Athaona 50

¹ Chatawhcha Zawsi chata a paw hmia a khu thlupa ta, cha ta, sy ta."

² Zawsi ta ano a chakaotuhpa thohna a thaipa sahlaozy cha, a paw ri thu thei leipa ta tao awpa ta bie pie ta. Chatanachata thohna a thaipa sahlao chata Izarel ri cha thu thei leipa ta tao haw ei ta;

³ a ri tao nawpa ta noh sypalih hryu ei ta, thu thei leipa ta taona chata noh cha zie cha ama hryu tyhpa rai a châ. Chatawhcha noh sysari chhôh cha Izi sahlao chata ano cha chakhei ei ta.

⁴ Chatawhcha ano ama chakheinanohzy cha a chhâ tawhta, Zawsi ta Phirao chhôhkhazy cha bie a chho ta, “Na hmiakô liata ngiachhiena ei hmô khiahtala ngiachhiepata ta Phirao nahkhao theina liata

⁵ ei pâ ta, “Ei thi aw na; Kana râh liata ei thlâ ei chao chiehpa liata, cha liana tlai chata na pabu mah y,’ tahpa ta chhie na pasakhâhsa ta, Ngiachhiepata ta ei pâ he na pabusa mah y; ei vy heih aw, a tahna tahpa ta, reih teh u,” tah ta.

⁶ Phirao chata, “Chhie cha pasakhâhsapa hawhna chata, na paw cha kaw pabu mah y,” tah ta.

⁷ Zawsi cha a paw pabu awpa ta khy haw ta; Phirao chakaotuhpa zydua, a chhôhkha zydua hry liata machâzy nata Izi râh machâ zydua nat.

⁸ Zawsi chhôhkha zydua nata a unawhpazy nata a paw chhôhkhazy cha a hnohta khy hra ei ta; ama sawnawh chyhpatazy nata ama mietahkupa zawzy nata ama viahchao hrizy deita cha Kôse râh liata siesai ei ta.

⁹ Chatawhcha ano hnohta talailizy, arâ a kiapazy khy hra ei ta; py lai ngaitapa ama châ.

¹⁰ Zawda haosâ liata Atada sawhri châ tlôh ei ta, cha liana chata thata chakhei chaimâh ei ta; noh sari a paw mâchhiesana tao ta.

¹¹ Cha râh liatahpa Kana sahlaozy chata Atada sawhri liata ama athihpa mâchhiesapa cha ama hmô nahta, “He he Izi sahlao a thipa mâchhiesana ru ngaitapa a châ he,” tah ei ta. Chavâta cha su cha Abelamizarai* bi ei ta; cha cha Zawda haosâ ta a ypa a châ.

¹² Chatawhcha a sawchapawpazy chata a bie piepa lymâ hawhta taopa ei ta;

¹³ a sawchapawpazy chata Kana râh liata a ngiakhei ei ta, Abaraha ta pabuna su ryu châta Hiti chyhsa Ephraw liata lyu chhaota a chaleipa, Mamre dadyta Makapela lyu liata lôpu liana khata ama pabu haw.

¹⁴ Zawsi cha a paw a pabu khai nata, ano nata a unawhpazy nata a paw pabu awpa ta a hnohta a khy hrapa zydua chhaota Izi râh lâta kua haw ei ta.

¹⁵ Chatawhcha Zawsi unawhpazy chata ama paw thipa cha ama pabu nata, “Zawsi ta maniah a hao aw ta, a chô liata hmo eima paraopa zydua phu kha, eima chô liata a kipa ta a la thlyu aw na,” tah ei ta.

¹⁶ Zawsi chho awpa ta bie ta ei ta, “Na paw chata, a thi hlâna khata,

¹⁷ He tana heta Zawsi hnohta, ngiachhiepa ta na unawhpazy paraona nata ama moleina cha, a ngiahthai mah y, na chô liata hmo la parao taraw ei ta, tahpa ta nama reih awpa a châ,’ tah ta, bie maniah pie ta, ngiachhiepa ta na paw Khazohpa chakaotuhpazy paraona cha a ngiahthai mah y,” tah ei ta. Chatawhcha a hnohta ama chho nona chata, Zawsi cha cha ta.

¹⁸ A unawhpazy chhao cha vawh hra ei ta, a hmiakô liata a bôh chyu ei ta, “Moh teh, na chakaotuhpazy eima châ hih,” tah ei ta.

¹⁹ Zawsi ta ama hnohta, “Chi kha u, Khazohpa vyuhpa ta a ypa châ va na mâ?

²⁰ Nâmo ta la ei chô liata hmo moleipa tao a chhuah eichi ta; châhrasala Khazohpa chata atanoh hawhna heta chyhsa hluhpi a hrohpa ta pachhana awpa ta hmo phapa ta pachâsa tlao a chhuahpa châ tlôh ta.

²¹ Chi kha u, nâmo nata nama sawnawh chyhpatazy cha, ei cha pasa lymâ aw ei,” tah ta. Chatanachata ama thlah palôh ta, reikah pha ngaitapa ta chho chyu ei ta.

²² Chatawhcha Zawsi cha ano nata a paw chhôhkhapazy chhaota Izi liana chata pahrâ ei ta; Zawsi cha kô za kha nata kô hrawh hroh ta.

²³ Zawsi chata Ephrai sawzy chhâ thôhna taihta hmô ta; Manase sawchapawpa Makhia sawzy chhao Zawsi byh chô liata pih ei ta.

²⁴ Zawsi ta a unawhpazy hnohta, “Ei thi aw na; châhrasala Khazohpa ta cha vaw tly thlyu aw ei ta, he râh tawhtapa he a chhipa ta Abaraha zy, Aisika zy, Zakaw zy hnohta chhiesapa ta pie â taihpa, â taihpa râh lâta a cha kaw chhi aw ei,” tah ta.

²⁵ Zawsi chata, Izarel pathlazy cha vaw tly tlai aw ei ta, ei rupazy he, he tawhtapa he namâ kaw sy awpa a châ,” tah ta.

²⁶ Zawsi cha, kô za kha nata kô hrawh a châpa ta thi ta; a ri cha thu thei leipa ta tao ei ta, Izi liata ri byh liata soh haw ei ta.