Luka 4

¹ Zisu cha Thlahpa Pathaihpa ta bie ta, Zawdâh chavah tawhta kua heih ta,

² ahripa reipasaona chôta, râhpathohpa liata noh sypalih Thlahpa chhihthapa ta y ta. Cha noh chhô liana chata khâpahmah nie vei; a chhâna lâ cha a no vaw di ha ta.

³ Ahripa ta a hnohta, “Khazohpa Sawchapawpa na châ khiahtala, he alô he viahchhâ lâta a lie awpa ta bie pie teh,” tah ta.

⁴ Zisu ta a hnohta, ‘Chyhsapa he viahchhâ deita ta hroh aw veih ei,’ tahpa ropa a châ,” tah ta a chhy ta.

⁵ Ahripa chata ano cha a chhi ta, movi hlâta khizaw khihnarâh zydua pamosa ta,

⁶ a hnohta, “He zydua chô liata biehneina nata a rôhnahna he ei cha pie aw; ei hnohta piepa châ ha tlôh ta. Ei khopa maih hnohta ei pie tyh hra.

⁷ Einâ naoh khiah chi tala, a zydua ta na eih a châ khai aw,” tah ta.

⁸ Zisu ta a hnohta,“ ‘Abeipa na Khazohpa cha a naoh la, ano deita na chakao awpana a châ,’ tahpa ropa a châ,” tah ta a chhy ta.

⁹ Chatawhcha ahripa chata Zerusale khih lâta a chhi ta, Khazohpa achhyna-o laki pazaohpa liata soh ta, a hnohta, “Khazohpa Sawchapawpa na châ khiahtala he tawhna heta a pathla teh;

¹⁰ ‘Nâma cha vaih awpa ta nâ kyh liata la, a vâlyuhchâpazy bie a pie aw!’ tahpa nata

¹¹ Ama ku ta cha chalo aw ei ta, chata leipa ta la na pheizy nâ chhuh pathlei aw na.’ tahpa ropa châ tlôh ta,” tah ta.

¹² Zisu ta a hnohta, “Abeipa na Khazohpa pasia khâ,’ tahpa a châ,” tahpa ta a chhy ta.

¹³ Chatawhcha ahripa ta a reipasaona awpa zydua ta a reipasao khai nahta, a rypaona daihti châta siesai ha ta.

¹⁴ Zisu cha Thlahpa hmotaotheina ta Kalili râh lâta kua ha ta, a thâtih cha cha râh chheipâh zydua liata pathâh ta.

¹⁵ Amâ pakhyna-o liata zy pachu lymâ ta, chyhsa zydua reithaipa ta y ta.

¹⁶ A laiseihna khih, Nazari cha vaw tlô ta; pahânoh ta a tao tyhpa hawhta a pakhyna-o liata a ngia ta, reipa ta a duah ta;

¹⁷ hrohsopa lsai châbu cha a hnohta pie ei ta. Châbu cha pahy ta, he bie reina su he a tlyh ta:

¹⁸ “Abeipa Thlahpa cha ei chôta y ta, dyhchhiepazy hnohta Thâtihpha chho awpa ta sathaw eina thupa vâta.Ano chata sei atâhpazy hnohta puana biechhopa nata mochaopazy hnohta mo pavâ hnei heih nawpa kyh zy, taola a taopazy puana awpa ta nata

¹⁹ Abeipa palôhtlâhna kô tlâh awhkhei awpa ta eina tuah,” tahpa hih.

²⁰ Chatawhcha châbu cha chaty ta, chakaotuhpa pie heih ta, a tyuh ha ta; apakhyna-o liata chyhsa zydua mo cha a chôta khaihnao thlâh ha ta.

²¹ Ama hnohta, “Khazohpa châ bie he atanoh liata nama theipa ta a vaw tlô haw,” tahpa ta reih pathao ta.

²² Ama zydua ta ano reithai ei ta, ngiachhiena bie a pakah tawhta a puapazy cha ama noâh kaw ta; “He chyhsa he Zawsi sawchapawpa châ vei ma?” tah ei ta.

²³ Ano chata ama hnohta, “Nâmo ta he bieso, ‘Dawhty, nâmasasyh ta a patlâh teh; Kapynia khih liata na hmotaopa eima theipa maih kha he nama khih lia chhaota tao hra teh,’ tahpa eina chho thlyu aw eichi na.” tah ta.

²⁴ Ano ta, “Hmeiseihta ta ei cha chho ei chuh, hrohsopa ahyhmah ta ano khih liata chyhsa ta aly beih veih ei.

²⁵ Châhrasala a dopata ta, ei cha chho ei chuh, Elaiza hro noh liana khata kô thôh nata thla charu avâ a khaw ta, râh zydua liata chakâhna thata a tlô nona khata, Izarel râh liata nôhmei hluhpi y ei ta;

²⁶ anodeikua ama hry liata ahy hnohta hmahta Elaiza tuapa châ leipa ta, Sidaw râh liata Sarepta khihpa nôhmei pakha lâta deita tuapa tlao a châ.

²⁷ Chatawhcha hrohsopa Elaisa hro noh liana chhao khata Izarel râh liata aphawhpa hluhpi y ei ta; châhrasala ama hry liata ahyhmah ta pathaisapa ta y veih ei, Naama Suria chyhsa dei leipa ta cha,” tah ta.

²⁸ Apakhyna-o liata chyhsa zydua ta, cha bie cha ama theipa ta nahta ama hiehâh ngâsâ ta.

²⁹ Thyu ei ta, khih tawhna chata chatichahnao lymâ ei ta, ama khih yna lôkâhpa khua liana chata chati pathlah awpa ta a chhi ei ta.

³⁰ Châhrasala ano cha ama hryhri ta siepa ta sie syulyu ha ta.

³¹ Kalili râh liata Kapynia khih lâta zu ha ta, pahânoh liata âmo pachu ta;

³² biehnei ngâsâpa ta a pachupa vâna chata, noâh tah kaw ei ta.

³³ Chatawhcha apakhyna-o liana chata chyhsa pakha ahripa thlahpa puapa a hneipa y ta; cha chata ao paro ngaitapa ta,

³⁴ “Nazari Zisu, kheihta tao awpa e maniah na khoh? Maniah pahleipadia awpa ta ma nâ vy? Nâ, ei cha pahno na, Khazohpa Mo Pathaihpa cha na châ,” tahpa ta aw ta.

³⁵ Châhrasala Zisu chata ra ta, “A chalih la, a chhôh tawhtapa vaw pua teh!” tah ta. Chatawhcha ahripa chata ama hryta papao ta, pasasa leipa ta, a chhôh tawhtapa cha vaw pua ta.

³⁶ Ama zydua ta noâh tah kaw ei ta, “He he khâpa bie e a châ? Biehnei ngaitapa nata hmotao thei ngaitapa ta ahripa a puapazy bie pie ta, ama pua thlâh hapa he,” tahpa ta reih ei ta.

³⁷ Chatawhcha cha râh chheipâh khih to liata a thâtih pathâh ha ta.

³⁸ Chatawhcha apakhyna-o tawhtapa cha pua ta, Saimaw o liata a ngia ta. Saimaw lahpinô nô cha thata chasi ta, chatanachata ano châna chata a hawpa ei ta.

³⁹ A kiapâh ta a duah ta, chasipa cha ra ta, pai ha ta; thlai thyu ta, âmo chakao ha ta.

⁴⁰ Noh a tla hai nota tlâh leipa a hluhpi pasa to a ohpazy a hnohta a vaw chhi ei ta; ama zydua chôta a ku pahnieh ta, patlâh lymâ ta.

⁴¹ Ahripazy cha chyhsa hluhpi chhôh tawhtapa vaw pua ei ta, “Khazohpa Sawchapawpa na châ!” tahpa ta aw ei ta. Chatawhcha ano chata âmo cha ra ta, bie ama reipa pasaih leipa ta, Mesia a châ tahpa ama pahno thlâh hapa vâta.

⁴² Chatawhcha khih a deih nahta pua ta, râhpathohpa su lâ sie ta. Châhrasala zawpizy chata tlua ei ta, a hnohta a vy ei ta, âmo a siesai lei nawpa ei ta patu a chhuah ei ta;

⁴³ ano chata ama hnohta, “Khih hrolâzy chhao Khazohpa Khihnarâh Thâtihpha chhopa na a châ; cha vâna chata tuapa châ tlôh na ta,” tah ta.

⁴⁴ Chatawhcha Zudia râh liata apakhyna-o liatazy bie chho lymâ ta.;