IZIMFIHLO ZASEZULWINI EZIQUKETHWE EZIBHALWENI EZINGCWELE NOMA EZWINI LENKOSI ZISONJULULIWE KUQALWA ENCWADINI KAGENESIS KANYE NEZINTO EZIMANGALISAYO EZIBONWE EMHLABENI WEMIMOYA NASEZULWINI LEZINGELOSI

KULOTSHWE WU EMANUEL SWEDENBORG

KWAHUNYUSHWA KUSUSWA ESINGISINI KUYISWA ESIZULWINI UMQINGO WOKUQALA

IHUNYUSHWE NGU wuZAMOKUHLE T. ZUNGU

---

Arcana Coelestia: The Heavenly Arcana contained in the Holy Scripture or Word of the Lord unfolded in the Book of Genesis together with wonderful things seen in the World of Spirits and in the Heaven of Angels

By Emanuel Swedenborg

Translated into Zulu by Zamokuhle T. Zungu

---

UHLU LOMLOBI LWEZIHLOKO EZIQUKETHWE EMQINGWENI WOKUQALA.

IziMfihlo zeZulu ezisonjululwe eziBhalweni eziNgcwele noma eZwini leNkosi zikwiNcazelo, eyiNgqondo engaPhakathi yeZwi. Ukuthi lengqondo inhloboni kungabonwa kulezozinto ezikhonjiswe malungana nayo ngokusukela eLwazini lokuzazela mathupha ezinombolweni 1767-1777, 1869-1879; nasemongweni noma engqikithini yenkulumo (ezinombolweni 1-5, 64-66, 167, 605, 920, 937, 1143, 1224, 1404, 1405, 1408, 1409, 1502 ekugcineni, 1540, 1659, 1756, 1783, 1807).

IZinto eziMangalisayo ezibonwe eMhlabeni weMimoya naseZulwini leziNgelosi, kuqalwe ngazo futhi zajotshelelwa ezahlukweni ezimbalwa. Kulomqingo kukhona lezizihloko ezilandelayo:

Mayelana nokuVuswa komuntu kwabafileyo, nokungena kwakhe ekuphileni okuphakade (n. 168-181).

Isiqhubezo mayelana nokungena komuntu ekuphileni okuphakade (n. 182-189; naku 314-319).

Ukuthi ngaleyonkathi impilo yoMphefumulo noma yoMumoya injani (320-323).

Ezinye izibonelo zemicabanga yeMimoya yokuthi yayicabangani ngoMphefumulo noma ngoMumoya ngenkathi isesemzimbeni wemvelo (n. 443-448).

Mayelana neZulu kanye neNjabulo yaseZulwini (n. 449-459; 537-546; 547-553).

Mayelana namaBandla abumba noma enza iZulu (n. 684-691).

Mayelana nesiHogo (n. 692-700).

Mayelana neziHogo zalabo abebebuswa yiNzondo, ukuPhindisa, noluNyae ezimpilweni zabo zemvelo (n. 814-823).

Mayelana neziHogo zalabo abebebuswa wukuPhinga neSigweba; mayelana futhi neziHogo zabaKhohlisi nezabaThakathikazi (n. 824-831).

Mayelana neziHogo zabaHahayo; namayelana neJerusalema eliNgcolile, nabaPhangi eHlane; namayelana nothuvi obugcwele eziHogweni zalabo abebecwile ezinjabulweni zomzimba noma zezinzwa besaphila emhlabeni wemvelo (n. 938-946).

Mayelana nezinye iziHogo ezehlukile kulezi esezibalwe ngenhla (n. 947-970).

Mayelana neziNcithakalo (n. 1106-1113).

UHlu lomlobi lwezihloko eziqukethwe emqingweni wesikhombisa.

IziMfihlakalo zezulu ezisonjululwe ezibhalweni eziNgcwele noma ezwini leNkosi ziqukethwe ezincazelweni, eyingqondo engaphakathi yezwi. Izanduleliso ezendulela izahluko ezimbalwa ziyincazelo yalokhu okulandelayo: Ziyincazelo eyingqondo engaphakathi yamazwi eNkosi akuMathewu 25:34-36 (ezinombolweni 4954-4959).

Ziyisiqhubezo mayelana nokuqhamisana komuntu noMuntu oMkhulu: ukuqhamisana kwamanyonga nezitho ezixhumene nawo (ezinombolweni 5050-5062).

Ziyincazelo eyingqondo engaphakathi yamazwi eNkosi akuMathewu 25:37-46 (ezinombolweni 5063-5071).

Ziyisiqhubezo mayelana nokuqhamisana komuntu nomuntu omkhulu: ukuqhamisana kwezitho zomuntu zangaphakathi nezitho zomuntu omkhulu zangaphakathi (ezinombolweni 5171-5190).

Ziyisiqhubezo mayelana nokuqhamisana komuntu nomuntu omkhulu (ezinombolweni 5377-5396).

Ziyisiqhubezo mayelana nokuqhamisana komuntu nomuntu omkhulu: ukuqhamisana kwesikhumba, izinwele, namathambo (ezinombolweni 5552-5573).

Ziyisiqhubezo mayelana nokuqhamisana: ukuqhamisana kwezifo nomhlaba kamoya (ezinombolweni 5711-5727).

UHLU LOMLOBI LWEZIHLOKO EZIQUKETHWE KULOMQINGO.

Kuqukethwe izimfihlakalo zezulu ezethulwe ngencazelo yengqondo enga pha-kathi yeZibhalo ezingcwele noma yeZwi.

Okujotshelelwe ekugcineni kwezinye iZahluko kumayelana nezingelosi ka nye nemimoya okuhanqa umuntu (bheka izinombolo 5846-5866).

Isiqhubezo mayelana nezingelosi kanye nemimoya okuhanqe umuntu (bheka izinombolo 5976-5993).

Kujotshelelwe okumayelana nomngenela nobudlelwane bomphefumulo emzimbeni wemvelo (bheka izinombolo 6053-6058).

Isiqhubezo mayelana nomngenela nobudlelwane bomphefumulo emzimbeni wemvelo (6189-6215).

Isiqhubezo mayelana nomngenela nobudlelwane bomphefumulo emzimbeni wemvelo (6307-6327).

Isiqhubezo mayelana nomngenela nobudlelwane bomphefumulo emzimbeni wemvelo (bheka izinombolo 6466-6496).

Isiqhubezo mayelana nomngenela nobudlelwane bomphefumulo emzimbeni wemvelo (bheka izinombolo 6598-6626).

Okunye okulotshiwe (bheka amakhasi 503, 504).

692. ISAHLUKO 7

MALUNGANA NESIHOGO

Njengoba umuntu enomqondo ofiphele ngezulu, umqondo ofiphele kangangoba kuyafana nokuthi akanawo nomncane umqondo ngalo, kunjalo nangomqondo wakhe ngesihogo. Malungana nesimo somqondo wabantu ngezulu nesihogo, ufana nowabantu abahlala emaqhugwaneni ehlathini limbe abangaka ze baphumele ngaphandle kwehlathi labo abangaba nesithombe esithile emiqondweni yabo ngomhlaba ongaphandle kwehlathi, kodwa bengayazi imibuso yawo, kungasaphathwa ukwazi uhlobo lukahulumeni wawo, ikakhulu kungasaphathwa ukwazi imiphakathi yawo nempilo yaleyomiphakathi. Ngaphandle kokuba nolwazi lwalezizinto imiqondo yabo ngomhlaba ongaphandle kwehlathi labo kayikwazi ukungabi yimiqondo efiphele kangangokufana nokuthi ka-banawo nomncane umqondo ngawo. Kunjalo nangomqondo womuntu ngezulu nangesihogo. Nokho iqiniso wukuthi ziningi ngokungenakubalwa izinto nezenzeko ezulwini nasesihogweni, futhi ziningi kakhulu kunezinto nezenzeko zakunoma yimuphi umhlaba wemvelo. Ukuthi ziningi ngokungenakubalwa kangakanani kungabonwa ngalokhu, ukuthi, njengoba engekho umuntu onezulu elifana ncamashi nelomunye, kanjalo kakho umuntu onesihogo esifana ncamashi nesomunye ; kunga bonwa futhi ngokuthi yonke imiphefumulo eke yaphila emhlabeni wemvelo kusukela ekudalweni kwayo iya ezulwini noma esihogweni ibuthane khona.

6053. MAYELANA NOMNGENELA, NAMAYELANA NOKUHLANGANA KOMPHEFUMULO NOMZIMBA.

Akukho lutho, ngisho noluncane, olungaziwa noma olungacatshangwa mayelana nomngenela, nangamayelana nokuhlangana noma nokukhulumisana komphefumulo nomzimba, ngaphandle kokuba nolwazi lokuthi umphefumulo uyini, nokuthi sinjani isimilo sawo. Uma kungaziwa lutho nhlobo ngomphefumulo, kakukho ngisho noluncane olungashiwo ngomngenela wawo nokukhulumisana kwawo nomzimba wawo. Ngokuba kungacatshangwa kanjani ngokukhulumisana kwezinhlangothi ezimbili uma kungekho ngisho noluncane ulwazi mayelana nolunye uhlangothi? Ukuthi lokhu kungazi lutho ngomphefumulo nangesimilo sawo yikhona okubusayo namuhla, ikakhulu phakathi kwezifundiswa, kusobala ngokuthi abanye abantu bakholwa ukuthi umphefumulo uyinto ewumoya olula, abanye bakholwa ukuthi uyinto esalangabi noma esamlilo, abanye bakholwa ukuthi uyingqikithi ethile ecwebile futhi ecabangayo, abanye bakholwa ukuthi ungamandla noma isidlakadla kabanzi esithile, kanti abanye bakholwa ukuthi umphefumulo ungubukhuphekhuphe bemvelo. Nobunye ubufakazi bokungazi lutho ngomphefumulo namuhla wukuthi abantu babela umphefumulo ezingxenyeneni ezahlukene zomzimba; abanye bathi umphefumulo usenhliziyweni, abanye bathi usebuchosheni nasemicwini yabo, abanye bathi usezinkothweni zenhliziyo, abanye bathi usendlaleni encane, kanti abanye bathi ukuwowonke umzimba, kepha lapho besho njalo basuke besho impilo ekhona kuzozonke izinto eziphilayo. Ngakhokonke lokhu kuyachacha ukuthi kakukho lutho olwaziwayo mayelana nomphefumulo, yingakho konke okukholwa nokushiwo ngabantu ngomphefumulo kungukungathekisa nokuqagela nje kuphela. Nanjengoba ngokungazi lutho kwabantu ngomphefumulo kabanakuqonda lutho ngawo, abantu abaningi kabakwazanga ukugwema inkolo yokuthi umphefumulo ungubukhuphekhuphe obuthile obuphela ngokufa mhla umzimba ufa. Kungalesisizathu ukuba izifundiswa zingakholwa kakhulu kuneminguphane ukuthi kukhona impilo ngemuva kokufa; nangenxa yokungakholwa ukuthi kuyaphilwa ngemuva kokufa, kabazikholwa futhi nezinto ezingezempilo yangemuva kokufa, ezingezezulu nezingezikamoya zenkolo nothando. Lokhu kuyavela emazwini eNkosi kuMathewu, lapho ithi khona:

Baba, Nkosi yezulu nomhlaba, ukufihlile lokhu kwabahlakaniphileyo nabakhaliphileyo, wakwambulela izingane (Mathewu 11:25).

Futhi:

Noma bebona, kababoni, noma bezwa, kabezwa, futhi kabaqondi (Mathewu 13:13).

Ngokuba iminguphane noma abantu abangafundile kabanayo imicabango enjengaleyo mayelana nomphefumulo; kepha yethemba ukuthi iyophila ngemuva kokufa; nakulelothemba lobunguphane kucashe inkolo yokuthi iyophila njengabantu emva kokufa, ibone izingelosi, ixoxe nazo, futhi izitike ngentokozo noma ngenjabulo yakuleyompilo, yize yona ingenalwazi lokuthi kucashe leyonkolo ethembeni layo.