1
Hy Khazohpa, ei thlahchhâna liana heta nah pachôh la; ngiachhie ei hawpa tawhna heta a nyu khah y!
2
Na nahthlie la, nâ chhy mah y; ei hri-iana kyh vâta atymâna ta, ei rôh tyh.
3
Khakhaipa pyu vâta zy, hmoparaopa pasaipa-ina vâta zy ta. Âmo chata moleina na thy thlu ei ta, hiehâhna ta na taola tlôh ei ta.
4
Ei chhôh liana heta ei pathipalôh pasa ngaita ta, thina rarôh yna zy chata na vi ta.
5
China nata chalyuna ta na by ta, chichhihna ta eina khu khai haw.
6
“Vachhuh hawhta mathlaw hnei ei khoh kaw dia! A zaw syulyu aw na ta, pahâna ei hmo aw, thlahlôh ngaitapa ta y aw na ta;
7
lâhlapi lâta charei aw na ta, râhpathohpa liata y aw na ta, Selah
8
thlih ru ngaitapa nata thlihpipa tawhta a bohna su lâta ei râsai parah ha awpa,” tah na ta.
9
Ama paleih cha pahleipadiapa ta, hy Abeipa, hriechhei mah y; khihpi liana chata atuna nata ahryuna hmô tlôh na ta.
10
A chhô a zâ ta khihpi cha kuh dôhna liata chahlô ei ta; a chhôh liana chata hmoparaona nata moleina y hra ta,
11
hmoparaona a chô liata y ta; pasaipa-ina nata dona chata a tlyhmia cha puasai beih vei.
12
Na reipachhietuhpa cha khakhaipa cha tlôh lei khâh ta, a cha khiahta cha ei tao thei via awpa; ei chô liata a palaipa cha nâ haotuhpa châ hra vei, a châ khiahta cha ei nyu sai awpa.
13
Châhrasala nâ, ei chyhsa heihpa, ei viasa, ei kao kawpa châ tlôh chi ta.
14
Reikah pha ngaitapa ta a chhohia tyh pi ta, zawpi hryta Khazohpa achhyna-o lâ eima charei tyhpa kha.
15
Thina ama chô liata sôkha ta tlô sala; Sheôl liana chata a hrohpa ta zu ei se; hmoparaopa zy cha ama pahrâna liata nata ama chhôhzy liata y tlôh ta.
16
Kei ta la Khazohpa pado aw na ta; ano ABEIPA ta eina pachha aw.
17
Zâ lâta zy, my ta zy, nohchhô ta zy ei nôpona bie ei reih nahta, ei ao a nahthlie aw.
18
Ei chô liata sôh lyuna tawhna chata ei hrona he thlahlôh ngaitapa ta pachha haw ta, nâ dyuhtuhpa zy cha hluh tlôh ei ta.
19
Khazohpa hlâno tawhta a y thlâh hapa chata nahthlie aw ta, âmo â chhy aw; nanona rai hnei beih leipa Khazohpa a chi beih leipa zy cha. Selah
20
Ano nata a dyhpa zy chô liana chata a ku chalo ta, a biehrai cha parao haw ta.
21
A pakah cha sâhpiti kuapa hawhta tlao ta, a pathipalôh deikua cha adyuhna châ tlôh ta; a biezy cha sathaw hlâta pahnia ta, châhrasala zaozi phia chiehpa zy châ tlôh ta.
22
Na phaohri cha ABEIPA chô liata pahnieh la, ano ta tha cha patlô aw ta; a siapa cha khatita hmahta pasiepa pasaih aw vei.
23
Châhrasala hy Khazohpa, nâ ta âmo cha leidiana khaotlôh liana chata na paysa aw; thisaih palo a hmahpa nata dô a hmâhpa chyhsa zy cha hroh thei aw veih ei. Kei deikua chata nâ ei cha ngâ aw.
