Zeremiah 49

¹ Amawni pathlazy kyh. ABEIPA chata he tana heta a tah: “Izarel ta sawchapawpazy hnei vei ma? Ryutotuhpa hnei vei ma? Khazia e Kada cha Milkô to haw ta, a chyhsazy khihpi liata zy ama pahrâ haw tly?

² Chavâta moh teh u, nohzy a vaw tlô na, ABEIPA ta a tah, adyuhna pyu ei patheisa aw, Amawni pathlazy Rabah khih liata; hmo chhiepa sopakhypa dei châ aw ta, a sawchanôzy cha mei ta kâ aw ta; chatanachata Izarel chata ano a hneituhpa cha tlao a hnei aw, ABEIPA ta a tah.

³ “Hy Hesabaw y, sâh ngâ teh, Ai cha hrao khai haw tlôh ei ta! Rabah sawchanô saih u, cha teh u! Lathopala poh a sai ula, chaphôh tu ula, dona chhôh liata zy a râhrei teh u! Milkô cha sei ta a chhipa ta y tlôh aw ta. A theihthaipa nata a abeisawzy chhaota.

⁴ Khazia e na saikao phapazy na palaikhei, hy ngâchhi lei nô y, a hneipa phapazy ngâpa ta, ‘Ahy e nâ dyuh aw?’ a tahtuhpa.

⁵ Pachâ teh, na chheipâh ta chyhsa zydua tawhtapa china ei vaw patlôsa aw, ABEIPA Pheisaihzy Khazohpa ta a tah. Chyhsa to topa ta nama cha khai aw, ahyma ta a râpa sahlao cha pakhy aw veih ei.

⁶ Cha hnôh lâna deikua chata maw pathlazy seichâna ei pali aw, ABEIPA ta a tah.

⁷ “Edôma thâtih cha. Pheisaihzy ABEIPA chata he tana heta a tah: Temana sona a y khao tla ma? A sopazy chhosiena a lei khai haw ma? Ama sona a lei khai haw ma?

⁸ Hy Deda liata a pahrâpazy saih u, a râ ula, kua ula, lei syulyu teh u! Esaw vâchhiena a chô liata ei vaw patlôsa aw, ano ei hrie tina chata.

⁹ Kre thei a lyutuhpazy nâ lâta amâ vy nahta, kre thei mypa siesai aw veih ei ma? Zâ ta parutuhpazy chata ama khopazie ama hnei hlâ lei cha hrao lymâ aw veih ei ma?

¹⁰ Esaw cha thluahruapa ta paysa haw na ta, a nyutuhpazy cha ei palâsa haw, a nyu thei khao aw vei. A pathlazy paraopa châ ei ta, a unawhpazy, a vaihzy chhaota a leidia haw.

¹¹ Na sawzy paw a hnei leipa cha pachâ kha, kei ta ei cha hrôbieh aw; na nôhmeizy ta na ngâ ei se.”

¹² ABEIPA chata he tana heta a tah, ‘Nyu a doh lei awpazy chhaota ama doh ha khiahta cha, nâ, hrie cheita leipa ta na pua aw ma? Hrie leipa ta pua aw va chi, na doh tlai aw.

¹³ ABEIPA chata keimasasyh a reipa ta chhie sa haw na ta, Bôzrah cha noâhpa reipachhiepa pathaihparohsapa, chhiesapa châ aw ta, a khihpi zydua chhao roryhrapa ta a y palâh aw.

¹⁴ ABEIPA tawhta bie phuahpa ei vaw thei haw, phopizy hnohta lyuhchâpa tuapa a châ haw; “A pahmaoh pakhy ula, ano adyuh ula, adyuhna a chhuahdy teh u!” tah ta.

¹⁵ Pachâ teh, phopizy hryta a nawhpa ta ei cha tao aw, chyhsazy mohnaopa ta.

¹⁶ Hy, na lôkâhpa alô likawh ta tlâh laki liata a pahrâ tyhpa y, rarôh na paysana kha, na pathipalôh a palaipa a cha dôna a châ. Pahmô hawhta â sâhpa ta na bu tu hra la, cha tawhna chata ei cha la aw, ABEIPA ta a tah.

¹⁷ “Edôma cha roryhrapa ta vaw y aw ta, a kiapâh ta a siepa maih noâh aw ei ta, hriena vâna chata ama naih ama bei chie aw.

¹⁸ Sawdawma nata Kawmawra nata a chheipâh ta khihpizy paraopa ta a ypa hawh hra ta, ahy hmah ta pahrâ khao leipa aw ei ta, chyhsa saw ahy hmah ta cha liana chata y khao aw veih ei, ABEIPA ta a tah.

¹⁹ Moh teh u, Zawda râh râhhmâhpa tawhta chakeibarôhneipa sahroh pathliena su lâta khy aw ta, ano tawhta âmo parasa aw na ta, a chô liata bie a hneituh awpa ta ei khopa maih ei rao aw. Keima hawhpa he ahy e a y? Ahy e daihti na rao pa aw?

²⁰ Mietahkuvaituhpa ahy e ei hmiakô liata a duah awpa cha? Chavâta Edôma chô liata ABEIPA chhosiena nata Temana liata a ypazy chô liata a hmo raopa tao a chhuah hawpazy cha: Sahroh zaw tawzy tlai cha siekheipa ta y aw ei ta, ama pahrâna cha roryhrapa ta a y aw.

²¹ Ama paona pyu ta alei he a chalyu ta; ama chapa pyu cha Tilaipi Saihpa liata chhao theipa a châ.

²² Pahmôpi hawhta a kaw zaw aw ta; Bôzrah chô liata a mathlaw a pakai aw, cha nona chata Edôma chyhsa riahphapazy pathipalôh chhao cha chanô saw zeipa pathipalôh hawhta a châ aw.

²³ Damaska thâtih. “Hama nata Arpa cha ama noza ta, bie pha leipa pahno haw tlôh ei ta; ama leidia haw, tilaipi chatlaopa a y molo thei leipa hawhta, tymâpa ta y ei ta.

²⁴ Damaska thazeipa ta y ta, a râpai a chhuah ta, a pachhai haw; rietheina nata pachârôhna ta a patu haw, chanô sawzeipa hawh tlaita.

²⁵ Khihpi mohpathâhpa nata thaphapa cha a dia haw dia!

²⁶ Chavâta a sawzy cha othliah liata pao aw ei ta, a chariah zydua ama leidia aw, Pheisaihzy ABEIPA ta a tah.

²⁷ Chatawhcha Damaska kuh pâchhô liata mei pati aw na ta, Benhada abei ozy cha a kâ khai aw,” tah ta.

²⁸ Keda nata Hazaw râhzy Babylaw beipa Nebukareza a tusaopa thâtih ABEIPA cha ta he tana heta a tah: “Thyu ula, Keda siehnao ula! Nochhi sawzy cha hrao teh u!

²⁹ Ama poh-ozy, ama sahroh zawzy ama lapa aw, ama poh raipazy ama beihphia zydua zy; ama râraoseipazy cha ama siekhei aw, su to liata, ‘Chichhihpa a y,’ tahpa ta, chyhsazy ta ama aw sao aw.

³⁰ A râ ula, viavi syulyu teh u, lei syulyu teh u, hy Hazaw a pahrâpazy saih u! ABEIPA ta a tah. Babylaw beipa Nebukareza chata a cha tei ei, na chô liata tao a chhuahpa a hnei haw.

³¹ “Thyu la, thlahlôhpa ta a ypa, âmo khota khih a sapa, kuh ochhi chhao a hnei leipa, hraina thua tlai chhao a hnei leipa phopi cha siehnao teh u, ABEIPA ta a tah.

³² Ama râraoseipa cha chariahpa ta la haw ei ta, ama viahchao zawzy cha hraona a châ aw. Baih hmi ngyupa sahlaozy cha su to liata ei papai aw, ama raona awpa cha su to tawhta ei vaw tlôkhei aw, ABEIPA ta a tah

³³ Hazaw cha sihâ pahrâna su châ aw ta, chhâzaw ta roryhrapa ta a y aw; cha liana chata ahy hmah ta pahrâ khao leipa aw ei ta, chyhsapa sawzy rai pahrâ khao aw veih ei.”

³⁴ Zudah beipa Zedekiah ryureina a thaona liata Elami kyh lâta ABEIPA bie hrohsopa Zeremiah hnohta a vaw tlôpa cha.

³⁵ Pheisaihzy ABEIPA chata he tana heta a tah: “Pachâ teh u, Elami libaw ama thatlôna chaipa cha ei parao aw;

³⁶ Elami chô liana chata kaoki miapalih tawhta, thlih miapalih ei vaw patlôsa aw; kaoki to lâna chata ei papai aw; Elami papuapa chyhsazy tlô leina phopi rai y aw vei.

³⁷ Ama khakhaipa, ama hrona a tluatuhpazy hmiakô liana chata Elami sahlao cha ama no ei pamaohsa khai aw; âmo chô liata vâchhiena ei patlôsa aw, ei pathi-iana ru ngaitapa tlai cha, ABEIPA ta a tah. Âmo zaozi ei chadaisa aw, ei pahleipadia khai hlâ lei cha;

³⁸ ama abeizy nata ama abeisawzy pahleipadiapa ta Elami liana chata ei ryureina dyuchhai ei patyuh aw, ABEIPA ta a tah.

³⁹ Châhrasala noh hnôh lânazy chata Elami seichâna ei palie aw, ABEIPA ta a tah.