1
Khazohpa tha maniah patlôtuhpa palyupalihpa ta thapha ngaitapa ta sa ula; Zakaw Khazohpa palyupalihpa ta thapha ngaitapa ta awh teh u!
2
Reitheina hla sa ula, khoh zy, totâ nahthlie pha kawpa zy, tlaipi zy chhaota vaw cheih teh u.
3
Thla thiehpa liana chata chiahmie tô ula, thlâpâ pôlô nahta eima kyhchhi noh liana chhao chata.
4
Izarel sahlao châta bieraopa châ tlôh ta. Zakaw sahlao Khazohpa ryhpa a châ.
5
Zawsi sahlao hry liata pahnosa nawpa ta a raopa a châ, Izi râh chô liata a sie nona khata. Ao thei na ta, pahno tlôh na va:
6
“Ama ngiatlâh hmo hripa tawhta pasie na ta; kuzy cha kachu tawhta pathliepa ta a ypa kha.
7
Nôpopa ta na aw eichi ta, cha pachha ei na ta; tôkalôpa a thuapa a nyuna su liana khata châ chhy ei na ta; Meribah tizy liana khata eicha pasia ei kha. Selah
8
Hy ei chyhsa saih u, thei ula, ei cha pahnosa aw ei! Hy Izarel sahlao saih u, ei bie nama nahthlie khoh mawh sala!
9
Khazoh nanopa rai cha nama hry liata a y awpa châ leipa ta; khazoh nanopa rai cha namâ chhy awpa châ hra vei.
10
Kei ABEIPA nama Khazohpa cha ei châ, Izi râh tawhta cha chhituhpa ei kha. Nama pakah a kawhpa ta â ula, ei pabieh aw.
11
“Châhrasala ei chyhsa zy chata ei ao nahthlie tlôh leipa ei ta; Izarel sahlao chata eina khoh leipa ei kha.
12
Chatanachata ama pathipalôh chhoru zie lymâ hawhta y awpa ta pasaina ta, âmo ryraopa hawhta ama y nawpa ta.
13
Ei chyhsa zy heta ei bie nahthliepa ta, Izarel sahlao he ei lâpi zy liana heta ama sie mawh sala!
14
Ama khakhaipa zy cha thlai panawhpa ta, âmo adyuhtuhpa zy chô liana chata ei ku ei pathla awpa.
15
ABEIPA a haotuhpa zy cha ano lâta amâ ngiarih awpa châ ta, ama daihti deikua cha chhâzaw ta a y awpa a châ.
16
Ano chata sâh pha chaipa ta âmo a pasa awpa châ ta, lôpanô liata kheihti ta lôhrâ ei cha patlô awpa ei a châ,” tahpa ta.
