2 Abeizy 9

¹ Hrohsopa Elaisa ta hrohsopa sahlao sawchapawpa zy hry liata pakha aw ta, a hnohta, “Na chai a sai la, he sathaw byh he cheih la Ramôkilia khih lâta vawh teh.

² Na kei tlô nata Nimsi saw Zehôsapha sawchapawpa Zehu kei tlua la, a kei ngia la, a unawhpa zy hrytawhtapa aw la, chhôhpadâhpa chhôh chaipa liata a ngiakhei teh.

³ Sathaw byh he la la, a luh liata hry la, ‘ABEIPA ta he tana heta a tah, Izarel zy chô liata abei châta sathaw ei cha thu,’ tahpa ta tah teh. Chatanachata ochhi pahy la, a râ teh; bohpi y khâ,” tah ta.

⁴ Satliapa hrohsopa cha Ramôkilia lâna chata sie ta.

⁵ A kei tlô nata pheisaih hyutuhpa sahlao a vaw tyuh pahmaoh ei ta; ano chata, “Pheisaih hyutuhpa y, na hnohta bietapa reih awpa ei hnei,” tah ta. Zehu chata, “Ahy hnohna heta maw?” tah ta. Ano chata, “Pheisaih hyutuhpa y, nâma hnohna heta,” tah ta.

⁶ Thyu ta, a o liata a ngia ta; a luh liata sathaw hry ta, a hnohta, “ABEIPA Izarel zy Khazohpa ta he tana heta a tah, ABEIPA zawpi sahlao, Izarel sahlao chô liata abei châta sathaw ei cha thu.

⁷ Ei chakaotuhpa hrohsopa zy thisaih nata ABEIPA chakaotuhpa zydua thisaih phuh cha Zezebel liata ei la thei nawpa ta na zibeipa Ahaba chhôhkha zy cha pahleipadia khai aw chi ta.

⁸ Ahaba chhôhkha zydua cha leidia khai aw ei ta; Ahaba tawhna heta chapaw saw maih cha Izarel râh liata chyhsa sei a châpa nata khotalaipa chhao ei pahleipadia aw.

⁹ Chatawhcha Ahaba chhôhkha zy cha Neba sawchapawpa Zerôbaw chhôhkha zy nata Ahizah sawchapawpa Baasha chhôhkha zy hawhta tao aw na ta.

¹⁰ Zezebel cha Zezrel khih kuh kiapâh liata i-zy ta ama chaih aw, a pabutuh awpa rai y aw veih ei, tahpa ta,” tah ta. Chatawhcha ochhi pahy ta a râ haw ta.

¹¹ Zehu cha a zibeipa chakaotuhpa zy lâta vaw pua ta, pakha chata a hnohta, “Phana lâ kyh ma a châ? Kha ahrupa kha kheihta zie ta nâ lâta a vypa ma a châ tly?” tah ta. Ano chata ama hnohta, “Nama pahnopa chyhsa châ ta, a bie reipa chhao kha nama pahno mâ tâh,” tah ta.

¹² Âmo chata, “Châ bao va, maniah chho tua,” tah ei ta. Ano chata he tana heta eina tah, “ABEIPA ta, ‘Izarel sahlao chô liata abei châta sathaw ei cha thu,’ tahpa ta,” tah ta.

¹³ Chyhsa to ta ama poh hlai ei ta, kiana chô liata phaw chyu ei ta, “Zehu abei a châ haw,” tahpa ta chiahmie tô ei ta.

¹⁴ Nimsi sawchapawpa Zehôsapha sawchapawpa Zehu chata Zorama cha tei ta. (Suria beipa Hazael vâta Zorama nata Izarel sahlao zydua chata Ramôkilia khih cha vaih ei ta;

¹⁵ Abei Zorama deikua cha Suria beipa Hazael nata amâ dyuhna liata Suria chyhsa zy ta hmah ama paphaohpa kha Zezrel khih lâta a patlâh awpa ta a kua heihpa kha.) Zehu chata, “Ei chhâh a châpa nama châ khiahtala, ahyhmah ta Zezrel khih lâta he bie zy he reih awpa ta khih tawhtapa he papua khah u,” tah ta,

¹⁶ Zehu cha talaili liata kiah ta, Zezrel khih lâta sie ta, Zorama cha cha liana chata a zia ta. Zudah beipa Ahaziah chhao, Zorama a hmô awpa ta zu ta.

¹⁷ Zezrel kuh liata riahvaihtuhpa a duah ta, ano chata Zehu sahlao a vypa cha hmô ta, “Chyhsa hluhpi ei hmô,” tah ta. Zorama chata, “Arâ a kiahpa chyhsa âmo dy awpa ta tuah la, ‘Phana lâ kyh ma?’ kei tah ei se,” tah ta.

¹⁸ Chyhsa pakha arâ a kiahpa dy awpa ta vawh ta, “Beipa ta he tana heta a tah, ‘Phana lâ kyh ma?’ tahpa ta,” tah ta. Zehu chata, “Phana lâ kyh cha nama pahno awpa khâpa a y? Ei hnôh lâta sie hra teh,” tah ta. Riahvaihpa chata, “Eima chyhsa tuapa chata âmo lâ cha kei tlô tlai ta, châhrasala vaw kua khao chei ta vei,” tahpa ta chho ta.

¹⁹ Chyhsa pakha arâ a kiahpa tuah heih ta, cha chyhsa chhao cha âmo lâta kei tlô ta, “Beipa ta he tana heta a tah, ‘Phana lâ kyh ma?’ tahpa ta,” tah ta. Zehu ta a chhy ta, “Phana lâ kyh cha nama pahno awpa khâpa a y? Ei hnôh lâna heta sie hra teh,” tah ta.

²⁰ Riahvaihtuhpa chata, “Ano chhaota âmo lâ cha kei tlô tlai ta, ano chhao cha vaw kua cheita khao vei. A pasiesana zie chhao Nimsi sawchapawpa Zehu pasiesana yzie tlai a châ; chahra ngaitapa ta a pasiesa,” tah ta.

²¹ Zorama chata, “A chhuanoh teh u,” tah ta. A talaili cha a chhuahnoh ei ta, Izarel beipa Zorama nata Zudah beipa Ahaziah cha ama talaili chyu ta kei pua ei ta, Zehu a kei hmô nahta, “Zehu, phana lâ kyh ma?” tah ta. Ano chata a vaw chhy ta, “Na nô Zezbel heta sihryhna nata dyuh a hmâh ngaita chhôhna heta phana lâ kyh khâpa a y thei aw?” tah ta.

²³ Zorama ta a pahieh ta a râ ta, Ahaziah hnohta, “Ahaziah, a dôna a y hih!” tah ta.

²⁴ Zehu chata a libaw cha tha y maihchâh ta a kei ta, Zorama kâ ru likawh liata ka ta, châtai cha a châh-ao liata a ngia ta, a talaili liata a chahy haw ta.

²⁵ Zehu ta a pheisaih hyutuhpa Bidaka hnohta, “A pyh la, Zezrel chyhsa Nabô sahdô su liata thy pathlah teh, eikhano ta nâma nata a paw Ahaba hnohta hmaohkha ta eima kia no ta ABEIPA ta he phao he a chô liata a pahniehpa rai a châ:

²⁶ ABEIPA ta, ‘Zâhiah Nabô thisaih nata a sawchapawpa zy thisaih ei hmô tlai mâ tâh, a tahpa kha, ABEIPA ta he su tlai liana heta viari ei cha thô aw,’ a tah heihpa kha. ABEIPA bie hawhta a pyh la, he su tlai liana heta thy teh,” tah ta.

²⁷ Zudah beipa Ahaziah ta cha cha a hmô nahta sahdô liata o lâta a râ haw ta. Zehu chata a chadai ta, “Ano chhao talaili liana khata thie hra teh u,” tah ta. Iblia khih kiapâh Kura khyna liata tei ei ta, Mekidô khih lâta a râ ta, cha liana chata thie haw ta.

²⁸ A chakaotuhpa zy chata Zerusale lâta talaili ta siekhei ei ta, ano thlâ liata a mahpaw zy hry liata Davi khihpi liata pabu haw ei ta.

²⁹ Ahaba sawchapawpa Zorama kô hrawhleikha a bei kô ta, Ahaziah cha Zudah sahlao chô liata abei pathao ta.

³⁰ Zehu cha Zezrel liata a kei ngia nahta, Zezebel ta vaw thei ta; a mozy vaw hnia ta, a sâ zy a vaw tobi ta, opy liata a vaw luah ta.

³¹ Zehu kuh chhikao liata a vaw ngia no ta, “Na a zibeipa a thietuhpa Zimri y, phana lâ kyh ma?” vaw tah ta.

³² Ano cha opy lâ a heipa ta mohmia kaw pasaih ta, “Ahy e kei chhâh a châ eichi? Ahyzy ei?” tah ta. Chyhsa hrilyupa pano tlyma, pathôh tlyma ano lâ avaw heih ei ta.

³³ Ano chata, “Za thy pathla teh u,” tah ta. Za thy pathlah ei ta; a thi cha pâhchhô nata arô zy cha thata a pie ta, arâ zy chata tly ei ta.

³⁴ A ngia ta, nie ta, doh ta; “Chhiesapa ta a ypa nô kha kei pachâ ula, kei pabu teh u,” abei sawchanônô châ tlôh ta,” tah ta.

³⁵ Châhrasala pabu awpa ta vawh ei ta, a luh ru zy, a phei zy, a ku pazah zy dei leipa ta cha hmô khao leipa ei ta.

³⁶ A vy heih ei ta, vaw chho ei ta, ano chata, ”He he ABEIPA ta a chakaotuhpa Tisabi chyhsa Elaizahmâpa ta, ‘Zezrel kuh kiapâh liata i ta Zezebel sapa cha chaih aw ei ta;

³⁷ Zezebel ri chaZezrel kuh kiapâh liata sahdô liata ie hawhta châ aw ta, he he Zezebel a châ ama tah lei nawpa ta,’ tahpa bie reipa kha a châ hih,” tah ta.