Zeremiah第48章

¹ Môaba thâtih Pheisaihzy ABEIPA Izarel Khazohpa chata he tana heta a tah: “Nebô hu a po na, roryhrapa ta a y aw! Kiriatha cha pamaophyupa ta a y haw, pasipa châ ta; Misaka cha pamaophyupa nata paraopa ta a y haw;

² Môaba moh pathâhna a lei haw. Hesabaw liata a raona awpa pachiapa ta a vy teh u; ‘Phopi a châna tawhtapa pahlei ei suh u!’ tah ei ta. Hy Madame khih y, nâ chhao pahleipadiapa ta châ aw chi ta; zaozi ta a châ chadai aw.

³ “Hôranai tawhta awna pyu,‘Hraona nata paraona ru ngaitapa tlai cha!’

⁴ Môaba pahleipadiapa ta a y; a sawnawh chapa pyu theipa ta a y.

⁵ Luhi chakhâ liata chapa ta khy ei ta; Hôranai chhutla liata leidiana awhpa pyu nôpo chhihpa ama thei.

⁶ A râ ula! Nama hrona paboh teh u! Râhpathohpa râhhmâhpa alâ hawhta y teh u!

⁷ Na raihria nata na ryubyh na ngâpa vâta, nâ chhao patupa ta na y aw; Khemaw cha sei ta a chhipa châ aw ta, atheihthaipazy nata abeisawzy chhaota.

⁸ Khihpi to liata paraotuhpa a vaw tlô aw, khihpi miakha hmahta khôkhâh aw vei; bypi râh chhao cha a leidia aw, bypi chhao paraopa ta a châ aw, ABEIPA ta a rei hawpa hawhna tlai khata.

⁹ “A zaw syulyu theina awpa Môaba cha mathlaw pie ula; a khihpizy cha roryhrapa ta y aw ta, pahrâtuhpa y leipa ta.

¹⁰ “Diathlâ ngaitapa ta ABEIPA rai a hriatuhpa cha chhiesapa ta y sala, thisaih papua awpa ta a zaozi a hmâh khoh leituhpa cha chhiesapa ta y mawh sy.

¹¹ “A thyutlia noh tawhta Môaba cha khotalaipa ta y ta,chhôhmopa ta y ta; bei hropa ta a paruatuhpa chhao atyh leipa ta, sei ta y beih hra vei; a pahâpa ualua ta pahâ thlâh hapa ta, a roh chhao a nano hlei vei.

¹² “Chavâta noh cha a vaw tlô na, a paruatuh awpa cha vaw tuah aw na ta, âmo ta ama parua aw ABEIPA ta a tah, abeihzy cha parua aw ei ta, a ozy cha parao aw ei ta.

¹³ Izarel chhôhkhapazy ta ama ngâpa Bethel ama zakheipa hawhta Môaba chata Khemô a zakhei hra aw.

¹⁴ “Adyuhna chata chyhsa riahphapa nata thatlôpa eima châ,’ Kheihta e nama tah tly?

¹⁵ Môaba cha roryhrapa ta y ta, a khihpizy lâta pahleipadiatuhpazy khy ei ta, satlia phapa zydua ama pao saohaw, Abeichaipa, a moh Pheisaihzy ABEIPA ta a tah.

¹⁶ Môaba vâchhiena cha tlô hai ta, a pasa taona awpa a hnia na.

¹⁷ Nâmo a chheipâh liatahpazy ta ano mâchhiesapa ta, âmo a pahnopa zydua chhaota; Chôchahrei pachyupa nata chôchahrei rôhnahpa a thlie haw hih,’ tah teh u.

¹⁸ “Hy, na sawchanônô Dibô a pahrâpa y, na rôhnahna chôsai la, dâhphipa ta atyuh teh. Môaba a hraotuhpa chata châ dyuh ta, na kuhzy cha parao haw tlôh ta.

¹⁹ Hy Arôera a pahrâtuhpa y! Lâpi kiah liata a duah la, moparu teh. A râpa chapaw nata a râ pathlahpa chanô hiahhri la,‘Kheihta e a châ tly?’ tahpa ta.

²⁰ Môaba pamaophyupa a châ haw, vaw rao haw tlôh ta; sa ngâpa ta cha teh u! Môaba pathaiparohsapa a châ haw,tahpa Arnaw liata phuah teh u.

²¹ “Râh bypa chô liata pachiana vaw tlô ta, Hôlô liata zy, Zahza liata zy, Mepha liata zy nata

²² Dibô liata zy, Nebô liata zy, Bediblathai liata zy,

²³ Kiriatha liata zy, Bekamal liata zy, Bemeôna liata zy nata

²⁴ Keriô liata zy, Bôzrah liata zy nata Môaba râh liata khihpi zydua, a hlapa nata a hniapa liata zy chhao.

²⁵ Môaba ki cha tai pathlapa châ ta, a bâh cha paraopa a châ haw, ABEIPA ta a tah.

²⁶ “Ano cha parisa teh u, ABEIPA chô liata anosasyh ta a palai tlôh ta; chatawhcha Môaba cha ano pali liata a hlao aw ta, pahneisaopa ta a y hra aw.

²⁷ Izarel cha na châta pahneisaona châ haw vei ma? Paruhmâhpa hry liata zy a hlao ma? Ano thâtih na reipa maihta na luh chahua tlôh chi ta.

²⁸ “Môaba a pahrâpazy saih u, khihpazy a râsai ula, lôkâhpa likawh ta pahrâ teh u! Vachhuh lôpu kiah liata a bu a tao tyhpa hawhta y teh u.

²⁹ Môaba apalaina cha eima thei haw, a palai chaimâh na, a pasâhsa zie zy, â palaizie zy, a sâlâ zie zy, nata â khoh zie zy cha.

³⁰ A hiehâhna cha khâpa hmah châ vei; tahpa ei pahno, a palaina zy chata khâpa hmah châ vei, ABEIPA ta a tah.

³¹ Chavâta Môaba chô liata thata sâh aw na ta; Môaba tlokhuh ei chakhei aw; Kirhere chyhsazy chata mâchhie ei sa aw.

³² Zaza chakheipa hlâta pha via ta, ei cha chakhei aw,Hy Sibmah krezôh y! Na chiahzy cha tilaipi chô liata a zaw ei ta, Zaza tilaipi taih chhao a tlô na; na nopi noh theilâpa nata kre theizy paraotuhpa ta a byh na.

³³ Lyu phapa nata Môaba râh tawhtapa thâtihphana nata alyna a lei khai haw; kre saona khaoh liata kresawti ei pachhâ sa haw; ahy hmah ta thaphapa ta awh pata tlykhao aw vei; awh pa pyu cha thaphana pyu châ khao aw vei.

³⁴ “Hesabaw nata Eliale liata awh ei ta, Zaha taih tlaita ama ao ama papua, Zawa tawhta Hôrônai taih Ekla-sheli taih chhaota. Nimri ti zy chhao roryhrapa ta a y aw

³⁵ Môaba atheihna su hmo a hlâtuhpa nata a khazohzy chata rohpahâhpa a raotuhpa ei pahlei aw, ABEIPA ta a tah.

³⁶ Chavâta râhhmâh hawhta ei pathipalôh Môaba chata paroh ta, Kirhere chyhsazy chata râhhmâh parohpa hawhta ei pathipalôh paroh ta; chavâta a hneina hmo a hnei hawpazy kha a lei khai aw.

³⁷ “Luh to papôlôpa châ ta, kâhmi to taipa a châ. ku zydua âpa châ ta, chai zy liata latho pala poh y chyu ta.

³⁸ Môaba o chô zydua liata, othliah liata zy, su to liata chaphôhtuna y ta; Môaba cha bei phahnai khao leipa hawhta ei pakei khai haw. ABEIPA ta a tah.

³⁹ Pakeipa ta a y haw dia! Ama sâh ngâna zie rimâ cha! Môaba cha maophyupa ta a vaw kua haw cha! Chatanachata Môaba cha a chheipâh liatahpa zydua chata pahneisaona nata rarôh yna a vaw châ haw.”

⁴⁰ ABEIPA chata he tana heta tah tlôh ta: “Pahmô hawhta â zaw aw, Môaba chô liata a mathlaw a pakai aw;

⁴¹ khihpizy cha lapa châ ta, a kuhzy cha pahlaw ei ta. Cha noh liana chata Môaba riahphapazy pathipalôh cha chanô sawzeipa pathipalôh hawh tlaita a châ aw;

⁴² Môaba a leidia aw, phopi tloh aw vei, ABEIPA lâta a palaipa vâta.

⁴³ Hy Môaba a pahrâtuhpa y, china kyh zy, khaotlôh nata khohei zy na chô liata a tlô na! ABEIPA ta a tah.

⁴⁴ China a râsaituhpa châ khaotlô liata tla aw ta, khaotlô tawhta a puapa cha, khohei liata â ao aw. A hriena kô patlôsa tlôh aw na ta a chô liata, Môaba chô liana tlai chata, ABEIPA ta a tah.

⁴⁵ “Hesabaw nohpahli liata a râpa sahlao thazeipa ta amâ duah aw; Hesabaw tawhta mei pua ta, Sihaw liahlia tawhta mei palei; Môaba baih hmi kâ khai ta, kalihpi a topa sahlao laki sazy chhao.

⁴⁶ Hy Môaba y, na hu a po na! Khemô chyhsazy lei haw ei ta; na sawchapawzy sei ta a chhipa ta, na sawchanôzy seichâna ta ama y.

⁴⁷ Châhrasala noh hnôh lânazy chata Môaba seichâna cha ei pali aw, ABEIPA ta a tah.” He rakha he Môaba kyh a châ na.