417. "Quatuor angelos stantes super quatuor angulis terrae." - Quod significet Divinum a Domino procedens in universo mundo spirituali, constat ex significatione "angelorum", quod sint Divinum a Domino procedens (de qua supra, n. 130(a), 200, 302): et ex significatione "quatuor angulorum terrae", quod sit universus mundus spiritualis; per "quatuor angelos" enim significatur mundus spiritualis, ex causa quia ibi aeque sunt terrae sicut in nostra tellure; sunt enim ibi aeque montes, colles, petrae, planities, valles et plura, ut supra aliquoties dictum est; et quia de ultimo judicio super omnes in mundo spirituali in Apocalypsi agitur, et hic de separatione bonorum a malis ibi, inde est quod per "terram" ille mundus intelligatur. Quod per "terram" significetur ecclesia, ut saepius prius dictum est, est quia facies terrae in mundo spirituali est prorsus sicut facies ecclesiae apud spiritus et angelos ibi; facies pulcherrima ubi angeli superiorum caelorum habitant, et quoque pulchra ubi angeli inferiorum caelorum, et impulchra ubi spiritus mali; ubi enim angeli habitant, sunt paradisi, horti, floreta, palatia, et omnia in caelesti forma et harmonia, ex qua amoenitates ( ¹ ineffabiles) effluunt, et animos intime oblectant; at apud malos spiritus sunt paludinosa, saxosa et sterilia omnia, et habitant in tuguriis quae aspectu vilia sunt, praeter in cavernis et speluncis.

[2] Haec dicta sunt ut sciatur quod per "terram" in proximo sensu intelligatur mundus spiritualis; nec alia terra potuit apparere Johanni, quia visa illi est cum fuit in spiritu; quando etiam homo est in spiritu, tunc nihil quod in nostra tellure est videt, sed quod in mundo spirituali; inde est, quod etiam viderit quatuor angelos, et hos stantes super quatuor angulis terrae istius. Quod visi sint "quatuor angeli", est quia per illos stantes in "quatuor angulis significatur Divinum a Domino procedens in universo mundo spirituali; universum enim illum mundum faciunt quatuor plagae, nempe orientalis, occidentalis, meridionalis et septentrionalis, ita enim divisus est ille mundus; in orientali plaga habitant qui in bono amoris in Dominum sunt, similiter in occidentali, sed illi in bono amoris claro quia in interiori, hi in bono amoris obscuro quia in exteriori; in plaga meridionali habitant qui in luce veri clara sunt, in septentrionali qui in luce veri obscura: (sed de his plagis videatur in opere De Caelo et Inferno 141-153, ubi de illis actum est): et quia omnia se referunt ad bonum amoris et ad verum ex illo bono, seu in genere ad bonum et verum, ideo per quatuor illas plagas etiam intelliguntur omnia caeli et ecclesiae. Illae plagae etiam in Verbo intelliguntur per "quatuor ventos", hic etiam per "quatuor angulos." Inde patet quod angeli non visi sint stare in quatuor angulis terrae, sed in quatuor plagis. Quod plagae etiam dicantur "quatuor anguli", est quia per "angulos" significantur extrema, et "extrema" significant omnia, quia includunt illa.

[3] Quod "anguli" significent plagas, constat ex locis in Verbo ubi plagae describuntur per "angulos"; ut in his sequentibus:

Apud Mosen,

"Pro Habitaculo facies viginti asseres pro angulo meridiei versus austrum, ... lateri Habitaculi secundo versus angulum septentrionis viginti asseres", et sic porro (Exodus 26:18, 20; 27:9, 11; 36:21, 23, 25 ² ):

"pro angulo meridiei" est pro plaga meridionali, et "versus angulum septentrionis" est versus plagam septentrionalem, nam erant viginti asseres utrobivis. Similiter apud Ezechielem,

"Juxta terminum Danis ab angulo orientis usque ad angulum occidentis, Ascher unus; et inde juxta terminum Ascheris ab angulo orientis et usque ad angulum Versus occidentem, ... et sic porro (48:1-8);

apud eundem,

Hae mensurae; angulus septentrionis quingentae et quatuor millia; et angulus meridiei totidem, et ab angulo orientis totidem, angulus occidentis totidem, juxta terminum ad angulum orientis versus occidentem, et sic porro (48:16, 17, 23-25, 26-28, 33, 34; et quoque cap. 47:17-20);

apud Mosen,

Metiemini extra urbem angulum Versus ortum duo millia ulnarum, et angulum meridiei totidem, et angulum occidentis totidem, et angulum septentrionis totidem (Numeri 35:5);

et praeterea apud Josuam (Cap. 15:5; 18:12, 14, 15, 20): hic per "angulum orientis", "meridiei", "occidentis" et "septentrionis intelligitur latus ad plagam orientalem, meridionalem, occidentalem et septentrionalem. Ex quibus patet quod per "quatuor angelos stantes super quatuor angulis terrae" non intelligatur super quatuor angulis ejus, sed in quatuor plagis ejus: similiter alibi in Apocalypsi,

Satanas "exibit ad seducendum gentes quae in quatuor angulis terrae" (20:8).

[4] Quod "quatuor anguli" dicantur, et non quatuor plagae, est quia etiam per "angulos" significantur omnia, quoniam sunt extrema; extrema enim comprehendunt omnia quae a centro ad ultimas peripherias sunt, nam sunt ultimi termini.

Inde erat quod super quatuor angulis altaris ponerentur quatuor cornua, et super illis funderetur sanguis, et sic totum altare expiaretur (Ut patet in Exodo, cap. 27:2; 29:12; 30:2, 3, 10; 38:2; Levit. 4:7, 18, 25, 30, 34; 16:18, 19; Ezech. 41:22; cap. 43:20 ³ ).

[5] Quod per "angulos" significentur omnia, quia extrema, ex causa de qua supra, quia extrema includunt et comprehendunt omnia, constat manifeste ex quibusdam statutis apud filios Israelis; ut

Quod non circumducerent seu raderent angulum capitis sui (Leviticus 19:27);

Quod non raderent angulum barbae suae (Leviticus 19:27; 21:5);

Et quod non ⁴ consummarent angulum agri sui cum meterent (Leviticus 19:9; 23:22).

Cur haec statuta illis data sunt, non sciri potest nisi sciatur quid significat "crinis capitis", quid "barba", quid "ager", et simul quid "angulus." Per "crinem capitis" et "barbae" significatur ultimum vitae hominis, quod sensuale corporeum vocatur; et per "agrum" significatur ecclesia, ac per "messem" verum doctrinae: quare repraesentabatur per illa quod extrema conservarentur, quia significant omnia: nisi enim extrema sunt, etiam media non conservantur sed diffluunt; sicut comparative nisi cutes forent circum hominem, diffluerent interiora: similiter in omni re, ita quoque in illis quae significantur per "crinem capitis", per "barbam" et per "messem agri": (quod per "crinem capitis" significetur extremum vitae hominis, quod vocatur sensuale corporeum, videatur supra, n. 66; et quod per "barbam" similiter, in Arcanis Caelestibus, n. 9960:

quod "extrema seu "ultima" significent omnia in complexu, ita totum, n. 10044, 10329, 10335): et quia "ager" significabat ecclesiam, ac "messis" vera ejus, inde per "non consummare angulum agri tui cum metis" significatur conservatio omnium quae significantur per "messes agri."

[6] Quod "anguli" significent omnia, quia extrema, etiam constare potest a sequentibus his locis:

Apud Mosen,

"In extremos angulos ejiciam eos, cessare faciam ab homine memoriam eorum" (Deuteronomius 32:26):

ejicere in extremos angulos" significat deprivari omni bono et vero; quare etiam dicitur "Cessare faciam ab homine memoriam eorum", per quod significatur ut non amplius eis sit aliquid vitae spiritualis; quod fit cum homo solum in ultimis vitae est, quod vocatur sensuale corporeum, in quo solo sunt plerique qui non aliquid vitae spiritualis adepti sunt; fiunt enim tunc non absimiles bestiis, hae enim nec in alia vita sunt; cum differentia quod homo quia natus homo possit loqui et ratiocinari; sed hoc facit ex fallaciis sensuum, seu extremorum naturae mundi et corporis: hoc intelligitur hic per "ejici in extremos angulos."

[7] Apud Jeremiam,

"Erunt cameli... in praedam, et multitudo pecorum... in spolium, et dispergam eos in omnem ventum, in abscissos anguli, et ab omnibus transitibus ejus adducam exitium" (49:32):

haec dicta sunt de devastatione Arabiae et Chazoris a rege Babelis; ac per "Arabiam" et "Chazorem" significantur cognitiones boni et veri, et per "regem Babelis" malum et falsum vastans; vastatio omnium scientificorum confirmantium et cognitionum boni et veri, significatur per quod "erunt cameli eorum in praedam, et multitudo pecorum in spolium"; "cameli" sunt scientifica confirmantia, et "pecora" sunt cognitiones boni et veri: vastatio quoad omnia boni et veri, usque ut non sit reliquum, significatur per "Dispergam eos in omnem ventum, in abscissos anguli"; "abscissi anguli"; sunt extrema ubi non bonum et verum amplius; quod tunc mala et falsa undequaque irruptura sint, significatur per "Ab omnibus transitibus ejus adducam exitium"; in mundo enim spirituali, ubi mali sunt, ibi undequaque patent viae ab infernis, perque illas irrumpunt mala et falsa inde, et per easdem vias eunt omnes qui in similibus malis et falsis sunt, et se illis consociant. Haec dicta sunt ut sciatur quid intelligitur per "Ab omnibus transitibus adducam exitium": per "esse in praedam" et "in spolium", tum per "dispergere et adducere exitium", significatur devastatio.

[8] Apud ⁵ eundem,

"Ecce dies venientes quibus Visitabo super omnem circumcisum in praeputio, Aegyptum et Jehudam et Edomum, et filios Ammonis et Moabum, et omnes abscissos anguli habitantes in deserto; nam omnes gentes praeputiatae, et omnis domus Israelis praeputiati corde" (9:24, 25 [B.A. 25, 26]):

per "abscissos anguli" hic significantur qui in ecclesiae ultimis separatis ab interioribus sunt; interiora sunt spiritualia; ita qui solum in sensualibus, quae ultima naturalis hominis sunt: (de illis qui mere sensuales sunt, quinam et quales sunt, videatur in Doctrina Novae Hierosolymae, n. 50): quod hi per "abscissos anguli" significentur, est quia per "angulos" significantur plagae mundi spiritualis, et per plagas illas significantur omnia bona et vera caeli et ecclesiae, ut in praemissis dictum est. Habitationes spirituum et angelorum eo ordine ibi succedunt, quod in medio sint qui in summa sapientia et intelligentia, et e medio usque ad ultimas peripherias in minore et minore; et decrescentiae illae sunt prorsus secundum distantias e medio; in ultimis sunt qui non in aliqua, et extra illos sunt qui in malis et inde falsis: hi sunt qui intelliguntur per "abscissos anguli"; et quia ibi deserta sunt, dicitur de illis, "habitantes in deserto." (De decrescentiis illis in mundo spirituali, videatur in opere De Caelo et Inferno 43, 50, 189.) Iidem significantur per "gentes praeputiatas", et per "domum Israelis praeputiatos corde"; per "praeputiatos" significantur qui absque amore et charitate sunt, ita qui absque bono, et inde in amoribus sui et mundi: et qui in his amoribus sunt, illi in ultimis naturalis hominis sunt prorsus separatis a spiritualibus; quare sunt "abscissi anguli habitantes in deserto." Per "Aegyptum", "Jehudam", "Edomum", "filios Ammonis" et "Moabum", intelliguntur omnes qui separaverunt a se bona et vera ecclesiae per amores illos; unde extra illa sunt, ita "abscissi anguli."

Simile significatur per "abscissos anguli" apud Jeremiam (cap. 25:23).

[9] Apud Mosen,

"Orietur Stella ex Jacobo, et surget Sceptrum ex Israele, quod conteret angulos Moabi" (Numeri 24:17):

per "angulos Moabi" intelliguntur omnia quae per "Moabum" significantur; per "Moabum" significantur illi qui in ultimis Verbi, ecclesiae, et cultus sunt; et in opposito sensu, qui adulterant ea per id quod se vertant ad se, ac spectent sui honorem in singulis eorum; quare "anguli Moabi" sunt adulterationes Verbi et inde ecclesiae et cultus, quales sunt apud illos qui tales sunt.

Similia per "angulum Moabi" significantur apud Jeremiam (cap. 48:45).

[10] Apud Zephaniam,

"Dies buccinae et clangoris super urbes munitas, et super angulos altos" (1:16):

"dies buccinae et clangoris" significat pugnam spiritualem, quae est contra falsa et mala; "urbes munitae" significant doctrinalia falsa quae confirmaverunt; et "anguli alti" significant illa faventia amoribus suis: inde patet quid significatur per "diem buccinae et clangoris super urbes munitas et super angulos altos." Apud eundem,

"Exscindam gentes, devastabuntur anguli eorum, desolabo plateas eorum ut non transiens; et devastabo urbes eorum ut non. .. habitans" (3:6):

destructio bonorum omnium ecclesiae, significatur per "Exscindam gentes", et per "Devastabuntur anguli eorum": "gentes" sunt bona ecclesiae, "anguli" sunt omnia ejus quia extrema (ut supra): destructio veritatum doctrinae, significatur per "Desolabo plateas eorum", et per "Devastabuntur urbes eorum;' "plateae" sunt veritates, et "urbes" sunt doctrinalia: destructio totalis usque dum ut non sit aliquod verum et aliquod bonum, Significatur (per) "ut non sit transiens et non habitans", nam "transire" in Verbo dicitur de veris, et "habitare" de bonis.

[11] In Libro Judicum,

"Exiverunt omnes filii Israelis, et congregatus est coetus sicut vir unus a Dane usque ad Beerschebam, ... et constiterunt anguli omnis populi. omnes tribus Israelis, in congregatione populi Dei" (20:1 [, 2]):

quod "constiterint anguli omnis populi in congregatione populi Dei" significet omnes undequaque seu ab omni plaga, patet manifeste ex eo, quod dicatur quod "exiverint omnes filii et omnes tribus Israelis", et quod "congregatus sit coetus a Dane ad Beerschebam"; in sensu autem spirituali per "angulos omnis populi" significantur omnia vera et bona ecclesiae; similiter etiam per "omnes tribus Israelis, a Dane usque ad Beerschebam" significantur illa ab ultimis ad prima; et per "congregationem populi Dei" significatur consultatio de rebus ecclesiae: in historicis enim Verbi ubivis est sensus spiritualis aeque ac in propheticis ejus; quare in sensu historico per "angulos" significantur plagae quales sunt in mundo spirituali, at in sensu spirituali significantur omnia vera ac bolla ecclesiae, ex causa de qua supra.

[12] Ex his constare potest quid significatur per "lapidem anguli" in his locis:

Apud Esaiam,

"Fundabit in Zione lapidem, lapidem probationis, anguli pretii fundationis fundatae" (28:16);

apud Jeremiam,

"Non sument de te lapidem pro angulo, aut lapidem fundamentorum" (51:26 ⁶ );

apud Sachariam,

Ex Jehudah "angularis, ex illo clavus, ex illo arcus belli" (10:4);

apud Davidem,

"Lapis quem rejecerunt..., factus est in caput anguli" (Ps. 118:22 ⁷ ; Matthaeus 21:42; ⁸ Marc. 12:10, 11; Luca 20:17, 18):

"lapis anguli" significat omne Divinum Verum super quo fundatur caelum et ecclesia, ita omne fundamentum; et quia fundamentum est ultimum cui incumbit domus seu templum, ideo significat omnia. Quia per "lapidem anguli" significantur omnia super quibus fundatur ecclesia, ideo dicitur, "Fundabit in Zione lapidem, lapidem... anguli pretii fundationis fundatae", et dicitur "lapis pro angulo", et "lapis fundamentorum"; et quia per "lapidem anguli" significatur omne Divinum Verum super quo fundatur ecclesia, ideo quoque significatur Dominus quoad Divinum Humanum, quia omne Divinum Verum ab Illo procedit. "Aedificantes" seu "architecti" qui rejecerunt illum lapidem, ut legitur apud Evangelistas, sunt illi qui ab ecclesia; ibi ab Ecclesia Judaica, quae rejecit Dominum, et cum Ipso omne Divinum Verum: apud illos enim fuerunt non nisi quam traditiones vanae ex sensu litterae Verbi, in quibus ipsa vera Verbi falsificata et bona adulterata fuerunt.

(Quod "ultima" significent omnia, et unde hoc, videatur in Arcanu Caelestibus, n. 634, 5897, 6239, 6451, 6465, ⁹ 9216, 9824, 9828, 9836, 9905, 10044, 10099, 10329, 10335, 10548.)

각주:

9960. ‘Ad tegendum carnem nuditatis’: quod ¹ significet ne interiora amoris, quae spurca et infernalia, appareant, constat ex significatione ‘tegere’ quod sit facere ne appareant, ex significatione 'genitalium et lumborum, quae hic per ‘carnem nuditatis’ significantur, quod sint interiora amoris conjugialis, nam cum per ‘femoralia’ significantur externa illius amoris, n. 9959, per ‘carnem quam tegunt’ significantur interna ejus; quod ‘lumbi’ significent amorem conjugialem, videatur n. 3021, 4280, 4575, et quoque quod ‘genitalia’, n. 4462, 5050, 5062, et quod ‘caro’ ^{2 3} significet bonum amoris, n. 3813, 7850, 9127; et quia pleraque in Verbo etiam sensum oppositum habent, ita quoque lumbi, genitalia, et caro, ⁴ in quo sensu significant mala, spurca, et infernalia illius amoris, n. ⁵ 3813, 5059; quod hic significent mala, spurca, et infernalia, patet ex eo quod dicatur ‘ad ⁶ tegendum carnem nuditatis’; 'caro nuditatis' hic est quod oppositum est bono amoris conjugialis, quod est jucundum adulterii, ita infernale, de quo in sequentibus.

[2]Quod nuditatem attinet, trahit illa significationem a partibus corporis quae nudae apparent, similiter ac vestes a partibus corporis ⁷ quas investiunt, n. 9827; ideo aliam significationem cum nuditas spectat caput quae est calvities, aliam cum spectat totum corpus, et aliam cum spectat lumbos et genitalia; cum nuditas spectat caput, quae est calvities, significat deprivationem ab intelligentia veri et a sapientia boni, cum spectat totum corpus, significat deprivationem a veris quae fidei, cum autem spectat lumbos ac genitalia, significat deprivationem a bono amoris.

[3] Quod primum attinet, cum nuditas spectat caput quae calvities, quod significet deprivationem ab intelligentia veri et a sapientia boni, constat apud Esaiam,

In die illo detondebit Dominus per regem Aschuris caput, et pilos pedum, et barbam consumet, 7:20;

‘detondere caput’ ⁸ est deprivare veris internis Ecclesiae, ‘detondere pilos pedum et consumere barbam’ ⁹ deprivare veris externis ejus; per ‘regem Aschuris’ est per ratiocinia ex falsis; cuivis patet quod per regem Aschuris non detonderetur caput, nec pilus pedum, nec barba, ¹⁰ et quod usque significativa sint; quod ‘caput’ ¹¹ sint interiora quae sapientiae et intelligentiae, videatur n. 6292, 6436, 9166, 9656, quod ‘rex Aschuris’ sit ratiocinatio, ¹² n. 119, 1186, quod ‘pilus’ sit verum externum Ecclesiae, n. 3301, 5247, 5569-5573, quod ‘pedes’ etiam sint externa seu naturalia, n. 2162, 3147, 3986, ¹³ 4280, 4938-4952, 9406; ¹⁴ quod ‘barba’ sint scientifica sensualia, quae sunt vera ultima, constat a locis in Verbo ubi ‘barba’ nominatur:

[4] apud eundem,

¹⁵ in omnibus capitibus ejus calvities, omnis barba rasa, ¹⁶ 15:2;

similiter:

apud Jeremiam,

Veniet calvities super Gazam, quousque incides te, 47:5:

apud Ezechielem,

Super omnibus faciebus pudor, et super omnibus capitibus calvities; argentum suum in plateas projicient, et aurum in abominationem erit, 7:18, 19;

‘super omnibus capitibus calvities’ pro deprivatione ab intelligentia veri et a sapientia boni; quia id significatur, etiam dicitur ‘argentum suum in plateas projicient, et aurum in abominationem erit’, ‘argentum’ enim est verum quod intelligentiae, et ‘aurum’ est bonum quod sapientiae, n. 1551, 5658, 6914, 6917, 8932; quod non intelligatur calvities super omnibus capitibus, et quod non projicerent argentum in plateas, et quod aurum non erit in abominationem, patet:

[5] apud Moschen,

Dixit Moscheh ad Aharonem et ad Eleazarem et ad Ithamarem filios ejus, Capita vestra non radetis, et vestes vestras non dissuetis, ne moriamini, et universae contioni irascatur, Lev. 10:6:

et apud Ezechielem,

Sacerdotes Levitae non radent caput, et comam suam non demittent, 44:20;

quia Aharon et filii ejus repraesentabant Dominum quoad Divinum Bonum et quoad Divinum Verum, n. 9806, 9807, et quia per ‘caput rasum’ et per ‘vestes dissutas’ significabatur deprivatio illorum, ideo vetitum ¹⁷ erat radere caput, et ¹⁸ dissuere vestes, et ¹⁹ dicitur ‘ne moriamini, et toti contioni irascatur’, per quod significatur quod sic periret repraesentativum Domini quoad Divinum Bonum et quoad Divinum Verum, ita repraesentativum Ecclesiae.

[6] Quia luctus repraesentabat luctum spiritualem, qui est luctus propter deprivationem veri et boni Ecclesiae, ideo in luctu inducebant capitibus ²⁰ calvitiem, ut apud Jeremiam,

Non plangent illos, neque calvities inducetur propter illos, 16:6:

apud Amos, Convertam festa vestra in luctum, et ascendere faciam super omne caput calvitiem; et ponam eum sicut luctum unigeniti, 8:10

et apud Micham, Calvitiem indue, et tonde de propter filios deliciarum tuarum, dilata calvitiem tuam sicut aquila, quia migrarunt a te, 1:16;

‘filii deliciarum’ sunt vera Divina, ‘migratio’ eorum est deprivatio; quod ‘filii’ sint vera, videatur n. 9807.

[7] Secundo, cum nuditas spectat totum corpus quod significet deprivationem ²¹ verorum fidei, constat apud Johannem, Angelo Ecclesiae Laodicensium scribe, Quia ²² dicis quod dives sim, et nullius rei indigeam, cum non scias quod tu sis miser et miserabilis, et egenus, et caecus, et nudus; consulo ut emas a Me aurum igne purificatum, et vestimenta alba ut induaris, ut non manifestetur pudor nuditatis tuae, Apoc. 3: [14, ] 17, 18; ‘angelus Ecclesiae’ est verum Divinum ibi, ‘dicere quod sit dives’ est quod sit in cognitionibus veri et boni, ‘miser, egenus, caecus, et nudus’ est quod usque absque veris implantatis vitae, ²³ ita absque bono, ‘emere aurum igne purificatum’ est comparare sibi bonum, ‘vestimenta alba’ sunt genuina vera fidei ex bono; inde patet ²⁴ quid sit ‘ne manifestetur pudor nuditatis’:

[8] apud eundem,

Ecce venio sicut fur; beatus qui vigilat, et servat vestimenta sua, ut nudus non ambulet, videantque pudorem ejus, Apoc. 16:15;

similiter: apud eundem,

Odio habebunt meretricem, et devastatam facient eam nudamque, Apoc. 17:16;

‘meretrix’ pro illis qui falsificant vera Divina, ‘facere illam nudam’ manifeste pro deprivare illis, nam dicitur ²⁵ devastata et nuda'; ‘devastare’ est deprivare veris.

[9] Per nuditatem etiam significatur ignorantia veri, et per induitionem informatio:

apud Esaiam,

Cum videris nudum, et obtexeris eum, erumpet sicut aurora lux tua, 58:7, 8:

et apud Matthaeum,

Rex dicet iis qui a dextris, Nudus fui et non induistis me: et dixit illis a sinistris, Nudus fui et non induistis me, 25:36, 38, 43, 44; ‘nudus’ hic pro illis qui non in veris, et usque desiderant vera; tum ²⁶ qui agnoscunt quod nihil boni et veri in illis sit, videatur n. 4956, 4958.

[10] Tertio, quod nuditas ²⁷ cum spectat lumbos et genitalia significet deprivationem ²⁸ boni amoris, constat apud Esaiam,

Virgo, filia Babelis, sume molam, et mole farinam; revela crines tuos, denuda pedes tuos, revela femur, transi flumina; reveletur nuditas tua, etiam videatur opprobrium tuum, Esai. 47:1-3 ²⁹ ; ‘filia Babelis’ est Ecclesia seu instar Ecclesiae, ubi sanctum in externis est, sed profanum in internis; profanum quod in internis est id quod spectent se et mundum pro fine, ita dominationem et abundantiam opum, et sancta ³⁰ pro mediis ad illum finem; ‘sumere molam, et molere farinam’ est ³¹ concinnare doctrinam ex talibus quae pro mediis inservitura sint fini, n. 7780, ‘revelare crines, denudare pedes, et revelare femur’ est absque pudore et timore sancta externa et interna prostituere, ³² ita ‘revelare nuditatem’ est facere ut spurca et infernalia, quae sunt fines, ³³ appareant:

[11] apud Jeremiam,

Peccatum peccavit ³⁴ Hierosolyma; qui honoraverunt eam, vilipendunt eam, quia vident nuditatem ejus, immunditiem ejus in fimbriis ejus, Threni 1:8, 9;

‘Hierosolyma’ pro Ecclesia, hic pro Ecclesia' quae in falsis ex malo; ‘videre nuditatem’ pro amores spurcos et infernales, ‘immundities in fimbriis’ pro talibus in extremis; quod ‘fimbriae’ sint extrema, ³⁵ videatur n. 9917 apud Nahum, Retegam fimbrias tuas super facies tuas, et ostendam gentibus nuditatem tuam, et regnis ignominiam tuam, 3:5 ³⁶ ; ‘retegere fimbrias’ pro auferre externa ut appareant interiora, ‘nuditas quae ostendetur gentibus, et ignominia quae regnis’ sunt amores infernales, qui sunt amores sui et mundi, qui ³⁷ conspurcant interiora:

[12] apud Ezechielem,

Venisti in decora ³⁸ decorum, ubera solidata sunt, et crinis ³⁹ crevit; eras nuda et denudata: cum omnibus abominationibus tuis et scortationibus tuis non recordata es dierum juventutis tuae, cum esses nuda et denudata, conculcata in sanguine tuo. Revelata est nuditas tua per scortationes tuas super amasiis tuis, 16:7, 22, 36:

apud eundem,

Ego daturus te in manum quod odisti, ut agant tecum ex odio; et te relinquant nudam et denudatam, et reveletur nuditas scortationum tuarum, 23:28, 29:

apud Hoscheam,

Contendite cum matre vestra ut removeat scortationes suas a faciebus suis, et adulteria sua ab inter ubera sua, ne forte exuam eam nudam, et sistam eam secundum diem pari ejus, et ponam eam sicut desertum, et disponam eam sicut terram siccitatis, et occidam eam per sitim. Revertar et accipiam frumentum Meum, mustum Meum, lanam Meam, et linum Meum, quae ad tegendum nuditatem ejus; et revelabo turpitudinem ejus in oculis amasiorum ejus, 2:2, 3, 9, 10;

[13] agitur ibi et hic de Hierosolyma, quae ⁴⁰ etiam vocatur ‘mater’, et per illam significatur Ecclesia; ejus perversitas describitur per ‘scortationes’, ‘adulteria’, et per ‘revelationem nuditatis’, quae non aliud sunt quam amores spurci et infernales, qui sunt amores sui et mundi quando sunt fines, ⁴¹ ex quibus omnia mala et inde falsa scaturiunt; inde falsificationes veri et adulterationes boni describuntur in Verbo per scortationes et per adulteria, et quoque vocantur ibi scortationes et adulteria, videatur n. 8904; inde patet quid per nuditatem et per revelationem nuditatis intelligitur; quia de veris Ecclesiae falsificatis, et de bonis ejus adulteratis agitur, ideo dicitur quod ‘ponam eam sicut desertum, et disponam eam sicut terram siccitatis, et occidam eam per sitim’; ‘desertum’ est quod absque bonis, ‘terra siccitatis’ est quod absque veris, et ‘sitis’ est deprivatio omnium fidei;

[14] dicitur etiam quod acciperet frumentum suum, mustum suum, lanam suam, et linum suum, quibus texerat nuditatem ejus, quia per ‘frumentum’ significatur bonum interius Ecclesiae spiritualis, per ‘mustum’ verum interius ejus, per ‘lanam’ bonum exterius ejus, et per ‘linum’ verum exterius ejus; quod non linum, lana, mustum, et frumentum intelligantur, quisque videre potest qui ex ratione aliquantum illustrata illa legit, et qui credit quod in Verbo nulla vox inanis sit, et quod non nisi quam sanctum ubi vis, quia est Divinum:

[15] apud Jeremiam,

Filia Edomi, etiam ad te transibit calix, inebriaberis et nudaberis, Threni 4:21 ⁴² :

apud Habakuk, Vae facienti socium suum bibere, inebriando, ⁴³ et introspiciendo in nuditates eorum! satiaberis ignominia prae gloria, bibe etiam tu, ut praeputium tuum reveletur, 2:15, 16:

et apud Ezechielem,

Effuderunt sanguinem in te; nuditatem patris revelavit in te, Ezech. 22 [9, ] 10; quid illa significant, nemo scire potest nisi sciat quid ‘calix’, quid ‘bibere’, quid ‘inebriari’, quid ‘nudari’, quid ‘introspicere nuditates, et revelare illos’, ut et quid ‘praeputium’; quod omnia spiritualiter intelligenda sint, patet; spiritualiter ‘bibere’ est instrui in veris, et in opposito sensu in falsis, ⁴⁴ ita haurire illa, n. 3069, 3168, 3772, 8562, 9412; inde constat quid ‘calix e quo bibitur’, n. 5120; ‘inebriari’ est insanire inde, ac ‘nudari’ est prorsus destitui illis; ‘revelare nuditates’ est revelare mala amorum sui et mundi, quae infernalia; ‘revelare nuditates patris’ est mala ⁴⁵ illa ex hereditario et ex voluntario, ‘revelare praeputium’ est conspurcare illa; quod ‘praeputium’ sit conspurcatio bonorum caelestium ab illis amoribus, videatur n. 2056, ⁴⁶ 3412, 4462, 7045; inde circumcisio est purificatio ab illis, n. ⁴⁷ 2039, 2632.

[16] Ex his constare potest quid significatur per inebriationem ac inde revelationem nuditatis Noachi, de qua ita in Genesi,

Bibit Noach de vino, et inebriatus est, et discoopertus est in medio tentorii sui; et vidit Cham pater Canaanis nuditatem patris sui, et indicavit duobus fratribus suis; et accepit Schem et Japheth vestem, et posuerunt super umero, ambo illi, et iverunt retrorsum, et texerunt nuditatem patris sui, et facies eorum retrorsum, et nuditatem patris sui non viderunt, Gen. 9:21-23;

describitur ibi homo Antiquae Ecclesiae, qui est Noachus; ‘vinum quod bibit, et quo inebriatus est’ est falsum quo illa Ecclesia ⁴⁸ principio imbuta fuit; quod inde ‘discoopertus in medio tentorii jacuerit’ significat mala ex defectu veri in cultu; ‘vestis, qua Schem et Japheth texerunt nuditatem ejus’ est verum fidei, per quod illa mala tegebantur et emendabantur; implantatio veri et boni fidei ⁴⁹ in parte intellectuali, describitur per quod ‘posuerint vestem super umero, iverint retrorsum, ⁵⁰ et quod verterint faciem retrorsum’, nam ita ⁵¹ se prorsus habet cum veris et bonis fidei apud spiritualis Ecclesiae hominem: ‘Schem et Japheth’ significat illos ab Ecclesia spirituali, qui receperunt vera fidei in bono, quod est charitas, ⁵² Canaan' autem illos qui non receperunt vera fidei in bono seu in charitate;

[17] quod Noach repraesentet hominem Ecclesiae Antiquae in principio, et quod hi tales fuerint, videatur n. 736, 773, 788, 1126, quod Schem hominem Ecclesiae spiritualis internae, et Japheth externae, n. ⁵³ 1062, 1127, 1140, 1141, 1150, quod Canaan repraesentaverit illos qui in fide separata a charitate, seu quod idem in cultu externo separato ab interno, ita in specie gentem Judaicam, n. 1093, 1140, 1141, 1167, quod verum et bonum fidei ⁵⁴ implantentur in parte intellectuali apud homines Ecclesiae spiritualis, n. 9596; praeterea ‘vinum quo Noachus inebriatus est’ significat falsum, n. 6377, ‘tentorium in quo jacuit discoopertus’ significat sanctum cultus, n. 2145, 2152, ⁵⁵ 3312, 4128, 4391, ‘vestis qua texerunt nuditatem patris sui’ significat verum fidei, n. 5954, 9212, 9216; ipsa nuditas, ejus malum voluntarium, quod tegitur per vera fidei, et cum tegitur spectant vera retrorsum; quod haec arcana involvantur ⁵⁶ his historicis, patet ex sensu interno; et quod arcana illa sint arcana Ecclesiae, videri potest ex eo quod Schem et Japheth solum propter id quod texerint nuditatem patris, benedicti fuerint, et cum illis omnis eorum posteritas, et quod Canaan cum omni sua posteritate maledictus fuerit, solum quod pater ejus indicaverit id fratribus suis.

[18] Quoniam apud gentem Judaicam et Israeliticam interiora erant spurca, erant enim in amoribus sui et mundi prae reliquis gentibus; et quia ‘genitalia cum lumbis’ significant amorem conjugialem, et ille amor est fundamentalis omnium amorum, caelestium et spiritualium, et sic comprehendit ⁵⁷ illos, ideo cautum fuit ne nuditates illarum partium apud Aharonem et apud filios ejus quando in sancto cultu erant, ullo modo apparerent; ⁵⁸ quod causa est quod dicatur quod facerent illis femoralia lini ad tegendum carnem nuditatis, a lumbis usque ad femora; et alibi, quod non ascenderent in gradibus super ad altare, ne reveletur nuditas super illo, Exod. 20:23 [KJV 26]; quod apud gentem Judaicam et Israeliticam interiora fuerint spurca, et illa clausa cum fuerunt in cultu, videantur loca citata n. 9320 fin. , 9380; quod ‘genitalia cum lumbis’ significent amorem conjugialem, n. 3021, 4280, 4462, 4575, 5050-5062, et quod amor conjugialis sit fundamentalis omnium amorum caelestium et spiritualium, proinde quod hi amores per illum etiam intelligantur, n. 686, ⁵⁹ 2739, 3021, 4280, 5054. Ex his nunc constat quid ‘nuditas’ significat, imprimis nuditas partium generationi dicatarum, quando interiora sunt spurca.

[19] At vero cum interiora sunt casta, tunc 'nuditas' significat innocentiam, quia amorem ⁶⁰ conjugialem, ex causa quia amor vere conjugialis in sua essentia est innocentia; quod amor vere conjugialis sit innocentiae, videatur n. 2736, proinde quod ‘nuditas’ in hoc sensu sit innocentia, ⁶¹ n. 165, 8375, quapropter etiam angeli intimi caeli, qui angeli caelestes vocantur, apparent nudi, n. 165, 2306, 2736; quia Antiquissima Ecclesia, quae describitur in primis capitibus Geneseos, ac intelligitur in sensu interno per Hominem seu Adamum, et per uxorem ejus, fuit Ecclesia caelestis, ideo de illis dicitur quod ambo essent nudi, et non erubuerunt, Gen. 2:25; at cum lapsa illa Ecclesia ⁶² est, quod factum est per esum ex arbore scientiae, per quod significabatur ratiocinatio ex scientificis de Divinis, tunc dicitur quod cognoverint quod nudi essent, et consuerint sibi folium ficus, et fecerint sibi cingula, ita quod texerint nuditates suas; et quoque quod dixerit homo cum clamavit ad illum Jehovah, quod timuerit quia nudus; ⁶³ et dein quod fecerit illis Jehovah Deus tunicas pellis, et vestiverit eos, ⁶⁴ Gen. 3:6-11 et 21;

[20] per ‘folia ficus a quibus ⁶⁵ fecerunt sibi cingula’, ⁶⁶ et quoque per ‘tunicas pellis’ intelliguntur vera et bona externi hominis; quod ita describatur status eorum post lapsum, erat causa quia ab internis hominibus facti sunt externi; internum eorum significatur per ‘paradisum’, paradisus enim est intelligentia et sapientia interni hominis, ac occlusio ejus significatur per ejectionem ex paradiso; quod ‘folium’ sit verum naturale, quod est scientificum, videatur n. 885, quod ‘ficus’ sit bonum naturale seu bonum externi hominis, n. 217, ⁶⁷ 4231, 5113, et quod ‘tunica pellis’ etiam sit verum et bonum ⁶⁸ externi hominis, n. 294-296, ⁶⁹ quod ‘pellis’ sit externum, n. 3540.

각주: