Daniel 7

¹ Babylaw beipa Belsaza kô khana liana chata Daniel ta mâ sapa ta a rakhô liata a luh liata aluahna zy cha hmô ta. Chatanachata a mâsapa cha roh ta, a tlâhpipa ta reih ta.

² Daniel chata: “Zâ ta aluahna liana chata hmôpa hnei na ta, kaoki miapalih liata thlih he tilaipi rarôy ngaitapa chô liata vaw pathli ta.

³ Chatawhcha tilaipi liana chata sa rarôy ngaitapa he vaw pua ta, a nano khaipa châ ei ta.

⁴ A miakhana cha chakeibarôhneipa alyupa châ ta, pahmôpi mathlaw hnei ta. A mathlawzy cha phiapa ta, alei tawhta chalopa ta, chyhsapa hawhta a phei miano ta a duah awpa ta taopa ta; chyhsapa pathipalôh pipa a châna taihta moh thlâh ha na ta.

⁵ Chatawhcha sa hropa a mianona cha chavyh alyupa châ ta. Tlaw rakhata a duah ta; a pakah liana chata kâru miathôh a hâh likaw liata y ta; a hnohna chata Thyu la, sapa thata nie teh,’ tahpa ta chho ei ta.

⁶ Cha hnôh lâna chata moh na ta, a hropa, keichho alyupa, a hnôh lâta pavaw mathlaw miapalih a hneipa vaw y ta; cha sa chata luh miapalih chhao hnei ta; ano hnohna chata ryureina piepa châ ta.

⁷ Cha hnôh lâna chata zâ ta aluahnazy liana chata sa miapalihna rarôypa nata chichhih ngaitapa, thatlô ngaitapa hmô na ta; thua hâh rarôy ngaitapa hnei ta; a bawhta bawh ta, hriechhei ta, a laibâhpazy cha a phei ta tly ta. A hmiakô liata sa hropa zy tawhna khata cha a nano ngaitapa a châ; ki hrawh hnei ta.

⁸ Kizy cha pachâ na ta, ama hry tawhna chata ki hropa miakha, a chyhpa ta kaw pua ta; a hmiakô liana chata ki hmiatuapa miathôhzy cha a thaby liata tlo ha ta; he ki liana heta mokhaoh zy chyhsapa mo hawhna tlai heta y ta, pakah chhao y ta, a palaina bie ta a biepa a châ.

⁹ Ei mo thlâh ha nona chata: Abeidyuchhaizy vaw patyu ei ta, chyhsa pakha hlôthlâhpa cha a tyuh ta; a chysiazy cha dâhaw hawhta a ngyuhpa châ ta, a sâ cha sahmi pathaih ngaitapa hawhta châ ta; a abeidyuchhai cha meipaleih châ ta, cha talaili phei cha mei kâ ngâpa châ ta.

¹⁰ A hmiakô tawhna chata mei chavah vaw pua ta, loh ta, a sâh a sâh ta chakao ei ta, a hmiakô liana chata thy sâh hluhpi ta chakao ei ta; ryureina vaw y ta, châbuzy cha pahypa châ ta.

¹¹ Cha nona chata ki ta a palai ngaitapa ta bie thata a reipa pyu vâna chata kaw moh na ta, sa cha thiepa ta, a pôhpa paraopa ta, mei ta rao awpa ta piepa a châna taihta moh thlâh ha na ta.

¹² Sa hropazy kha cha ama ryureina lapâpa ta y ei ta, ama hrona deikua cha daihti raopa ei kha nata daihti miakha chhôh châta pahlôhpa a châ.

¹³ Zâ ta aluahnazy liana chata,avâ meihdozy nata a vypa, chyhsa pakha, chyhsa sawchapawpa alyupa hmô na ta. Hlôthlâhpa hnohna chata a vy ta, a hmiakô liana chata ano cha a vaw chhi ei ta.

¹⁴ Chatawhcha ryureina zy, rôhnahna zy, khihnarâh zy a hnohta piepa châ ta, chyhsa to zy, pho to zy nata reih to zydua chata ama chakao nawpa ta; a ryureina cha ryureina hlôpa, a tlei beih lei awpa châ ta, a khihnarâh cha parao rimâ awpa châ aw vei.

¹⁵ “Kei, Daniel he, ei pôhpa chhôh liana heta ei palôhrupa a pachâ rôh ta, ei luh liata aluahnazy chata eina patypamâ.

¹⁶ A vaw duahpazy hryta pakha cha a kei hnia na ta, he zydua kyh liata bie hmeihseihpa cha hiahri na ta. Chatanachata na chho ta. a chhopasianazy chhao cha na pahnosa haw ta.

¹⁷ ‘He sa rarôh y ngaitapa miapalihzy he, abei papalih alei tawhta a vaw pua awpa zy cha châ ei ta.

¹⁸ Châhrasala Chônôchaipa moh pathaihpazy chata khihnarâh cha to aw ei ta, chhâzaw ta, chhâ zydua chhôh ta,’ tah ta.

¹⁹ “Chatanachata sa miapalihna, a hrohpazy hlâta a nano pachaihpa, chi chhih ngaitapa, a hâhzy thua châ ta, a patohzy dawh châ ta; a bawh ta bawh ta, hriechhei ta, a laibâhpa a phei ta a tlypâtuhpa ky liana chata bie hmeihseihpa pahno byuh kaw na ta;

²⁰ a luh liata ki hrawh nata ki hropa vaw puapa ta, a hmiakô liata miathôh a pao hawpa ky zy; kha ki, mokhaohzy hneipa ta, hmo ru ngaitapa a reihtuhpa, pakah chhao hneipa ta, aluahna zie chhao a viasazy hlâta rarôh y pachaihpa zy kha pahno byuh kaw na ta.

²¹ Chatawhcha moh thlâh ha na ta, cha ki tlai chata mopathaihpazy cha adyuh ta, pahnie ta;

²² Hlôthlâhpa a ryhpa ta, ryureina cha Chônôchaipa mopathaihpazy hnohta piepa châ ta, mopathaihpazy chata khihnarâh ama tona daihti vaw tlô hlâ lei cha.

²³ “He hawhna heta tah ta: ‘Sa miapalihna cha, alei liata khihnarâh miapalihna a vaw y awpa pamosana châ ta, khihnarâh hropa zydua liata a nano pachaipa, alei pôhpalôhpa a bawhta bawhpa ta, tlypa ta a padizaotuh awpa cha a châ aw.

²⁴ Ki hrawhzy kyh cha, he khihnarâh tawhtapa he abei pahrawh ama vaw pua aw; âmo hnôh lâna chata pakha vaw pua aw ta; hmia lâtahpa tawhna chata a nano aw ta, abei pathôhzy cha a panawh aw.

²⁵ Chônôchaipa chakhiapa ta bie reih aw ta, daihtizy nata ryhpa cha panano a chhuah aw ta; daihti su kha nata daihtizy nata daihti khophie chhôh cha a ku liata piepa ama châ aw.

²⁶ Châhrasala ryureina vaw y aw ta, a biehneina cha pachhapa ta paraopa thlah awpa ta ama lei aw.

²⁷ Khihnarâh nata ryureina nata avâ tlokhuh ry liata khihnarâh zy rôhnahna cha Chônôchaipa mopathaipazy hnohna chata piepa a châ aw; a khihnarâh cha khihnarâh hlôpa châ ta, a vaopa khihnarâh zydua ta chakao aw ei ta, ano rei amâ ngiah aw.

²⁸ “He he hmo chhâna cha a châ. Kei, Daniel, he ei pachânazy chata na patypamâ ta, ei hmia a nano ta; châhrasala ei palôhrupa ta bie cha a vao thlâh ha na ta.