Ryureihtuhpazy 1

¹ Zawsua a thi tawhna cha Izarel pathlazy chata, Kana mozy cha adyuhpa ta eima châta adyuh awpa ta ahyma a sie tua aw tly?” tahpa ta ABEIPA cha a chhohia ei ta.

² ABEIPA chata, “Zudah sie mawh sy; a ku liata râh cha ei pie haw,” tah ta.

³ Zudah ta a unawhpa Simeôna hnohta, “Kana mozy adyuh awpa ta ei râh tovyuh liana heta a khy hra teh; kei chhao na râh tovyuh liata ei vy hra aw,” tah ta. Chatanachata Simeôna cha a hnohta sie haw hra ta.

⁴ Chatawhcha Zudah cha khy ta, Kana mozy nata Periza mozy cha ABEIPA ta ama ku liata pie haw ta; Beze khih liata chyhsa thy kha thie ei ta.

⁵ Beze khih liana chata Adônibeze hmô ei ta, adyuh ei ta, Kana mozy nata Periza mozy cha thata thie ei ta.

⁶ Adônibeze deikua cha a râ ta; a chadai ei ta, patu ei ta, a kupi zy nata a pheizy taipa ei ta.

⁷ Adônibeze chata, “Abei sysari kupi nata pheipi taipa zy chata ei tlâhkhai ry liata a zôpa a hua tyh ei ta; ei taopa haw tlaita Khazohpa ta viari eina thô he zaw,” tah ta. Chatawhcha Zerusale khih lâta a chhi ei ta, cha liana chata thi haw ta.

⁸ Zudah pathlazy chata Zerusale khih adyuh ei ta, la ei ta, zaozi ta chhawsao ei ta, khihpi cha mei ta rao ei ta.

⁹ Cha hnôh lâna chata Zudah pathlazy cha Kana mo tlâh râh liata a ypa zy, Neke lâta a ypa zy, bypi liata a ypa zy cha adyuh awpa ta zu ei ta.

¹⁰ Zudah chata Kana mo Hebraw khih liata a ypa zy cha siehnao ta, (cha hlâta cha Hebraw khih mo cha, Kiriatharaba a châ); chatanachata Sheshai zy, Ahima zy, Talmai zy thie ei ta.

¹¹ Cha tawhna chata Debi khih liata a ypa zy cha a dyuh ta, cha hlâta cha Debi khih mo cha Kiriasepha a châ.

¹² Kaleba cha, “Ahyrai Kiriasepha khih cha a dyuhpa ta a lapa cha, ei sawchanônô Aksah lahpinô ta ei pahneisa aw,” tah ta.

¹³ Kaleba nawhta Kenaza sawchapawpa Ôthaniel ta la ha ta. Chatanachata a sawchanônô Aksah cha lahpinô ta pahneisa ta.

¹⁴ Chatawhcha a hnohta a tlô nahta, a paw cha râh hia awpa ta reipasao ta; a alâ tawhtapa cha chô ta, Kaleba chata a hnohta, “Khâpa e na khoh,” vaw tah ta.

¹⁵ Chatawhcha ano chata a hnohta, “Byhnâ na aw pa teh; Neke râh liana chata na paysa haw tlôh chi ta, tihnawh a hneipa zy na pi hra mah y” tah ta. Chatanachata Kaleba chata tihnawh a hneipa machhua lâ tahpa zy nata tihnawh a hneipa mathi lâ tahpa zy châ pi ta.

¹⁶ Mawsi puhpa Kani mo pathlazy cha Arada, Neke lâta Zudah râhpathohpa liana chata Zudah pathlazy chhaota thiahra khihpi tawhtapa cha khy ei ta; ama hry liata pahrâ ei ta.

¹⁷ Zudah cha a unawhpa Simeôna nata pua ei ta, Zepha khih liata a ypa Kana mo cha thie ei ta, pamo khai ei ta. Cha khihpi moh cha Hôma ama tah.

¹⁸ Zudah chata Kaza khih a râh rakha chhaota, Askelaw khih a râh rakha chhaota, Ekrôna khih a râh rakha chhaota la hra ta.

¹⁹ ABEIPA cha Zudah hnohta y ta, chatanachata tlâh râh liata a pahrâpa zy cha papua khai ta, saikao liata a pahrâpa zy deikua cha thua talaili zy ama hneipa vâta papua thei vei.

²⁰ Mawsi ta a vaw rei hawpa hawhta Hebraw khih cha Kaleba pie ei ta; cha liatahpa Anaki sawchapawpa zy pathôh cha papua ta.:

²¹ Benzami pathlazy chata Zebu mo, Zerusale khih liata a ypa zy cha papua veih ei; Zebu mozy cha Benzami pathlazy nata he no taih heta Zerusale liata hmaohkha ta ama pahrâ.

²² Zawsi chhôhkha zy chhao cha Bethel khih adyuh awpa ta pua hra ei ta; ama hnohta ABEIPA y ta.

²³ Zawsi chhôhkha zy chata Bethel lâna chata mohparutuhpa zy tuah ei ta, (Cha hlâta cha cha khi moh cha Luza a châ).

²⁴ Chatawhcha mohparutuhpa zy chata chyhsa pakha khih chhôh tawhta a vaw puapa hmô ei ta, a hnohta,Ngiachhiepa ta khih chhôh angiana maniah pamosa teh, chatanachata a phapata ta eima cha tah aw,” tah ei ta.

²⁵ Chatawhcha khihpi chhôh a ngiana cha pamosa ta; zaozi ta cha khih cha adyuh ei ta, cha chyhsa nata a chhôhkha zydua deikua cha pahlôh ei ta.

²⁶ Cha chyhsa cha Hiti mo rah liata a ngia ta, khih tao ta, cha khih moh cha Luza bi ta; atanoh taihta cha moh cha a phaoh.

²⁷ Manase ta Beshia khih nata a khichapei liata a ypa zy, Tanakha khih nata a khichapei liata a ypa zy, Dôra khih nata a khichapei liata a ypa zy, Iblia khih nata a khichapei liata a ypa zy, Mekidô khih nata a khichapei liata a ypa zy cha papua vei; cha râh liana chata Kana mozy deikua cha, y thlâh haw ei ta.

²⁸ Chatawhcha Izarel pathlazy cha ama tha a tlô via rili tawhna chata Kana mozy cha raihriatuhpa châta paysa ei ta, papua khai veih ei.

²⁹ Ephrai chata Keza khih liata Kana mo a ypa zy cha papua vei, Kana mo cha Keza khih liana chata ama hry liata tlao ama pahrâ.

³⁰ Zebulawna chata Kitraw khih liata a ypa zy, Nahalô khih liata a ypa zy cha papua vei; Kana mo cha ama hry liata pahrâ hra ei ta, raihriatuhpa châta tlao ama y.

³¹ Asera chata Akô khih liata a ypa zy, Sidaw khih liata a ypa zy, Ahila khih liata a ypa zy, Akazi khih liata a ypa zy, Helbah khih liata a ypa zy, Aphika khih liata a ypa zy, Rehô khih liata a ypa zy cha papua vei.

³² Asera pathlazy cha cha râh liata a ypa Kana mozy hry liana chata tlao ama pahrâ hra, âmo chata papua veih ei.

³³ Nathalai chata Besheme khih liata a ypa zy, Bethana khih liata a ypa zy cha papua vei, cha râh liata a ypa Kana mozy hry liana chata tlao ama pahrâ hra; anodeikuacha Besheme khih liata a ypa zy nata Bethana khih liata a ypa zy cha raihriatuhpa châta ama y.

³⁴ Amawri mo chata Dana pathlazy cha tlâh râh lâta papua ei ta, saikao lâta ama chô awpa pasai tlôh leipa ei ta;

³⁵ Amawri mo deikua cha Harhera tlâh liata zy, Aizalô khih liata zy, Shaalbi khih liata zy y thlâh haw ei ta, châhrasala Zawsi chhôhkhapa zy ku cha thatlôpa ta châ ta, ama raihriatuhpa châta ama y haw.

³⁶ Amawri mo râh râhri cha Akrabi khyna nata Sela tawhta khy lymâ ta.