Zawsua 24

Studio

   

1 Chatawhcha Zawsua ta Izarel pho zydua cha Sekhe liata pahmaohpakhy ta, Izarel sahlao machâ zy, ama pawhrâhpa zy, ama ryureituhpa zy pa-awsa ta; Khazohpa hmiakô liata a vaw luah chyu ei ta.

2 Chatawhcha Zawsua ta chyhsa zydua hnohta, “ABEIPA Izarel zy Khazohpa ta, he tana heta a tah, ‘Nama pathlatuhpa zy kha hlâno ta Euphrate khô lâna khata y tyh ei ta, Abaraha paw, Nahaw paw, Terah tlai chhao kha; ama châta khazoh hropa zy chakao tyh ei ta

3 Chatawhcha nama pathlatuhpa Abaraha kha Chavah haosâ tawhtapa chhihtha na ta, Kana râh chhôh zydua liana khata a chhi na ta, a pathlazy cha papôh na ta, Aisika kha pie na ta;

4 Aisika cha Zakaw nata Esaw pie na ta. Chatawhcha Esaw cha a tovyuh chata Seira tlâh râh pie na ta, Zakaw nata a sawzy cha Izi râh lâta zu ei ta,

5 Chatawhcha Mawsi nata Arawna tua na ta, Izi râh cha ama hry liata hmonoâh taopa ta hrie na ta; cha khai tawhna chata châ chhi ei na ta.

6 Chatawhcha nama pathlazy cha Izi râh tawhtapa chhihtha na ta, tilaipi tlô eichi ta; chatanachata Izi mozy chata nama pathlatuhpa zy cha talaili zy nata arâ a kiahpa zy chhaota. Tilaipi Saihpa taihta a chadai ei ta.

7 Chatawhcha âmo chata ABEIPA pado ei ta. Izi mozy nata ama likawh cha vaw pazohkaluhsa haw ta, chatawhcha tilaipi vaw pahlyhsa ta, pamô khai haw ta; chatanachata Izi râh liata ei hmotaopa kha nama mokhaoh tlaita hmô ta; râhpathohpa liana khata bohpi y eichi ta.

8 Chatawhcha Zawdâh haosâ liata a ypa Amawri mo râh lâna chata châ chhi ei na ta; châ vaw dyuh ei ta, nama ku liata pie na ta, ama râh cha pahrâ haw eichi ta, chatawhcha âmo cha cha pahleipadiapa ei na ta.

9 Môaba abeipa Zipô sawchapawpa Balaka kha vaw thyu ta, Izarel mozy a vaw dyuh ta; Beôra sawchapawpa Balama kha chhie cha sapa awpa ta pa-awsa ta,

10 châhrasala Balama bie kha nahthlie khoh leipa na ta; chavâta byhnâ tlao cha aw pa ei ta; chatanachata a ku tawhtapa cha ei cha pachha haw ei.

11 Chatawhcha Zawdâh chaka eichi ta, Zerikô tlô eichi ta, Zerikô liata chyhsa zy ta cha vaw dyuh ei ta, Amawri mozy, Periza mozy, Kana mozy, Hiti mozy, Kirkasi mozy, Hivi mozy, Zebu mozy chhao khata, âmo cha nama ku liata pie haw na ta.

12 Chatawhcha nama hmiakô liata kheihpangia tua na ta, cha chata nama hmiakô liata âmo a chadai ta; Amawri mo abeizy pano tlai kha, nama zaozi ta tlyma, nama libaw ta tlyma châ hra vei.

13 Nama hria leipa râh nata nâmo tao chachei leipa khihpi zy cha pie ei na ta; chazy liana chata y eichi ta, nama lo leipa kresadô nata ôli sahdô liatahpa zy cha nie eichi ta,’ tahpa ta.

14 Chavâta ABEIPA cha chi ula, hmeihseihpa nata â do ngaitapa ta chakao ula; nama pathlatuhpa zy ta Chavah haosâ nata Izi râh liata ama chakao tyhpa khazoh zy kha thy khai ula, ABEIPA chakao muh vy.

15 Chatawhcha ABEIPA chakaopa he a pha lei awpa hawhta nama pahno khiahtala, atanoh he ahyma nama chakao aw, a tlyh teh u. Nama pathlatuhpa zy ta Chavah haosâ liata ama chakao tyhpa khazoh zy kha ma; nama pahrâpa râh Amawri mo khazoh zy ma; kei nata ei chhôhkha zy heta la ABEIPA eima chakao aw,” tah ta.

16 Chatawhcha zawpi zy chata, “ABEIPA Khazohpa cha siesaipa ta, khazoh hropa zy cha chakao aw ma pi; ano ABEIPA eima Khazohpa tlaita eima pathlatuhpa zy chhaota Izi râh seichâna tawhtapa maniah papua ta, eima mohmô liata pahnona rôhnah ngaitapa zy taopa ta, eima siena maih nata zawpi zydua eima chatôhna lia chhaota maniah paboh lymâ tuhpa cha;

18 ABEIPA eima hmiakô lia tlaita pho to cha râh zy liata a ypa Amawri mozy tlai cha papua khai ta; chavâta keimo chhaota ABEIPA eima chakao aw; ano cha eima Khazohpa cha tloh ta, tahpa ta achhyh ei ta."

19 Châhrasala Zawsua ta zawpi zy hnohta, “ABEIPA chakao thei aw veih eichi; ano cha Khazohpa pathaihpa châ tlôh ta; Khazohpa hiatlia hmâhpa châ ta; nama paraona zy nata nama moleina zy cha a ngiahthai aw vei.

20 ABEIPA cha siesaipa ta pho hropa khazoh zy nama chakao khiahtala, nama chô liata a phana cha heta nama chô liata hmo pha leipa ta cha thô aw ei ta, a cha pahleipadia aw ei na,” tah ta.

21 Chatawhcha zawpi zy chata Zawsua hnohta, “Châ bao va; ABEIPA khâchâ eima chakao aw,” tah ei ta.

22 Zawsua ta zawpi zy hnohta, “Ano chakao a chhuahpa ta ABEIPA namâ tlyh haw tlai, tahpa bie a pahnotuhpa zy cha nâmo tlai he nama châ haw,” tah ta. Âmo chata, “Bie a pahnotuhpa zy cha eima châ haw mâ tâh,” tah ei ta.

23 Ano chata, “Chata a châ khiahtala, nama hry liata pho hropa khazoh a ypa zy cha pahlei ula, nama pathipalôh zy cha ABEIPA Izarel zy Khazohpa lâna chata pahei teh u,” tah ta.

24 Chatawhcha zawpi zy chata Zawsua hnohta, “ABEIPA eima Khazohpa chakao aw pi ta, a bie eima zyh lymâ aw,” tah ei ta.

25 Chatanachata Zawsua ta, cha noh liana chata zawpi zy hnohta bie hraih ta, Sekhe liana chata ryhpa nata ryureina âmo chata rao ta.

26 Chatanachata Zawsua ta cha biezy cha Khazohpa ryhpa châbu liata roh ta; alô laipapi la ta, ABEIPA su pathaihpa kiapâh ta oaka tho ry liata bô ta.

27 Chatawhcha Zawsua ta zawpi sahlao zydua hnohta, “Pachâ teh u, he alô he eima bie a pahnotuhpa châ mawh sy; ABEIPA ta eima hnohta bie a reipa zydua cha a thei khai haw hih; chavâta nama bie a pahnotuhpa a châ aw, chata leipa ta la nama Khazohpa he, namâ paphasai pathlei aw na,” tah ta.

28 Chatanachata Zawsua ta zawpi zy cha âmo tovyuh râh chyu lâta padisa haw ta.

29 Cha hmo hnôh lâna chata Nuna sawchapawpa Zawsua ABEIPA chakaotuhpa cha kô za kha nata kô hrawh a châpa ta thi ta.

30 Chatawhcha Kasa tlâh maw lâchhâh Ephrai tlâh râh liata ano tovyuh râhri chhôh Tinaserah liana chata pabu haw ei ta.

31 Zawsua hro chhôh nata machâ sahlao Zawsua hlâta hro pasihpa zy ABEIPA ta Izarel sahlao zy châta hmo a taopa zydua a pahnotuhpa zy hro chhôh liana chata Izarel sahlao zy ta ABEIPA chakao tyh ei ta.

32 Izarel pathlazy ta Izi râh tawhtapa Zawsi ru ama cheipa kha Sekhe khih liata su, Sekhe paw Hamôra saw zy liata Zakaw ta tâkâ za kha ta a chaleipa liana khata pabu ei ta; chatanachata chazy cha Zawsi pathlazy tovyuh ta a vaw châ haw.

33 Arawna sawchapawpa Eliaza cha thi ta; Ephrai tlâh râh liata ano tovyu châta ama piepa a sawchapawpa Phineha khih Kibia liana chata pabu haw ei ta.

   
Scroll to see more.