1
Chatawhcha Elihu cha reih lymâ ta:
2
“A chalih tua la, ei cha pahmô aw, Khazohpa vyuhpa ta biereipa ei hnei thlâh ha chy.
3
Ei pahnona duah ei vaw lapakhy tua aw, nâ Taotuhpa siana ei bai tua aw.
4
Ei bie cha haih cheita aw vei; pahnona kipa a hneipa cha na kiapâh ta a y.
5
“Khazohpa cha thatlô ngaita kawpa châ ta. ahy hmahta mohnao vei;
6
Hmoparaopa cha pahlôh aw vei, sipasapa deikua cha a sia ngaitapa ta a pachia tyh.
7
A siapa zy cha a heisai leipa ta, beidyuchhai liata abeizy hnohta chhâzaw ta patyusa ta, palyupalihpa ta ama y tyh.
8
Keihrai daipa vaw châpa ta, pasaipa-ina khawhri ta chahrypa ama châ khiahtala,
9
ama hmotaona nata taopasina pamosa ei ta, ama nôchhiena kyh zy chhao.
10
Pachuna lâta a nah pavâsa ta, moleina tawhta vaw kua awpa ta bie a pie.
11
A papeisa ta ano ama chakao khiah cha, ama nohzy cha palôhtlâhpata ta ama hmâh aw, ama kô zy chhao cha a pha aw.
12
Châhrasala amâ papeisa vei khiahta cha, zaozi ta ama leidia aw, pahnona leipa ta ama thi hra aw.
13
“Palôh ta Khazohpa a za leipa chyhsa zy chata hiehâhna pachô ei ta; chahrypa a châ no chhaota ano bao awpa ta awh vei.
14
Ama thyudyu nota thi ei ta, noza ngaitapa ta ama hro a chhâ.
15
Pasataopa zy cha ama pasana hmâpa ta a pachha ei, rietheipa hmâpa ta ama nah a pavâsa.
16
Pachârôhna tawhtapa nâ cha cha papua aw ta, a cha-ie leina su liata na y tyhpa hawhta, na pati dôhpa cha thawpa ta a pabie aw.
17
“Châhrasala nâ cha hmoparaopa zy chô liata dôna tao leipa chi teh, sipasapa sawzy dôvei chi ta.
18
Hneirôna ta ano leipa lâ a cha siekheipa ta y leipa la, a naohna hluhpi vâta molei khâ.
19
Hneirôhpa zy hrie la, dyhchhiepa zy deita châ leipa ta; thatlôpa zy nata chieh leipazy chhaota,
20
Na pahno leipa chyhsa zy cha mohnao khâ, ama su liata ama leina daihti a châ.
21
A chado la, moleina lâ a heih khâ, he he pasa tao vyuhpa ta nâ tlypa châ tlôh.
22
Khazohpa cha a hmotaotheina vâta palyupalihpa ta a y; pachutuhpa ano hawhpa ahy e a y?
23
Ahyma a taona zie awpa a raopa tyh, ahyma, “Sia leina na tao,” a tah thei?
24
“A raihria parôhnahsa awpa pahno thlâh ha teh, chyhsa zy ta hla ta ama sa tyhpa cha.
25
Chyhsa tota cha cha moh ei ta, chyhsa ta a hla ngaitapa tawhta ama sai.
26
Pachâ teh, Khazohpa cha a rôhnah na, ano vaw pahno ma pi; a kôzy chhao a chadai theipa châ vei.
27
Ti di tlapa zy cha avâ lâta sy khai ta, tihu lâta a pathaisapa ta avâ sua lâta a lie ta,
28
avâ ta pasuasa ta, chyhsa chôta thata a sua thlu tyh.
29
Meihdo a pachhaihna zie khi chyhsa ta a pahno thei ma? Tôkalôpa a thua ngâpa khi?
30
Moh teh, a chheipâh ta a khaihna papaisa ta, tilaipi chao chhao a khu hra.
31
Cha hawhna chata phopi zy thapatlô ta, niepa a hluhpi a pie.
32
Dôhla ta a kuzy khu ta, â chhuahpa cheingei khai awpa ta a tuah tyh.
33
Tôkalôpa a thuapa chata a thâtih phuah ta, moleina kyh liata a hie thata a hâh.