1
Ahyrai a hmo hmôpa tlyma, a hmo theipa tlyma liata pahnotuhpa châpa ta chhie pasakhâhsatuhpa ao atheipa chhaota, reih khoh leipata hmo a parao khiahtala, a hmoparaona maoh cha a phaoh aw."
2
Ahyrai ta hmo pathaih leipa rai, lyurâhpa sa pathaih leipa thi chiepa tlyma, sahroh pathaih leipa thi chiehpa tlyma, alyh theipa chi lôvâpa pathaih leipa thi chiehpa tlyma, pahno leipa ta hriapa ta, a vaw pathaih leipa khiahtala thai lei a châ aw.
3
Chyhsa chhao a pathaih leina kheihawhpa rai châ sala, a pathaih leina cha pahno leipa chhaota a hria khiahtala, a pahno tita thai lei a cha aw.
4
Ahyrai ta hmo pha leipa tlyma, hmo phapa tlyma, tao awpata a pakah ta pahno leipata chhie â sa khiahtala, khâpa rai châ sala a chhiesapa cha a pahno tita cha thai leipa a châ aw.
5
He hmozy miakha liana chhao heta thai lei a cha tita cha a moleina cha phua aw ta,
6
moleina hlâna chata mietahkupa zaw hry liatahpa a chanôpa, mietahkupa taw tlyma, mie taw tlyma, a hmo parao hawpa chata ABEIPA lâta hlâ awpa ta a paraopa hlâna cha vaw cheih aw ta, theihthaipa ta a moleina kyh liana chata aryhna a taopa aw.
7
A hneipa ta mietahkupa taw a tloh leipa khiahtala ABEIPA lâta hlâ awpata a moleina châta a hmo paraopa hlâna ta vachhu pô no tlyma, pivaw pô no tlyma a vaw cheih awpa a châ, pô kha cha moleina hlâna châta, pô kha cha raopa hlâna châta.
8
Theihthaipa lâta vaw cheih aw ta, ano chata moleina hlâna awpa cha hlâ tua aw ta, patlaw leipata a luh cha a rao liata chamieh aw ta,
9
moleina hlâna thisaih cha maisâh kâ liata chyhta hie aw ta, chatawhcha thisaih a ypa zydua cha maisâh thaby liana chata ama palosa awpa a châ; cha cha moleina hlâna a châ.
10
Chatawhcha a pô khapa cha ryhpa hawhta raopa hlâpa ta hlâ aw ta; theihthaipa ta a hmoparao hawpa kyh liata aryhna taopa aw ta, angiahthaipa a châ aw.
11
Anodeikuacha a hneipa ta vachhu pô no tlyma, pivaw taw pô no tlyma chhao, a tloh leipa khiahtala a moleina châta hmohlâpata moleina hlâna châta viadie di ngaitapa ephah su hrawh pachhaih ta su kha vaw cheih aw ta; sathaw a bao awpa châ vei, a chô liata deiryh a soh awpa châ hra vei, moleina hlâna a châpa vâta.
12
Theihthaipa lâta vaw cheih aw ta, theihthaipa ta myleina châta pazah kha la aw ta, maisâh chô liata ABEIPA châta mei ta hlâpa hawhta a rao awpa a châ; cha cha moleina hlâna a châ.
13
Cha hmozy hry liata a kheihawhpa rai a parao hawpa kyh liana chata theihthaipa ta aryhna taopa aw ta, angiahthaipa a cha aw. A laibâhpazy cha niepa hlâpa hawhta theihthaipa châta a châ aw, tah mah y,” tah ta.
14
ABEIPA ta Mawsi chho ta,
15
Ahyrai ta hmo paraopata ABEIPA hmo pathaihpazy chô liata a molei pathlei khiahtala a paraopa hlâna mietahkupa zaw hry liatahpa, mietahkupa tôhpa seina hnei leipa su pathaihpa sekel hawhta tâkâ sekel khazie tlyma tlu ta na pyhpa paraopa hlâna ta ABEIPA châta a vaw cheih awpa a châ.
16
Chatawhcha hmo pathaihpa chôta a do leipata a vaw tao hawna cha thô aw ta, a su pangawh ta pachhaih ta su kha bai aw ta, theihthaipa a pie awpa a châ; theihthaipa chata a paraona hlâna mietahkupa tôhpa chata aryhna taopa aw ta, angiahthaipa a châ aw.
17
“Ahyrai ta hmo paraopata tao lei awpata ABEIPA ta bie a piepazy, a kheihawhpa rai a tao khiahtala, pahno vei hrasala, thai lei châ aw ta, a paraona maoh cha a phaoh aw.
18
Mietahkupa zaw hry liatahpa mietahkupa tôhpa seina a hnei leipa, na pachâzie ta â daihpa, paraopa hlâna châta theihthaipa lâta a vaw chhi awpa a châ, theihthaipa chata pahno leipata a tao pathleipa kyh liana chata aryhna taopa aw ta, angiahthaipa a châ aw.
19
Cha cha paraopa hlâna a châ; ABEIPA hmiakô liata thai lei a châpa a châ,” tahpa ta.
