6086. ‘Et si nosti, et sit in illis viri strenuitatis’: quod significet praestantiora in doctrina, constat ex significatione ‘virorum strenuitatis’ quod sint praestantiora in doctrina, ‘vir’ enim significat intelligentem, et quoque verum, n. 158, 265, 749, 1007, 3134, 4823, consequenter doctrinam; et ‘strenuum’ significat praestans; nam strenuitas in lingua originali exprimitur per vocem quae etiam significat vires et virtutem, quae in sensu interno sunt quae valent, ita praestantiora.

158. Quod ‘vir’ significet internum hominem, seu quod idem est, intelligentem et sapientem, constat apud Esaiam,

Video et non vir, et de illis et non consiliarus, 41:28;

pro quod non sapiens et intelligens:

apud Jeremiam,

Discurrite per plateas Hierosolymae, et videte, ... si inveniatis virum, si sit faciens judicium, quaerens veritatem, 5:1;

‘faciens judicium’ pro sapiente, et ‘quaerens veritatem’ pro intelligente.