Athaona 30

¹ Chatawhcha Rakheli chata Zakaw cha saw rai a sapa leipa a pahno nah chata, a narônô cha uava ta; Zakaw hnohna chata, “Sawzy na pie teh, chataleipa ta la ei thi aw!” tah ta."

² Rakheli chô liana chata Zakaw cha a pathi-ia ta, chatanachata “Khazohpa vyuhpa ta na chhi liata theilâpazy a pakhâtuhpa ei châ mâ?” tah ta.

³ Chatawhcha ano chata, “Ei seichanônô Bilha hu, ano hao a ziakhei la, chatanachata kei chhao ano liata sawzy ei hnei thei nawpa ta ei byh chô liata saw a sa na hâh ta,” tah ta.

⁴ Chatanachata a seichanônô Bilha cha a lahpinô châta pie ta; Zakaw chata ano cha a ziakhei ta.

⁵ Chatawhcha Bilha cha saw phaoh ta, Zakaw cha sawchapaw sapa haw ta.

⁶ Chatawhcha Rakheli chata, “Khazohpa ta na pachia ta, ei ao thei hra ta, sawchapaw eina pie hih,” tah ta; chavâta amoh ta Dana bi ta.

⁷ Rakheli seichanônô Bilha cha saw phaoh heih ta, Zakaw cha sawchapaw panona ta sapa heih ta,

⁸ Rakheli chata, “Apiahpa hawhta ei narôna a pia na ta, ei pahnie haw,” tah ta; chatanachata a moh ta Nathalai bi ta.

⁹ Chatawhcha Liah chata saw sa heih khao leipa ta a y tahpa a pahno nata a seichanônô Zilpah cha a chhi ta, a lahpinô châta Zakaw pie ta.

¹⁰ Liah seichanônô Zilpah chata Zakaw cha sawchapaw sapa ta.

¹¹ Liah chata, “Vâhnei a chhi kaw dia!” tah ta, a moh ta Kada bi ta.

¹² Liah seichanônô Zilpah chata Zakaw cha sawchapaw panona sapa heih ta.

¹³ Liah chata, “Ei ly kaw dia! Chanôzy chata aly kawpa eina tah aw ei hih,” tah ta; a moh ta Asera bi ta.

¹⁴ Chatawhcha sâhria nota Rubena chata khoiah thei lyurâhpa liata kei hmô ta, a nô Liah lâta vaw cheih ta. Chatanachata Rakheli ta Liah hnohta, “Ngiachhiepa ta na sawchapawpa khoiah thei a hmôpa bâh na pie bâ hra teh,” tah ta.

¹⁵ Châhrasala ano chata a hnohta, “Ei vahpa eina chhupa chi he hmo chyhpa ta a châ mâ? Ei sawchapawpa khoiah thei chhao he, chhu heih awpa nâ chhuah mâ?” tah ta. Rakheli chata, “Cha khiahtala na sawchapawpa khoiah thei vyuhpa heta, atazâ a châ ziakhei aw,” tah ta.

¹⁶ Chatawhcha zâlâ nah chata Zakaw cha lyurâhpa tawhta vaw tlô ta, Liah cha dy awpa ta pua ta, “Einâ zialâh awpa chi a châ; ei sawchapawpa khoiah thei ta cha hlâhawtlôh na ta,” tah ta. Chatanachata cha zâna chata a ziakhei haw ta.

¹⁷ Chatawhcha Khazohpa ta Liah thlahchhâna nahthlie ta, chatanachata saw phaoh ta, Zakaw cha sawchapaw papangawhna sapa heih ta.

¹⁸ Liah chata, “Ei seichanônô cha ei vahpa hnohta ei piepa vâta, Khazohpa ta ei hlao eina pie hih,” tah ta; a moh ta Iskara bi ta.

¹⁹ Liah cha saw phaoh heih ta, Zakaw cha sawchapawpa pacharuna sapa heih ta.

²⁰ Liah chata, “Khazohpa ta thyukheipa pha ngaitapa na pahneisa ta; atahmâ la ei vahpa cha sawchapawpa pacharu ei sapa hawpa vâta ei hnohta a pahrâ ha aw,” tah ta; a moh ta Zebulawna bi ta.

²¹ Cha hnôh lâna chata sawchanô sa heih ta, a moh ta Dina bi ta.

²² Khazohpa ta Rakheli cha a thei thlâh ha ta, chatanachata Khazohpa ta a thlahchhâna nahthlie ta, a chhi pahypa haw ta.

²³ Chatawhcha saw phaoh ta, sawchapawpa sa ta, “Khazohpa ta ei moh chhiepa a phiehru haw,” tah ta.

²⁴ a moh Zawsi bi ta, ABEIPA chata sawchapawpa hropa pie heih mawh sy!” tahpa ta

²⁵ Chatawhcha Rakheli chata Zawsi a sa tawhta, Zakaw ta Laba hnohta, “Keima yna tyhpa, eima râh lâta ei di awpa ta na pasiesa bâ teh.

²⁶ Ei cha chakaona chhâpa ei lahpinôzy nata ei sawzy he na pie la, na pasiesa teh; ei cha chakaonazie cha pahno tlôh chi ta,” tah ta.

²⁷ Chatawhcha Laba chata a hnohta, “Eina ngiachhie thei chi khiahta cha, y chy châ chi, ABEIPA ta nâma zawhzi ta byhnâ eina pie aw tahpa, pahno tlôh na ta,” tah ta.

²⁸ Laba chata, “Na hlao awpa cha rao la, na chho teh, ei cha pie aw,” tah ta.

²⁹ Zakaw chata a hnohta, “Kheihta e, cha chakao na ta, kheihta e, na sahroh cha ei hnohta a y, na pahno mâh tâh.

³⁰ Ei vy hlâta la a chyhta dei hnei chi ta, atahmâ la a hluhpi ama vaw châ haw hih; ei siena lâ maih ta, ABEIPA chata byhnâ a cha pie lymâ. Anodeikua cha khatita e keima chhôhkha châta ei chhuahdy hra aw tly?” tah ta.

³¹ Ano chata, Khapa ei cha pie aw?; tah ta. Zakaw chata, “Khâpa hmah eina pie awpa chi châ vei; he hmo he eina taopa chi khiahtala, na sahroh zaw cha, ama lao pabâsapa ta ei vaih heih aw na;

³² atanoh he, nasahroh zaw cha kei moh khai aw na ta, mietahkupa hry liata a vypa ta a chapaipa nata a saihrulupa ta, a vyhpa maih nata mie hry liata a râhpa ta a chapai charupa nata a râhpa ta a chapaipazy cha, cha tawhtapa cha a nanopa ta ei so lymâ aw, chatawhcha atahmâ tawhta cha hawhta a vaw patawhpa maih cha, ei hlao awpa a châ aw.

³³ Chatawhcha atahmâ tawhta na hmôna liata ypa ei hlao kyh liata nâ vy tina chata, ei siana he a vaw lâ aw. Mie hry liata a râhpa ta a chapai leipa nata a râhpa ta a chapai charu leipa nata mietahkupa hry liata a vyh leipa ei hnohta na hmôpa maihta, parupa ta na rao awpa a châ,” tah ta.

³⁴ Laba chata, “Na reipa hawhna cha châ se,” tah ta.

³⁵ Cha no tlaina chata Laba chata mie tôhpa a râhpa a chei a ropa nata a râhpa a chapai charupazy nata, mie panô a râhpa a chapaipa nata a râhpa ta a chapai charupa maih cha, a râhpa a hlaopa maih cha, mietahkupa hry liata a vyhpa zydua chhao chata, panano ta, a sawchapawzy ku liata pie ta.

³⁶ Chatawhcha ano nata Zakaw likawh liana chata noh thôh siena liata paysa ta; chatawhcha Zakaw chata Laba sahroh zaw zydua cha lao pabâsa ta.

³⁷ Chatawhcha Zakaw ta sahria nata nata ari chôhchahrei liana chata a ngyuhpa palâsa ta

³⁸ Chatawhcha chôhchahrei ahy a hlaipazy sahroh zawzy ta ti ama do tyhna, châki liata zy, ti lona liata zy chata sahroh zawzy dady lymâ ta soh ta. Chatawhcha ti do awpa ta ama zu nah chata vô tyh ei ta,

³⁹ sahroh zawzy cha, chôhchahrei dady chata vô ei ta, a râhpa a chei â rohpa, a râhpa ta â chapaipa nata a râhpa ta a chapai charupa ta patawh tyh ei ta.

⁴⁰ Chatawhcha Zakaw chata mietahkupa taw cha a nano ta soh ta, sahroh zawzy cha Laba sahroh zawzy hry liata a râhpa a chei â rohpa nata a vyhpa zydua lâ cha paheisa tyh ta; ano sahroh zawzy cha a nano ta soh tyh ta, Laba sahroh hry liana chata soh leipa ta.

⁴² ano deikua cha sahroh cha a chi leipa khiahta cha soh tyh leipa ta; chatanachata a taw pha lei viapazy cha Laba châta châ lymâ ta, a thatlô viapazy cha Zakaw eih châ lyma ta.

⁴³ Chatanachata Zakaw cha thata vaw lai ta, a sahroh zaw lai ngaitapazy, seichanôzy, seichapawzy, râraoseihpazy, alâzy vaw hnei ta.