Luka 1

¹ Theôphila Phachaipa: Eima hryta hmo a vaw tlôpa thâtihzy kha chyhsa hluhpi ta ro a chhuah ei ta.

² A thaona liata a hmôtuhpazy nata Thâtihpha chakaotuhpazy ta keimo maniah ama chho hawpa thâtih kha.

³ Chavâta a thaona tawhta ato a siapa ta a laichadaina chôta, a pazipata ta na châta roh aw sala a phapa ta ei pahno,

⁴ hmia lâta bie ama cha chhopa kha a dopa tlai a châ tahpa na pahno thei nawpa ta.

⁵ Zudia râh beipa Herawda a hro nota Abiza py liatahpa a moh Zekaria, theihthaipa pakha y ta; cha chyhsa cha Arawna pathla hry liatahpa Elizabe lahpinô ta hnei ta.

⁶ Ama pano ta Khazohpa hmiakô liata a sia kawpa châ ei ta, seina hnei leipa ta Abeipa biepiepa nata a ryhpa zydua amâ pyh tyh.

⁷ Châhrasala saw hnei vei ei, Elizabe cha saw hnei leipa chanô a châpa vâta; ama pano ta machâ kaw ei ta.

⁸ Noh kha cha a pyzy taozie hawhta Zekaria cha Khazohpa hmiakô liata theihthaipa hawhta a hria hai nota,

⁹ theihthaipazy tao tyhpa hawhta Abeipa achhyna-o liata a ngia ta, maisâh liata rohpahâhpa rao awpa cha pachaopa ta a chôta tlu ta.

¹⁰ Rohpahâhpa raona daihti nota, zawpi zydua cha khôtho liata thlahchhâ ei ta.

¹¹ Abeipa vâlyuhchâpa pakha rohpahâhpa raona maisâh chachâh lâta a duahpa ta a hnohta aluah ta.

¹² Cha cha Zekaria chata a hmôpata nahta a nôpo ta, chi ngaita ta.

¹⁴ Nâma cha thaphapa ta aly aw chi ta, ano pina noh liana cha chyhsa hluhpi ta amâ ly hra aw;

¹⁵ Abeipa hmiakô liata chyhsa rôhnahpa châ aw ta, kresawti nata pari theipa doh aw vei, a nô chhi tawh chhao tlaita, Thlahpa Pathaihpa ta a bie.

¹⁶ Izarel pathlazy hluhpi Abeipa ama Khazohpa lâta a paheisa heih aw,

¹⁷ ano cha Khazohpa hmiakô liata Elaiza hmotaotheina nata thlahpa hneipa ta a sie aw, reingiah leipazy cha siana kyh sona lâta paheisa aw ta, zawpizy cha Abeipa châta a chhuahdy hra aw,”tah ta.

¹⁸ Zekaria chata vâlyuhchâpa hnohta, “Cha cha kheihta e ei pahno thai aw? Kei machâpa châ na ta, ei lahpinô chhao machâpa a châ hra,” tah ta.

¹⁹ ‘Vâlyuhchâpa chata a hnohta a chhy ta, “Kei Kabriel, Khazohpa hmiakô ta a duah tyhpa châ na ta; chho awpa ta nata cha thâtih ly-ypa cha pahnosa awpa ta tuapa ei châ.

²⁰ Châhrasala ei bie reipazy a daihtita ta a vaw tlô awpa cha na zo leipa vâta, cha hmozy a vaw tlô hlâ lei cha bie rei thai leipa ta na thlie thlâ ha aw,” tah ta.

²¹ Zawpizy chata Zekaria cha hâ thlâh ha ei ta, Khazohpa achhyna-o liata a y parei kawpa vâna chata ama noâh kaw ta.

²² A vaw pua nah chata ama hnohta bie reih thai khao leipa ta, chatanachata achhyna-o liata aluahna a hmô tahpa pahno ei ta; ama hnohta ku thliethlâpa ta bie reih thei leipa ta y thlâh ha ta.

²³ A chakaona daihti cha a chhâ nah chata Zekaria cha o lâ a di haw ta.

²⁴ Cha hnôh lâna chata a lahpinô Elizabe cha saw phaoh ha ta, thla pangawh chhôh cha a nyupa ta,

²⁵ “Chyhsa mohmô ta ei moh chhie chhiehruna awpa ta, Abeipa ta chyhsa hmôpa ta he hawhna heta eina taopa haw,” tahpa ta reih ta.

²⁶ A thla charuna liana chata Khazohpa ta vâlyuhchâpa Kabriel cha Kalili râh liata khih miakha Nazari ama tahpa liana chata, laihsakôpa pakha hnohta tuah ta,

²⁷ cha laihsa cha Davi pathla liatahpa Zawsi ta â pahawhpa a châ; laihsa moh cha Mari a châ.

²⁸ Vâlyuhchapa cha a hnohta angia ta, “Ei châ naoh na, nohlaopa y, Abeipa na hnohta a y!” tah ta.

²⁹ Chatawhcha cha bie reipa vâna chata a nôpo ngâsâ ta, kheihtazie ta anaohpa ma a châ tahpa pachâ ta.

³⁰ Vâlyuhchâpa chata chanô hnohta, “Mari, chi khâ, Khazohpa ngiachhiena na to hih.

³¹ Saw phaoh aw chi ta, sawchapaw sa aw chi ta, a moh ta Zisu na bi aw.

³² Ano cha chyhsa laipa châ aw ta, Chônôchaipa Sawchapawpa ama tah aw; Abeipa Khazohpa ta a hnohta a pathlatuhpa Davi dyuchhai cha pie aw ta,

³³ Zakaw pathlazy chô liata chhâzaw ta a bei aw ta, a khihnarâh chhao chhâna hnei aw vei,” tah ta.

³⁴ Mari ta vâlyuhchâpa hnohna chata, “Cha cha kheihta a châ thai aw tly, vahpa hnei tlôh lei khâh na ta?” tah ta.

³⁵ Vâlyuhchâpa chata a hnohta, “Thlahpa Pathaihpa cha na chôta vaw tlô aw ta, Chônôchaipa hmotaotheina cha na chôta a y aw; he vâna heta hawti pathaihpa a vaw pih awpa chhao cha, Khazohpa Sawchapawpa ama tah aw.

³⁶ Pachâ teh, na chihei chanô Elizabe chhaota a sathei chhâ ha tawhta sawchapawpa phaoh ta; saw leipa ama tah tyhpa kha atahma he a thla charuna a châ haw.

³⁷ Khazohpa chata hmo khâpa rai tao thei leipa y vei,” tah ta.

³⁸ Mari ta, “Abeipa seichanô ei châ; na bie hawhta ei chô liata tlô se,” tah ta. Vâlyuhchâpa chata siesai ha ta.

³⁹ Cha nona chata Mari cha thyu ta, Zudia khihpi miakha tlâh râh liata a ypa lâta thlai sie ha ta,

⁴⁰ Zekaria o liata a ngia ta, Elizabe cha a naoh ta.

⁴¹ Elizabe ta Mari a naohna cha a pahnopa ta nahta, a chhi liata hawsai cha a tlieh ta; Elizabe cha Thlahpa Pathaihpa ta vaw bie ha ta,

⁴² ao paro ngaitapa ta awh ta, “Nâ cha chanô zydua hry liata nohlaopa na châ na, na saw phaopa chhao a nohlao na!

⁴³ Ei Beipa nô, ei hnohta nâ vypa he kheihta zie e a châ tly?

⁴⁴ Einâ naohna chi ao ei nahkhao liata a ngiapa ta nahta, ei chhi liata hawsai ypa cha alypa ta â chotlai.

⁴⁵ Na nohlao na, hmoto Abeipa bie reipa kha tlô tlôh aw ta,” tah ta.

⁴⁶ Mari chata:“Ei thlahhmipa chata Abeipa a palyupalih,

⁴⁷ ei thlahpa chhao Khazohpa na Pachhahtupa liata thapha ta,

⁴⁸ a seichanô nawhna zie hmô ta ngiachhie ta. Nathlie teh, atahmâ tawhta chhâ zydua ta nohlao eina tah aw ei;

⁴⁹ Atotaotheipa khata hmo rôhnahpa na taopa haw ta, a moh chhao pathaihpa a châ.

⁵⁰ Chatawhcha ano chituhpazy cha chhâ zydua ta a ngiachhie lymâ tyh.

⁵¹ A bâh ta a thatlônazie pamosa ta,apalaipazy pachâna kyh cha a papai khai haw,

⁵² abeidyuchhai liata ryureituhpazy atyuhpa cha a daophi pathlah ta, a nawhpazy cha tlao pasâhsa haw ta;

⁵³ nodipazy cha hmophapazy ta pabie ta, a hneipazy cha a ruapa ta a pasisa.

⁵⁴ Maniah pathlatuhpazy hnohta a reipa hawhna khata,

⁵⁵ Abaraha nata a pathlazy cha, chhâzaw ta a ngiachhie awpa pahno thlâh hana awpa ta, a sei Izarelzy cha a bao haw,” tah ta.

⁵⁶ Mari cha thla thôh rachhôh a hnohta y ta, chatawhcha a o lâ kua haw ta.

⁵⁷ Elizabe saw Sana daihti cha a vaw daih ha ta, sawchapawpa sa ta.

⁵⁸ A vaihzy nata a sanawhzy chata Abeipa ta a ngiachhie ngâsâ tahpa vaw pahno ei ta, alykhei kaw ei ta.

⁵⁹ Chatawhcha noh charie tawhna chata hawsai chopawtai awpa ta a vy ei ta; a moh châta, a paw moh hawhta Zekaria bi amâ chhuah,

⁶⁰ châhrasala a no ta, “Châ vei; Zawhana tlao bi awpa a châ aw,” tah ta.

⁶¹ Âmo chata a hnohta, “Na chiheizy hry liata he mo a phaohpa he ahyhmah ta y veih ei,” tah ei ta.

⁶² Chatawcha a paw hnohta thliethlâpa ta a moh cha ahy bipa châ sala e na khoh tah ei ta.

⁶³ Ano chata chârona awpa a phiapa hiah ta, “A moh Zawhana a châ,” tahpa ta roh ta. Ama zydua ta ama noâh kaw ta.

⁶⁴ Sôkhata a pakah nata a paleih cha a vaw pathlâ ta, Khazohpa reithaipa ta, a reih a pathlie haw.

⁶⁵ Ama kiapâh ta a ypa zydua chata chi ei ta, cha bie cha Zudia râh zydua liata vaw pathâh haw ta;

⁶⁶ a pahnopa maihta ama palôhrupa liata pachô ei ta. “Cha hawsai cha kheihawhta ma a y aw tly?” tah ei ta. Abeipa ku cha a hnohta y tlôh ta.

⁶⁷ A paw Zekaria cha Thlahpa Pathaihpa bie ta, chhochhielie hra ta,

⁶⁸ “Abeipa Izarel Khazohpa cha palyupalihpa ta y mawh sy, a chyhsazy cha za tly ta, khotalaina taopa ta,

⁶⁹ a sei Davi chhôhkhazy hry liana chata, pachhatuhpa maniah paduapa ha tlôh ta,

⁷⁰ aleilô pi tua no tawhta a hrohsopa pathaihpazy pakah liata a reipa hawhna khata,

⁷¹ eima chariapazy nata maniah a mohnaotuhpa zydua tawhta pachhana cha;

⁷² maniah pathlatuhpazy ngiachhiena pamosana awpa nata, a biehrai pathaihpa pahno thlâh hana awpa,

⁷³ maniah pathlatuhpa Abaraha hnohta chhie a sapa kha,

⁷⁴ eima chariahpazy liata a bôh pi ta,

⁷⁵ eima hro chhôh zydua a mohmô ta pathaih nata siapa ta ypa ta, chi leipa ta ano eima chakaona awpa kyh cha.

⁷⁶ Hawti nâ he Chônôchaipa hrohsopa ama cha tah aw; Abeipa lâthlôhzy a chhuahdy awpa ta, a hmiakô ta sie tlôh aw chi ta,

⁷⁷ a chyhsazy ama moleina a ngiahthaina awpa nata, Pachha ta ama châ nawpa bie chho awpa ta,

⁷⁸ eima Khazohpa ngiachhiena vâta, chôlâ tawhta nôchhiena chata maniah a vaw tlyh haw

⁷⁹ zohna hry liata nata thina nohpahli liata atyuhpazy pakhaihsa awpa nata, thlahlôhna lâpi lia eima pheizy a chhi awpa ta,tah ta.

⁸⁰ Chatawhcha hawsai cha vaw laiseih lymâ ta, a palôhrupa a vaw i ta, Izarel hnohta a vaw luah hlâ lei cha râhpathohpa liata y thlâh ha ta.;