Athaona 2

¹ Cha hawhna chata avāzy nata alei, a chhōh liata a ypa zydu chhaota paloh khaipa chā haw ta."

² Chatawhcha noh sari noh liana cha Khazohpa ta hmotaopa cha pangoh ta; noh sarina noh liana chata a hmotaopa zydua tawhtapa a pahāsai haw ta.

³ Cha noh liana cha Khazohpa ta, a paysapa nata a taopa hmo hriana zydua tawhtapa a pahāsaipa vāta Khazohpa ta noh sari noh cha a chōta byhnā aw ta, a pathaisa hra.

⁴ He he avāzy nata lei taopa ta ama y nota thātih cha a chā. ABEIPA Khazohpa ta alei nata avāzy a tao nona khata.

⁵ si biepa rai alei liata a y leipa ta chicheipa rai chhao pyu hra vei, ABEIPA Khazohpa ta alei chō liata avā a pasuasa leipa vāta nata, lei a palietuh awpa chyhsa rai chhao ama y leipa vāta.

⁶ anodeikuacha alei tawhta ameih vaw pua ta alei chō zydua cha a pahnasa tyh.

⁷ chatawhcha ABEIPA Khazohpa ta alei liata doh lei cha chapaw* tao ta, a ahnapasu liata hrona hu so thlu ta; chapaw cha chyhsa hropa vaw chā haw ta.

⁸ ABEIPA Khazohpa ta nochhi lāta, Idāh liana chata sahdō tao ta; a chyhsa taopa cha cha liana chata paysa haw ta.

⁹ Chatawhcha ABEIPA Khazohpa ta alei tawhta palōh a la theipa nata niepa ta, phapa tho tozy cha papyusa haw ta, hrona tho chhao sahdō liahlia liata papyusa ta, chhie nata pha pahnona tho chhao.

¹⁰ Chatawhcha Idāh tawhta sahdō pahnasa nawpa ta chavah loh ta, cha tawhna chata pachiah ta, chavah mia palih vaw chā haw ta.

¹¹ a miakhana cha Pisaw a chā; cha cha Havilah rāh zydua a chadōtuhpa cha a chā, cha liana chata ngōh y ta.

¹² cha rāh liata ngōh cha a pha ngaitapa a chā; cha liana chata bedelium nata bery lō a y.

¹³ Chavah mianona moh cha, Kihaw a chā; cha tlai cha Kusa rāh zydua a chadōtuhpa cha a chā.

¹⁴ Chavah miathōhna moh cha Hidekel chā ta, cha cha Asuria rāh nochhi lāta a lohpa cha a chā. Chavah miapalihna cha Euphrate a chā.

¹⁵ ABEIPA Khazohpa chata chapaw cha a chhi ta, Idāh sahdō liana chata a hria awpa nata a vai awpa ta soh haw ta.

¹⁶ ABEIPA Khazohpa ta chapaw hnohna chata, “Sahdō liata tho to rai theizy he na khopa hawhta na nie thei na.

¹⁷ chhie nata pha pahnona tho thei deikua he na nie awpa rai chā vei, na nie khiahtala na nie noh tlaita na thi thlyu awpa a chā,” tahpa ta bie pie ta.

¹⁸ ABEIPA Khazohpa chata, “Chapaw ano deita ta a ypa he pha vei; ano a baotuh awpa a kaolāhpa, ā khypa ei taopa aw,” tah ta.

¹⁹ ABEIPA Khazohpa chata alei tawhtapa sa tozy nata a ruapa liata pavaw to tao ta, ama moh bi awpa ta chapaw lāta a chhi ta; chatawhcha hmo hroh hneipa tozy cha chapaw ta ama moh a vaw bipa maih cha ama moh a vaw chā haw.

²⁰ Chapaw chata sahroh zyduazy, a ruapa liata pavawzy, rāhsa to rai zy cha a moh bi chyu ta; chāhrasala chapaw chāna chata a baotuh awpa a kaolāhpa, ā khypa y leipa ta.

²¹ Chatanachata ABEIPA Khazohpa chata chapaw cha mokuh pahāh ngaitapa ta pamōsa ta, ā mō chhōhna chata a kāru miakha la ta, cha vyuhpa cha a sapa ta pamai haw ta.

²² ABEIPA Khazohpa ta chapaw tawhta a lapa kāru cha chanō ta tao ta, chapaw lāta a chhi haw ta.

²³ Chatawhcha chapaw chata,“A! he tlai he ei rupazy tawhta rupa nata Ei sapa tawhta sapa cha a chā;Chapaw tawhta lapa a chāpa vāta Chanō tah awpa a chā”. tah ta.

²⁴ Chavāta chapaw ta a nō nata a paw sieai aw ta, a lahpinō a patu aw; chatanachata pōhpa miakha ama vaw chā ha aw.

²⁵ Chatawhcha chapaw nata a lahpinō cha, thluahruapa ta y ei ta, ama noza vei.