新基督教圣经研究

圣经文本

 

Ezechiel第12章

学习

   

1 Et factus est sermo Domini ad me, dicens :

2 Fili hominis, in medio domus exasperantis tu habitas, qui oculos habent ad videndum, et non vident, et aures ad audiendum, et non audiunt, quia domus exasperans est.

3 Tu ergo, fili hominis, fac tibi vasa transmigrationis, et transmigrabis per diem coram eis. Transmigrabis autem de loco tuo ad locum alterum, in conspectu eorum, si forte aspiciant, quia domus exasperans est :

4 et efferes foras vasa tua quasi vasa transmigrantis per diem in conspectu eorum : tu autem egredieris vespere coram eis, sicut egreditur migrans.

5 Ante oculos eorum perfode tibi parietem, et egredieris per eum :

6 in conspectu eorum in humeris portaberis, in caligine effereris : faciem tuam velabis, et non videbis terram, quia portentum dedi te domui Israël.

7 Feci ergo sicut præceperat mihi Dominus : vasa mea protuli quasi vasa transmigrantis per diem : et vespere perfodi mihi parietem manu, et in caligine egressus sum, in humeris portatus in conspectu eorum.

8 Et factus est sermo Domini mane ad me, dicens :

9 Fili hominis, numquid non dixerunt ad te domus Israël, domus exasperans : Quid tu facis ?

10 Dic ad eos : Hæc dicit Dominus Deus : Super ducem onus istud, qui est in Jerusalem, et super omnem domum Israël, quæ est in medio eorum.

11 Dic : Ego portentum vestrum : quomodo feci, sic fiet illis : in transmigrationem et in captivitatem ibunt.

12 Et dux qui est in medio eorum, in humeris portabitur, in caligine egredietur : parietem perfodient, ut educant eum : facies ejus operietur, ut non videat oculo terram :

13 et extendam rete meum super eum, et capietur in sagena mea : et adducam eum in Babylonem, in terram Chaldæorum : et ipsam non videbit, ibique morietur.

14 Et omnes qui circa eum sunt, præsidium ejus, et agmina ejus, dispergam in omnem ventum, et gladium evaginabo post eos.

15 Et scient quia ego Dominus, quando dispersero illos in gentibus, et disseminavero eos in terris.

16 Et relinquam ex eis viros paucos a gladio, et fame, et pestilentia, ut enarrent omnia scelera eorum in gentibus ad quas ingredientur, et scient quia ego Dominus.

17 Et factus est sermo Domini ad me, dicens :

18 Fili hominis, panem tuum in conturbatione comede, sed et aquam tuam in festinatione et mœrore bibe.

19 Et dices ad populum terræ : Hæc dicit Dominus Deus ad eos qui habitant in Jerusalem, in terra Israël : Panem suum in sollicitudine comedent, et aquam suam in desolatione bibent : ut desoletur terra a multitudine sua, propter iniquitatem omnium qui habitant in ea.

20 Et civitates quæ nunc habitantur, desolatæ erunt, terraque deserta, et scietis quia ego Dominus.

21 Et factus est sermo Domini ad me, dicens :

22 Fili hominis, quod est proverbium istud vobis in terra Israël, dicentium : In longum differentur dies, et peribit omnis visio ?

23 Ideo dic ad eos : Hæc dicit Dominus Deus : Quiescere faciam proverbium istud, neque vulgo dicetur ultra in Israël : et loquere ad eos quod appropinquaverint dies et sermo omnis visionis.

24 Non enim erit ultra omnis visio cassa, neque divinatio ambigua in medio filiorum Israël,

25 quia ego Dominus loquar, et quodcumque locutus fuero verbum, fiet, et non prolongabitur amplius : sed in diebus vestris, domus exasperans, loquar verbum, et faciam illud, dicit Dominus Deus.

26 Et factus est sermo Domini ad me, dicens :

27 Fili hominis, ecce domus Israël dicentium : Visio quam hic videt, in dies multos, et in tempora longa iste prophetat.

28 Propterea dic ad eos : Hæc dicit Dominus Deus : Non prolongabitur ultra omnis sermo meus : verbum quod locutus fuero, complebitur, dicit Dominus Deus.

   

来自斯威登堡的著作

 

Apocalypsis Revelata#50

学习本章节

  
/962  
  

50. "Et Vox Ipsius tanquam Vox aquarum multarum," Significat Divinum Verum Naturale. - Quod "Vox," cum a Domino, significet Divinum Verum, videatur supra (37); quod "Aquae" significent vera, et in Specie vera naturalia, quae sunt cognitiones ex Verbo, constat ex multis locis in Verbo, ex quibus sequentia solum adducentur:

"Plena est Terra scientia Jehovae, sicut Aquae mare contegunt," (Esaias 11:9);

"Tunc haurietis Aquas cum laetitia ex fontibus salutis," (Esaias 12:3);

"Qui ambulat in justitiis, et loquitur rectitudines, Panis dabitur et Aqua fidelis," (Esaias 33:15-16);

"Pauperes et egeni quaerentes Aquam, sed non; lingua eorum siti defecit: aperiam super clivis fluvios, et in medio vallium fontes ponam, desertum in stagnum Aquarum, et terram siccam in scaturigines Aquarum, ut videant, agnoscant, attendant et intelligant," (Esaias 41:17-18, 20); 1

"Effundam Aquas super sitientem, et fluenta super aridam, effundam Spiritum Meum," (Esaias 44:3);

"Exorietur in tenebris lux tua, ut sis sicut hortus irriguus, et sicut exitus Aquarum, cujus Aquae non mentientur," (Esaias 57:10, 11); 2

"Duo mala fecit populus Meus, Me deseruerunt, Fontem Aquarum vivarum, ad excidendum sibi foveas, quae non continent Aquas," (Jeremias 2:13);

"Magnates miserunt minorennes Aquae causa, venerunt ad foveas, nec invenerunt Aquas, reversa sunt vasa eorum vacua," (Jeremias 14:3);

"Deseruerunt Fontem Aquarum vivarum Jehovam, (Jeremias 17:13); 3

"Cum fletu venient, et, cum fletu adducam eos, ducam eos ad fontem Aquarum in via recti," (Jeremias 31:9);

"Frangam baculum Panis, et Aquas in mensura et stupore bibent, ut contabescant propter iniquitates," (Ezechiel 4:16-17; 12:18-19; Esaias 51:14);

"Ecce dies venient, quibus immittam famem in terram; non famem ad panem, nec sitim ad Aquas, sed ad audiendum Verbum Jehovae; vagabuntur a mari ad mare, et discurrent ad audiendum Verbum Jehovae, nec invenient: in die illo deficient virgines et juvenes siti," (Amos 8:11-13);

"In die illo exibunt Aquae vivae ex Hierosolyma," (Sacharias 14:8); 4

"Jehovah Pastor meus, ad Aquas quietum deducet me," (Psalm. 23:1-2); 5

"Non sitient. Aquas e Petra effluere faciet illis, et findet Petram ut effluant Aquae," (Esajas 48:21); 6

"Deus, mane quaero Te, sitit anima mea, lassus sine Aquis," (Psalm. 63:2 (B.A. 1));

"Jehovah mittit Verbum, spirare facit ventum, ut fluant Aquae," (Psalm. 147:18-19)

"Laudate Jehovam Caeli caelorum, et Aquae quae desuper Caelis," (Psalm. 148:4);

Jesus ad fontem Jacobi sedens dixit mulieri, "Omnis qui biberit ex hac Aqua, 7 sitiet iterum; qui vero biberit ex Aqua, quam Ego dabo, non sitiet in aeternum; et Aqua quam Ego dabo, fiet in eo fons Aquae salientis in vitam aeternam," (Johannes 4:7-15);

"Jesus dixit, Si quis sitiverit, venito Me, et bibito; quisquis credit in Me, sicut dicit Scriptura, flumina ex ventre illius fluent Aquae viventis," (Johannes 7:37-38); 8

"Sitienti dabitur ex fonte Aquae vitae gratis," (Apocalypsis 21:6);

"Ostendit illi fluvium Aquae vitae exeuntem e throno Dei et Agni," (Apocalypsis 22:1);

"Spiritus et Sponsa dicunt (Veni), et qui audit dicat Veni, et qui sitit veniet, et qui vult accipiet Aquam vitae gratis," (Apocalypsis 22:17);

Per "Aquas" in his locis intelliguntur vera; unde patet quod per "vocem aquarum multarum" intelligatur Divinum Verum Domini in Verbo, pariter in his locis:

"Ecce gloria Dei Israelis venit ex via Orientis, et vox Ipsius sicut Vox Aquarum multarum, et terra illustrata est a Gloria Ipsius," (Ezechiel 43:2); 9

"Audivi vocem e Caelo, tanquam Vocem Aquarum multarum," (Apocalypsis 14:2);

"Vox Jehovae super Aquis, Jehovah super Aquis multis," (Psalm. 29:3). 10

Cum scitur quod per "Aquas" in Verbo intelligantur Vera in naturali homine, constare potest quid significatum est per Lavationes in Ecclesia Israelitica; et quoque quid significatur per Baptismum; et quoque per haec Domini verba apud Johannem:

"Nisi homo generatus fuerit ex Aqua et Spiritu, non potest ingredi in Regnum Dei," (3:5);

"ex Aqua" significat per Vera, et "ex Spiritu" significat Vitam secundum illa. Quod "Aquae" in opposito sensu significent falsa, videbitur in sequentibus.

脚注:

1. 17, 18, 20 pro "17, 19, 21"

2. 10, 11 pro "10"

3. xvii. pro "xvi."

4. 8 pro "3"

5. 1, 2 pro "2"

6. Esaj. pro "Psalmus."

7. Aqua pro "qua"

8. 37, 38 pro "27, 28"

9. 2 pro "3"

10. 3 pro "23"

  
/962  
  

©2024 New Christian Bible Study Corporation. All rights reserved. Printed from newchristianbiblestudy.org