¹ וידבר יהוה אל־משה לאמר׃

² ראה קראתי* בשם בצלאל בן־אורי בן־חור למטה יהודה׃

³ ואמלא אתו רוח אלהים בחכמה ובתבונה ובדעת ובכל־מלאכה׃

⁴ לחשב מחשבת לעשות בזהב ובכסף ובנחשת׃

⁵ ובחרשת אבן למלאת ובחרשת עץ לעשות בכל־מלאכה׃

⁶ ואני הנה נתתי אתו את אהליאב בן־אחיסמך למטה־דן ובלב כל־חכם־לב נתתי חכמה ועשו את כל־אשר צויתך׃

⁷ את אהל מועד ואת־הארן לעדת ואת־הכפרת אשר עליו ואת כל־כלי האהל׃

⁸ ואת־השלחן ואת־כליו ואת־המנרה הטהרה ואת־כל־כליה ואת מזבח הקטרת׃

⁹ ואת־מזבח* העלה ואת־כל־כליו ואת־הכיור ואת־כנו׃

¹⁰ ואת בגדי השרד ואת־בגדי הקדש לאהרן הכהן ואת־בגדי בניו לכהן׃

¹¹ ואת שמן המשחה ואת־קטרת הסמים לקדש ככל אשר־צויתך יעשו׃ ף

¹² ויאמר יהוה אל־משה לאמר׃

¹³ ואתה דבר אל־בני ישראל לאמר אך את־שבתתי תשמרו כי אות הוא ביני וביניכם לדרתיכם לדעת כי אני יהוה מקדשכם׃

¹⁴ ושמרתם את־השבת כי קדש הוא לכם מחלליה מות יומת כי כל־העשה בה מלאכה ונכרתה הנפש ההוא מקרב עמיה׃

¹⁵ ששת ימים יעשה מלאכה וביום השביעי שבת שבתון קדש ליהוה כל־העשה מלאכה ביום השבת מות יומת׃

¹⁶ ושמרו בני־ישראל את־השבת לעשות את־השבת לדרתם ברית עולם׃

¹⁷ ביני ובין בני ישראל אות הוא לעלם כי־ששת ימים עשה יהוה את־השמים ואת־הארץ וביום השביעי שבת וינפש׃ ס

¹⁸ ויתן אל־משה ככלתו לדבר אתו בהר סיני שני לחת העדת לחת אבן כתבים באצבע אלהים׃

²⁵ gave his offering: one silver platter, the weight of which was a hundred and thirty shekels, one silver bowl of seventy shekels, after the shekel of the sanctuary; both of them full of fine flour mixed with oil for a meal offering;