2 Thatihzy Rona 35

¹ Zôsiah chata Zerusale liata ABEIPA chata zawpakhô a ô ta; cha thla khana, noh hrawhleipalih noh ta zawpakhô mietahkupa taw thie ei ta.

² Theihthaipa zy cha ama raihria raopa ta, ABEIPA o liata chakaona rai hria awpa ta pasyu ta. Izarel mozy pachutuhpa, Khazohpa chata pananopa Livai mozy hnohna chata Izarel beipa Davi sawchapawpa Sawlawmaw o sapa liana chata Byh pathaihpa cha soh teh u; nama ngiatlâh ta a sy byuh khao aw vei; ABEIPA nama Khazohpa nata a chyhsa Izarel zy chakao teh u.

⁴ Izarel beipa Davi ropa hawhta nata a sawchapawpa Sawlawmaw ropa hawhta nama chhôhkha pawhrâhpa yzie lymâ hawhta a hlao a hlao ta a chhuahnoh teh u.

⁵ Chatawhcha nama unawhpa sahlao chhôhkha pawhrâhpa yzie lymâ hawhta Livai sahlao chata tovyuh hneipa ta su pathaihpa liana chata y teh u.

⁶ Zawpakhô kyhchhina châta thie ula, a pathai ula, Mawsi hmâpa ta ABEIPA reipa hawhta tao awpa ta nama unawhpa zy châta a chhuahnoh teh u,” tah ta.

⁷ Zôsiah ta cha liata a ypa zydua cha zawpakhô kyhchhina liata hlâ awpa ta sahroh hry liatahpa mietahkupa taw thy thôh nata viahchao tôhpa sâh thôh pie ta: chazy cha abeipa sôh hry liatahpa a châ.

⁸ Chatawhcha a molaipa zy chata zawpi zy, theihthaipa zy, Livai sahlao zy cha âmo lôhthai ta hlâ awpa ta pie ei ta. Khazohpa o hyutuhpa Hilkiah zy, Zekaria zy, Zehiel zy chata zawpakhô kyhchhi liata hlâ awpa ta sahroh taw sâh no nata za charu nata viahchao tôhpa za thôh theihthaipa zy pie ei ta.

⁹ Kônania zy, a unawhpa Shemaia zy, Nethanel zy, Livai sahlaozy hyutuhpa Hasabiah zy, Zeiel zy, Zôzaba zy chhaota zawpakhô kyhchhi liata hlâ awpa ta Livai sahlao zy cha Mietahkupa taw sâh pangawh nata viahchao tôhpa za pangawh pie ei ta.

¹⁰ Chatanachata chakaona cha a chhuahnoh ei ta, abeipa biepiepa hawhta theihthaipa zy cha ama su liata a duah ei ta, Livai sahlao zy cha ama py yzie lymâ hawhta.

¹¹ Chatawhcha zawpakhô mietahkupa taw cha thie ei ta, theihthaipa zy chata thisaih cha hie ei ta, Livai sahlaozy chata a vo hlaih ei ta.

¹² Mawsi châbu liata a ropa hawhta ama chhôhkha pachhaihna yzie lymâ hawhta ABEIPA lâta hlâ awpa châta pie awpa ta raopa hlâna zy cha ama pasie aw. Viahchao tôhpa zy chhao cha cha hawhna hra chata tao ei ta.

¹³ Chatawhcha zawpakhô mietahkupa taw cha a yzie hawhta pakâ ei ta; hlâpa pathaihpa sâh cha, beih zy, beih chalona a hneipa zy, beih paka kawhpa zy ta chhoh ei ta, chyhsa zydua lâta vawkhei ei ta.

¹⁴ Cha khai tawhna chata âmo nata theihthaipa zy chata a chhuahnoh ei ta; Arawna saw theihthaipa zy cha raopa hlâna nata sathaw hlâpa ta zâ taihta atymâpa ta y tlôh ei ta; chavâta Livai sahlaozy chata âmo nata Arawna saw theihthaipa zy châta amâ chhuahnoh.

¹⁵ Davi nata Asapha nata Hima nata abeipa hrohsopa Zeduthu zy biepiepa hawhta hla satuhpa Asapha sawchapawpa zy cha ama su liata y ei ta; ama unawhpa Livai sahlaozy ta amâ chhuahnoh papa vâta ama raihria siesai byuh leipa ta.

¹⁶ Chatanachata Abei Zôsiah biepiepa hawhta zawpakhô hnei awpa nata ABEIPA maisâh liata raopa hlâna hlâ awpa ta cha noh liana chata ABEIPA chakaona hmo zydua cha a chhuahnoh ei ta.

¹⁷ Izarel pathla cha liata a ypa zy chata cha noh liana chata zawpakhô hnei ei ta, viahchhâ thinô pahlao leipa kyhchhi chhao noh sari hmâh hra ei ta.

¹⁸ Hrohsopa Samuel hro no tawhta Izarel râh liata zawpakhô cha hawhna rai chata hmâh beih leipa ei ta; Izarel beipa ahy hmahta Zôsiah nata theihthaipa zy nata Livai sahlao zy nata Zudah zydua nata Izarel zy ta ama hmâpa hawhta a hmâhpa y hra veih ei.

¹⁹ Kô hrawhleicharie Zôsiah a bei kô ta cha zawpakhô cha ama hmâh.

²⁰ Cha zydua khai tawhna chata Zôsiah ta achhyna-o a chhuahnoh khai tawhna chata, Izi beipa Nekô cha Kakhemi adyuh awpa ta Euphrate lâta khy ta Zôsiah chata a kei dyuh ta.

²¹ Châhrasala ano chata, “Nâ Zudah beipa y, kei nata nâ eima tah nawpa ta khâpa ma a y ‘Nama adyuh awpa ta a vy leipa na ta, ei dyuh chiehpa adyuh awpa ta tlao a vy na ta, Khazohpa ta a parah awpa ta bie maniah pie ta, ei chhâh a châpa Khazohpa cha adyuh khâ, a cha pahleipadia pathlei aw,” tahpa ta lyuhchâpa tuah ta.

²² Châhrasala Zôsiah chata kuasai khoh leipa ta, adyuh thei nawpa ta a panano ta, Khazohpa pakah tawhta Nekô bie reipa cha a pyh leipa ta. Mekidô bypi liata adyuh awpa ta sie ta.

²³ Chatawhcha libaw a hmâhpa zy chata Zôsiah cha vaw ka ei ta; abeipa chata a chakaotuhpa zy hnohta. “Na siekhei teh u. hmah thata ei phao haw,” tah ta.

²⁴ Cha lâna chata a chakaotuhpa zy chata talaili tawhtapa cha la ei ta, a talaili hropa liana chata soh ei ta, Zerusale lâta siekhei na ta, thi ta, a mahpaw zy thlâ liata pabu haw ei ta. Zudah mo zydua nata Zerusale mozy ta Zôsiah mâchhie sa ei ta

²⁵ Zeremiah chata Zôsiah cha chakhei ta, hla satuhpa chanô nata chapaw zy chata atahmâ taihta Zôsiah ama chakheina chaphôh cha reih ei ta. Izarel râh liata cha ryhpa ta hnei ei ta, chaphôhtupa liana chata ropa ta a y.

²⁶ Zôsiah hmotaopa hropa zydua, abeipa ryhpa liata a rohpa hawhta a hmotao phapa zy,

²⁷ a hmiatua chaipa nata a hnôh chaipa zy chhao, Izarel nata Zudah Beizy Châbu liata ropa ta y ta.