Habaku 1

¹ Hrohsopa Habaku ta aluahna ta bietapa a hmôpa.

² Hy ABEIPA, khachâ e cha aw aw na ta, eina nahthlie vei aw chi? Nôchhiena kyh vâta nâ lâta cha padona ta, na pachha aw va chi ma?

³ Khazia hmoparaonazy na pamosa chi ta, hmo tao do lei ngaitapazy he na moh thlâh haw? Ahraona nata nôchhiena zy ei hmiakô liata y tlôh ei ta; ahryuna nata atah-ualuana zy avaw pua.

⁴ Chavâta ryhpa bie chata paphahnaisa thei leipa ta, pachiana bie pua beih hra vei. Chyhsa siapazy cha moleipazy ta chadô ei ta, chavâta pachiana cha a do lei ngaitapa ta a pua tyh.

⁵ Phozy cha moh ula, sai thlâh ha ula; thata noâh teh u. Nama hro chhôhta hmo kyh kha ei taopa he, cha hmotaopa cha chyhsa ta cha chho hra ei sala zo cheita aw veih eichi.

⁶ Kaldia mo, pho chichhih ngaitapa nata rarôh ypa pathyu aw na ta, pahrâna su, âmo ei leipa chhao hnei a chhuahpa, alei ha a sie palâh tyhtuhpazy cha.

⁷ Chi a chhihpa ta ama rarôh a y ngaita; ama pachiana nata ama rôhnahna cha âmo tawhta a puapa a châ.

⁸ Ama arâzy chhao keichho hlâta ama chatlie chakoh via, a zohna liata changiezy hlâta chhao chi amâ chhih via; ama arâ a kiapazy cha athyu ngâ kaw ei ta. Ama arâ a kiahpazy cha lâhlapi tawhta avypa ama châ; pahmôpi sa niepa ta a pangaipa hawhta a pathlô hnao ei ta.

⁹ Nôchhiena hmah a chhuahpa ta a vy chyu ei ta; hmia lâ khâchâ amâ heih. Leisadi doh-lei hawh tlaita seizy ama patu tyh.

¹⁰ Abeizy chhao taola ei ta, molaipazy cha pahneiparâsao ei ta. Kuh a ipa zydua khâpasaw ta reih veih ei, alei pacho ei ta, la thlâh ha tyh tlôh ei ta.

¹¹ Thlih hawh tlaita vaw chanao ei ta, sie pakhô ngâ ei ta, ama thatlôna cha khazoh ta ama hneipa vâta thai lei ama châ!

¹² Hy ABEIPA Khazohpa, ei Moh Pathaihpa, chhâzaw tawhtapa châ va chi ma? Na thie beih va chi. Hy ABEIPA, nâ ta âmo cha pachia nawpa ta a tlyh chi ta; hy Lôpanô, nâ ta âmo cha chhorei nawpa ta na padua.

¹³ Na mo cha moleipazy mo nawpa ta pathaih tu ha ta, riethei a taopa moh thei leipa ta, khazia e piepie ngaitapa ta a taotuhpazy cha moh theipa ta, hmoparaopazy ta âmo hlâta mosiapa ama nie khai nota nâ thlih thlâh haw?

¹⁴ Chyhsapa he tilaipi liata ngazy nata lôvâpa ama chô liata ryureituhpa hnei leipazy hawhta na tao tly?

¹⁵ Keipa ta chalo khai ta, a sao chata pahly pakhy ta; chavâta thaphapa ta âly.

¹⁶ Cha hawhpa vâta a sao lâta atheihna hlâ ta, a sao lâta rohpahâhpa rao ta; âmo vâta a tovyuh laipa ta niepa hluhpi a hnei haw vâta.

¹⁷ Chavâta a sao cha parua heih tyhpa ta, phozy thi ei leipa ta khâ a y aw ma?