Luka 5

¹ Zawpi ta Khazohpa bie nahthlie ei ta, ano amâ byh hôlô nota, Zisu cha Kenesare tipo kiah liata a duah ta.

² Tipo kiah liana chata balyh sâno hmô ta; châhrasala nga a patutuhpazy cha pua ei ta, ama saozy pasi ei ta.

³ Balyh sâkha, Saimaw eih liana chata kiah ta, a hnohta raphyu tawhta bâh a pasie awpa ta hiah ta. A tyuh ta, balyh tawhna chata zawpizy cha pachu ta.

⁴ Bie a reipa cha a bâh nahta, Saimaw hnohta, “Athupa lâ pangai la, nga patu awpa ta na saozy vawh teh,” tah ta.

⁵ Saimaw ta a hnohta, “Hyutuhpa y, hriapasa ngaitapa ta a zozâ khihdei ta hria pi ta, khâpahmah patu ma pi! Châhrasala na bie hawhta saozy cha ei vawh heih aw na,” tahpa ta a chhy ta.

⁶ Chatawhcha sao cha ama vawh nahta, nga hluhpi khu ei ta; ama saozy chhao cha a hrie pathao ta,

⁷ balyh hropa liata ama pyheih a ypazy cha âmo a bao awpa ta ku ta a kei ei ta. A vy ei ta, balyh sâno liata pabie rairieh ei ta, ama balyh chhao cha a pamôhkhei daihmâ ha ta.

⁸ Saimaw Pity chata cha cha a hmô nahta, Zisu phei liata kei paothlu ta, “Hy Abeipa, na siesai teh, moleipa ei cha hih,” tah ta.

⁹ Ama nga patupa cha ano nata a viasazy chata noâh tah kaw ei ta;

¹⁰ Saimaw pyheih, Zebadi sawchapawpa Zami nata Zawhana zy chhaota noâh tah kaw hra ei ta. Zisu ta Saimaw hnohta, “Chi khâ, atahmâ tawhta la chyhsa na patu aw na,” tah ta.

¹¹ Ama balyhzy cha ngiakâ lâ puakhei ei ta, ato siesaipa ta ano cha zi ha ei ta.

¹² Khih miakha liata a y nota, chyhsa pakha a pôhpa duata aphawhpa a vy ta; Zisu a hmô nata a hmiakô liata paopa ta, “Abeipa, na khoh khiahtala eina pathaisa thei chi na,” tahpa ta a haw chaimâh ta.

¹³ Ano chata a ku pazawh ta, kei hria ta, “Ei khoh na, vaw pathaih ha mah y,” tah ta. Sôkhata ta aphawhpa cha vaw lei ha ta.

¹⁴ A hnohta, “Ahyhmah ta chho khâ; anodeikuacha theihthaipa vâ pamosa la, na pathaina awpa ta Mawsi biepiepa hawhta hlâ teh, chyhsazy pahnosana awpa ta,” tahpa ta bie taih ha ta.

¹⁵ Châhrasala a thâtih cha pathâh via rili ta; zawpi hluhpi chata a bie thei khohpa vâta nata ama chieh-leinazy patlâh na khohpa ta a vaw hmaohpakhy ei ta.

¹⁶ Châhrasala ano cha râhpathohpa lâta sie nanopa ta thlahchhâ tyh ta.

¹⁷ Noh kha cha a pachu hai no ta, a kiahpa ta Pharisaizy nata Ryhpa pachutuhpazy atyupa ta y ei ta, chazy cha Kalili nata Zudia râh khi to tawhta nata Zerusale khih tawhzy ta a vypa ama châ; chyhsa patlâh theina awpa ta Abeipa hmotaotheina cha a hnohta a y.

¹⁸ Chatawhcha chapaw asypa pakha rakhô duata a vaw sy ei ta, Zisu hmiakô ta sopa ta angiana tlua ei ta;

¹⁹ zawpi vâta angiakheina rai hmô veih ei, vâphuh kiah ei ta, cha tawhna chata rakhô duata a lialiah liata Zisu hmiakô ta za pathlia ei ta.

²⁰ Amâ ngiapâna a hmô nahta, a hnohna chata, “Viasa, na moleinazy angiahthaipa a châ haw,” tah ta.

²¹ Ryhpa pachutuhpazy nata Pharisaizy chata, “Khazohpa a reipachhiepa he ahyma a châ tly? Khazohpa dei leipa ta ahyma moleinazy a ngiahthai thei?” tahpa ta pachâ ei ta.

²² Zisu ta ama pachâna cha pahno ta, “Nama pathipalôh liata khâpa e nama pachâ?

²³ ‘Na moleinazy angiahthaipa a châ haw,’ tahpa nata Thyu la, phei ta sie teh,’ tahpa he a kheihawhpa e a rei nao via?

²⁴ Khâparai châ sala, khizaw liata Chyhsa Sawchapawpa heta molei a ngiahthai theina a hnei tahpa nama pahnona awpa ta,” tah ta, asypa hnohna chata, “Thyu la, na hmophawh la la, na o lâ a di teh, ei cha tah na,” tah ta.

²⁵ Chatanachata ama mohmô liata thlai thyu ta, a ziana cha la ta, Khazohpa reithaina chôta a olâ a di ha ta.

²⁶ Ama zydua ta ama noâh kaw ta, Khazohpa reithai ei ta, “Atanoh he hmonoâhpa eima hmô hih,” tah ei ta, china ta bie ha ei ta.

²⁷ Cha khai nah chata pua ta, chhiekheina su liata atyuhpa, chhiekheituhpa a moh Livai, hmô ta; a hnohta, “Na zi teh,” tah ta.

²⁸ Ato siesaipa ta, thyu ta, zi ha ta.

²⁹ Livai chata a o liata Zisu chata kyhchhi rôhnahpa tao ta; chhiekheituhpa hluhpi nata chyhsa hropazy chhaota âmo cha dôhkhei ei ta.

³⁰ Pharisaizy nata ama Ryhpa pachutuhpazy chata a pachupazy hnohta paphôh ei ta, “Kheihtazie ta e chhiekheituhpazy nata moleipazy hnohta nie ta, a doh tly?” tah ei ta.

³¹ Zisu ta ama hnohta, “Chyhsa hri-ia pathaihpazy ta dawhty a ngiah leipa ei ta, chyhsa chiehleipazy ta tlao amâ ngiah tyh,

³² chyhsa siapazy tlua awpa ta a zupa châ leipa na ta, moleipazy tlua ta, parosa awpa ta a zupa tlao ei châ,” tah ta.

³³ Âmo ta a hnohta, “Zawhana pachupazy ta pati nie leipa ta y tyh ei ta, thlah ama chhâ tyh, Pharisai pachupazy chhaota cha hawhna chata ama tao tyh, châhrasala na pachupazy heta niepa ta ama doh tyh,” tah ei ta.

³⁴ Zisu ta ama hnohta, “Myuh alykheituhpazy hnohta myuhneituhpa cha a y chhôhta pati nie leipa ta nama paysa thei rai ma?

³⁵ Châhrasala myuhneituhpa cha ama hry tawhta lana noh a vaw y aw, cha nohzy liana deikua chata nie leipa ta ama y aw,” tah ta.

³⁶ Ama hnohta pakhona bie reih ta, “Ahyhmah ta poh thiehpa hriepa ta, poh parohpa liata baithla beih vei ei; baithlapa châ ha sala, a thiehpa chata hrie aw ta; a thiehpa liata a parohpa baipa cha a lyu thai vei.

³⁷ Chatawhcha ahyhmah ta kresawti thiehpa savo tithei parohpa liata ryh beih veih ei, rypa châ ha sala, kresawti thiehpa châta savo tithei cha tochheih aw ta, a lei aw ta, savo tithei chhao cha a rao hra aw.

³⁸ Kresawti thiehpa cha savo tithei thiehpa liata tlao ama rypa a châ.

³⁹ Ahyhmah ta kresawti hlôpa a do khai nahta a thiehpa khô aw vei; ‘Ahlôpa a pha via,’ tah tlôh ei ta,” tah ta.;