1
A noh hro viata cha uit sâhhria daihti nota Sasawna chata mie taw phaohpa ta a lahpinô a kei hmô ta; “Chhôhpadâhpa chhôh liana haota ei lahpinô lâta ei kei ngia aw na,” tah ta. Châhrasala a paw ta a ngia awpa pasai leipa ta."
2
A paw chata, “ 'Ano he a hao kaw khiah chi ma, tah na ta; chavâta na viasa ei pie haw, a nawhtapa he ano hlâta a hmi pha via vei mâ? Ano vyuhpa ta ngiachhiepata ta tlao hnei thlâh ha teh,” tah ta.
3
Sasawna ta a hnohta, “Atahmâ he cha Philistina mozy peina hria hra aw sala pasipa châ aw va na,” tah ta.
4
Chatanachata Sasawna chata changie za thôh kei patu ta, meirei la ta; ama chaolahmei nata ama chaolahmei cha patao ta, ama chaolahmei likawh chyu liata meirei cha soh chyu ta.
5
Chatawhcha meirei zy cha a pakai pata nahta Philistina mo sâh a duahpa hry liana chata parâsa chaimâh ta, sapiah nata sâh a duahpa zy cha ôli thih chhao taih kâ khai ta.
6
Philistina mozy chata, “Ahy taopa ma a châ tly?” tah ei ta. Âmo chata, “Sasawna, Timna khihpa piahpa taopa a châ, a lahpinô chhu ta, a viasapa kha a pahneisapa vâta,” tah ei ta. Philistina mozy chata khy ei ta ama paw saw ta mei ta rao sao haw ei ta,
7
Sasawna ta ama hnohta, “He hawhta nama tah khiahtala, nama chô liata phuh la tua hra aw na ta, cha khai tawhna chata tao khao aw va na,” tah ta.
8
Chatawhcha thata a dyuh ta, thie chaimâh ta, chatawhcha zu ta, Etama lôpanô kaipa likawh ta y ta.
9
Philistina mo cha khy ei ta, Zudah râh liana chata ariena su tao ei ta, Lehi su liana chata a dyuh ei ta.
10
Chatawhcha Zudah râh liata chyhsa zy chata, “Kheihtazie ta ma maniah adyuh awpa ta namâ vy,” tah ei ta. Âmo chata, “Sasawna chahrypa ta eima chô liata a taopa haw hra ta, a chô liata tao hra awpa ta eimâ vy,” tah ei ta.
11
Chatanachata Zudah râh liatahpa chyhsa sâh thôh Etama lôpanô kaipa likawh lâna chata zu ei ta, Sasawna hnohta, “Philistina mo he eima chô liata ryureituhpa zy ama châ tahpa pahno va chi mâ? Kheihta zie ta he hawhta eima chô liata hmo a vaw taopa ma na châ tly?” tah ei ta. Ano chata ama hnohta, “Ei chô liata ama taopa hawh hra ta, ama chô liata ei tao haw hra,” tah ta.
12
Âmo chata a hnohta, “Nâma he chahrypa ta Philistina mo ku liata pie awpa ta eimâ zu,” tah ei ta. Sasawna ta ama hnohta, “Nâmo ta eina thie lei awpa eichi ta, ei hnohta chhie a sa khâh teh u,” tah ta.
13
Âmo chata a hnohta, “Thie bao va, anodeikuacha khâchâ cha chahry aw pi ta, ama ku liata eima cha pie aw; cha thie cheita aw ma pi,” tahpa ta reih ei ta. Chatanachata khawhri thiehpa miano ta chahry ei ta, lôpanô tawhtapa cha khykhei haw ei ta.
14
Lehi su a tlô nahta Philistina mo ta vaw dy ei ta, thata awh ei ta; ABEIPA Thlahpa cha a chô liata thata vaw tlô ta, a bâh chahryna khawhri cha, lâh ri mei ta a kâ pachhôpa hawhta vaw châ ta, a chahryna zy cha a ku tawhtapa cha tla ta.
15
Alâ kâ ru thiehpa hmô ta, paza ta, la ta, cha chata chyhsa sâh kha tusao ta.
16
Chatawhcha Sasawna chata,“Alâ kâ ru ta, ei pacho hôlô,alâ kâ ru ta chyhsa sâh kha ei tusao,”tah ta.
17
Bie a rei khai pata nahta, a kâ ru chabapa cha thy ha ta; cha su cha Ramalehi tah haw ei ta.
18
Chatawhcha a dâh vaw phi ngaita ta, ABEIPA pado ta, “Nâma ta na chakaotuhpa ku he hmâpa ta rôhnah ngaitapa ta na pachha haw chi ta; atahmâ he dâhphipa ta thi thlâh ha awpa ta chopawtai leipa sahlao ku liana heta ei pao thlâh ha aw mâ?” tah ta.
19
Khazohpa ta Lehi su liata khaotlôh a ypa cha sôkha ta patlaw chheih ta, ti vaw pua ta; cha a doh pata nahta, a palôhrupa tha vaw tlô haw heih ta, tha thiehpa hnei ha ta. Chavâta cha moh cha Enhakôre “tahpa a châ; atahmâ taihta Lehi su liana chata y thlâh ha ta.
20
Sasawna ta Philistina mo daihti nona chata Izarel zy chô liata kô syno ryu a reih.
