1
Chatanachata Temani chyhsa Elipha chata a chhy ta:
2
“Chyhsa sopa ta novâhna hrao leipa hmâpa ta a chhy ta, nochhi thlih ta a pyh a pabie aw ma?
3
Bie phahnai leipa hmâpa ta tlyma. bie rei phana hnei leipa hmâpa ta tlyma a reih aw ma?
4
Khazohpa china cha pahlei chi ta. Khazohpa hmiakô liata achhyna châ na pakhâ.
5
Na sia leina chata na pakah cha pachu ta. haidihaiduana rei na hmâh he.
6
Keima châ leipa ta na pakah tlaita thai lei a cha pachâsa; na hmao tlai chata a cha sei.
7
“Chyhsa a pih tua chaipa na châ rai ma? Cha khiahta, tlâhzy y hlâta na pih haw ma?
8
Khazohpa bie nyupa cha na pahno ma? Nama châta dei sona cha a châ ma?
9
Eima pahno leipa khâpa ma na pahno hlei? Eima pahno pasia leipa khâpa e na pahno hlei?
10
Eima hry liana heta sâ pawhpa nata machâ ngaitapa, na paw hlâta uhthei viapa eima y.
11
Na châta Khazohpa thlahpalôhna he a chyh tu ha ma? Reih nai ngaitapa ta a cha tahpa he?
12
Khazia na palôh chata cha paviasa ta, na mo a cha parâsa tly,
13
na palôh ta Khazohpa adyuh chi ta, cha hawhpa bie cha a cha pareisa tly?
14
Pathaihpa ta châ pata cha chyhsapa he khâpa e a châ? Chanô ta a sapa cha a pha paki rai mâ?
15
Chyhsa pathaihpa zy chô liata a ngâna pahnieh leipa ta, na mohmô liana cha avâ chhao pathai vei;
16
chyhsa pasichhihpa nata puapa châ chiehpa, hmoparaona ti a dohpa hawhta dopa cha a châ lei pachai dia!
17
“Na nahthlie teh, ei cha pamosa awna, ei hmôpa cha ei phuah aw na.
18
(chyhsa sopa zy ta ama reipa cha. ama mahpaw zy ta nyu veih ei.
19
ano hnoh deita ta râh ama piepa cha. chyhsa ahy hmah a hlao leina cha).
20
Hmoparaopa chyhsa chata a hro chhôhta pasa tao ta, pasaipa-ituhpa chata kô taipa hluh zie chhao cha.
21
Chichhipa pyuzy cha a nahkhao ta thei ta; a locho nota hraotuhpa vaw siehnao ta.
22
Zohna tawhta pua awpa a pangiasa vei, a hmâh tyhpa cha zaozi tlao a châ.
23
A sapa ni awpa ta vâkhieh zy chata hâ thlâh ei ta. zohna noh cha amâ chiehpa ta a ku liata a y tahpa a pahno;
24
rietheina nata hupona chata pachisa ta; abei adyuhna chata amâ chiehpa ta a pahniepa hawhta ano pahnie ei ta.
25
Khazohpa chôta a ku pazawh ta. Atotaotheipa chôta palai ngaita kawpa vâta.
26
Tah raruahpa ta ano chô liata a râ ta, a vyhphao liasaopa chhapapi nah chata;
27
a thawpa ta a hmia pahly ta. a chai liata a thaw patoh ta.
28
cha chyhsa cha khihpi zy a latuhpa châ ta. o hneituhpa zy ama râ tawhta ozy patu ta, châhrasala adyuhna chata khihpi zy nata ozy cha a parao khai aw;
29
hneirôh ngâthlâh leipa aw ta. a hneinachhao kha y thlâh ha aw vei, a nohpahlipa taih chhao a leidia aw.
30
Zohna tawhta pua leipa aw ta; mei palei chata a chiah zy paliepa ta raoh aw ta. a pakah husona a sie syulyu aw.
31
Anosasyh a dôpa ta a ruapa liata a pahnieh khah se. a hmô awpa cha khâpama a châ leipa châ tlôh.
32
A daihti tlô hlâta patlô aw ta, a chiah cha hroh aw vei.
33
Krezôh hawhta a heipa pazô aw ta, ôli kô a paw a chakhy hra aw.
34
Khazohpa a pachâ leipa zy cha leidia aw ei ta, panaopapana poh-o zy cha mei ta a kâ khai aw.
35
Hmo peipa taona pachâ ei ta, hmochhiepa tao ei ta, ama palôh ta haipa amâ chhuahdy,” tah ta.
