ei ta, a hnohta, “Pachutuhpa, eima leidiapa he pei tah va chi ma?” tah ei ta.

³⁹ Chatawhcha ano cha thyu ta, thlih cha ra ta, tilaipi hnohna chhao chata, “A chalih la! Na y tyhpa hawhta y teh!” tah ta. Chatawhcha thlih cha a chalih ha ta, si dia ha ta.

⁴⁰ Zisu chata ama hnohta, “Khazia e nama chi kaw tly? Ngiapâna hnei veih eichi ma?” tah ta.

⁴¹ Zisu cha chi ngaita ei ta, “He chyhsa he ahyma a châ tly, thlih nata tilaipi chhaota a bie amâ ngiahpa he?” âmosasyh ta a tah ei ta.