1 Abeizy 2

¹ Davi thi daihti a vaw hnia haw ta, a sawchapawpa Sawlawmaw cha bie pie ta,

² Leilô zydua ryhpa hawhta ei sie hra aw. Thatlô ngaitapa ta y la, paw tloh ngaitapa ta y teh,

³ na hmotaopa maih nata nâ heina lâ maihta thlaochhipa ta na y thei nawpa ta Mawsi ryhpa liata a rohpa hawhta ABEIPA na Khazohpa ta a lâpi zy a chhih awpa nata a bieraopa zy, a biepiepa zy, a pachiapa zy nata a biepahnosapa zy a pyh awpa ta bie a piepa zy he zyh teh;

⁴ ABEIPA ta keima kyh liata, ‘Na pathlazy ta ama pathipalôh hmeihseihpa nata ama palôhrupa hmeihseihpa ta ei mohmô liata hmeihseihpa ta y awpa ta ama yzie liata amâ chado khiahtala Izarel zy abeidyuchhai liata atyuh awpa chi aw veih ei,” tahpa ta a reipa kha a pa-i aw.

⁵ Zeruia sawchapawpa Zôaba eina tahna zie Izarel zy pheisaih hyutuhpa pano, Nera sawchapawpa Abne nata Zethe sawchapawpa Amasa zy a tahna zie tlai kha na pahno na, kha hawhta thiepa ta a dy nota adyuhpa thisaih palopa hawhta palo ta, a chai liata a chaisaihna liata a pheiky a kypa liata adyuhna thisaih a pahlaona zie zy kha.

⁶ Chavâta ryhpaohna na pahnona zie hawhta tao la, a luh liata a sâ pawhpa he thlâ lâta thlahlôh ngaitapa ta pasiesa khah y.

⁷ Kilia chyhsa Barzilai sawzy chô liata deikua cha ngiachhiena palâsa la, na tlâhkhai liata pati a dôhtuhpa ta pahlao hra mah y; na unawhpa Absalaw tawhta ei râ nona khata ei hnohta a vy tlôh ei ta.

⁸ Bahuri khihpa Benzami pathla Kera sawchapawpa Shimei he na hnohta y ta, ano chata Mahanai su lâ ei sie nona khata chhiesana pha lei ngaitapa ta chhie na sapa ta; anodeikuacha Zawdah liata eina dy awpa ta a zu ta, cha liana chata, ‘Zaozi ta cha thie aw va na,’ tahpa ta ABEIPA moh reipa ta a hnohta chhie sa haw na ta,

⁹ ‘Chavâta thai châpa ta pathlie khâ, chyhsa a sopa châ tlôh chi; a chô liata kheihta na tao awpa ma a châ tahpa pahno aw chi ta, a luh liata a sâ pawhpa cha thisaih chhaota thlâ lâta na pasiesa aw,” tah ta.

¹⁰ Davi cha a mahpaw zy hnohta â mo hawh hra ta, Davi a bei chhôh cha kô sypalih a châ; Hebraw khih liata kô sari a bei ta, Zerusale khih liata kô sythôh nata kô thôh a bei ta.

¹² Sawlawmaw cha a paw Davi abeidyuchhai liata a tyuh ta; chatanachata a khihnarâh cha thata pa-ipa ta vaw y haw ta.

¹³ Hakitha sawchapawpa Adônizah cha Sawlawmaw nô Basheba lâta vawh ta. Ano chata, “Phana lâ kyh ta a vypa ma na châ tly?” tah ta. Ano ta, “Phana lâ kyh ta a châ,” tah ta.

¹⁴ Ano chata “Na hnohta khâpa tlyma reih awpa ei hnei,” tah ta. Ano chata, “Reih teh,” tah ta.

¹⁵ Ano chata, “Râh he kei eih a châ haw tahpa nata Izarel sahlao zydua chhao heta keima he abei châta eina sai thlâh haw ei tahpa pahno chi ta; châhrasala râh cha ei unawhpa chata tlao a vaw palie haw ta, ABEIPA a vaw raona zie ta ano eih châ rai ta.

¹⁶ Atahmâ he hmo miakha ei cha hiah awpa hnei na ta; â ryh tah leipa ta y chachei ta khah y,” tah ta. Ano chata a hnohta, “Reih teh,” tah ta.

¹⁷ Ano chata, “Ngiachhie ngaitapa ta abeipa Sawlawmaw na chhopa la, na bie cha ei tlôh lei khâh aw ta, Shuna chyhsa Abishaka lahpinô ta na pahneisa mawh sy,” tah ta.

¹⁸ Basheba chata, “A phana; abeipa cha ei cha vaw chho pa aw,” tah ta.

¹⁹ Basheba cha Adônizah chho pa awpa ta abeipa Sawlawmaw lâta vawh ta. Chatawhcha abeipa cha a no a vaw ly awpa ta thyu ta, a hmiako liata a bôh ta; a abeidyuchhai liana chata a tyuh ta, abeipa nô châta abeidyuchhai palasa ta; a chachâh lâta a tyuh ta.

²⁰ Ano chata, “Hmo miakha a chyhpa ta ei cha hiah aw, â ryh tah leipa ta y chachei ta khah y,” tah ta. Abei chata a hnohta, “Hiah mah y, ei nâ y, â ryh tah leipa ta y chachei ta aw va na,” tah ta.

²¹ Ano chata, “Shuna chyhsa Abishaka he na unawhpa Adônizah lahpinô châta pahneisa teh,” tah ta.

²² Abeipa Sawlawmaw chata achhy ta, a nô hnohta, “Kheihta zie ta Shuna chyhsa Abishaka he Adônizah châta a hiahpa ma na châ tly? Râh chhao he hiapa lâlao châ chih; ano cha ei uhta a châ mâ tâh, ano châta nata theihthaipa Abiatha nata Zeruia sawchapawpa Zôaba châta chhao hiah châ chi,” tah ta.

²³ Chatanachata Abei Sawlawmaw chata, “ABEIPA moh reipa ta Adônizah hmo hiapa heta ano chô liata thina kyh a reipa a châ hlei leipa khiahtala, Khazohpa ta a taopa hawhta na tao sala, cha hlâta tha via chhaota!

²⁴ Chatanachata ABEIPA a bie taipa hawhta na pa-i ta, ei paw Davi abeidyuchhai liata na patyusa ta, chhôhkhana paduatuhpa hrona reipa ta ei reih, Adônizah he atanoh heta thie awpa a châ,,” tahpa ta chhie sa haw ta.

²⁵ Chatanachata Abei Sawlawmaw chata Zehôiada sawchapawpa Benai cha tuah ta; ano chata tu sao ta, thie haw ta.

²⁶ Chatawhcha theihthaipa Abiatha hnohta abeipa ta, “Anathô khih liata na o lâta a di teh; a thi tlâh châ chi ta. Châhrasala ei paw Davi hmiakô liata Abeipa KHAZOHPA Byh nâ sy tyhpa vâta nata ei paw riethei taona zydua liana chata na vaw taokhei haw tyhpa vâta atahmâ la cha thie mâh aw va na,” tah ta.

²⁷ Sawlawmaw chata Abiatha cha ABEIPA theihthaipa a châna pabâsa haw ta, ABEIPA ta Shilôh khih liata Eli chhôhkha zy kyh a reipa kha a patlôsa thei nawpa ta.

²⁸ Cha kyh cha Zôaba ta vaw thei ta, Zôaba cha Absalaw chhâh a châ lei tarawpa ta Adônizah chhâh a châpa châ tlôh ta, chatanachata Zôaba cha ABEIPA poh-o lâta a râ ta, maisâh kizy cha patu haw ta.

²⁹ “ABEIPA poh-o lâta Zôaba a râ ta, maisâh thaby liata a y,” tahpa ta Abeipa Sawlawmaw chho ei ta, chatanachata Sawlawmaw chata Zehôiada sawchapawpa Benai cha, “Khy hnao teh,” tahpa ta tuah ta.

³⁰ Chatawhcha Benai cha ABEIPA poh-o lâta khy ta a hnohta, “Abeipa ta, ‘Pua mawh sy’ a cha tah na,” tah ta. Ano chata, “Châ bao va, he liana heta thi lavâ na,” tah ta. Cha bie cha Benai chata abeipa lâta tlôkhei heih ta.

³¹ Abeipa chata a hnohta, “A reipa hawhna chata kaw tao la, tusao la, pabu teh; a chhâpa y leipa ta Zôaba ta thisaih a palona tawhtapa kha, kei nata ei paw chhôhkha zy he na pathaisa thei nawpa ta.

³² Ano hlâta chyhsa sia viapa nata pha viapa pano, Nera sawchapawpa Abne Izarel zy pheisaih hyutuhpa nata Zethe sawchapawpa Amasa Zudah zy pheisaih hyutuhpa kha, ei paw Davi pahno leipa ta siehnao ta, zaozi ta a thiepa vâta ABEIPA ta a thisaih cha ano luh chô liata tlai a vaw palie aw.

³³ Chatanachata ama thisaih cha Zôaba luh chô liata nata a pathlazy luh chô liata chhâzaw ta a lie aw ta; Davi chô liata zy, a pathlazy chô liata zy, a chhôhkha chô liata zy, a abeidyuchhai chô liata zy deikua cha ABEIPA tawhtapa thlahlôhna chhâzaw ta a y thlâh ha aw,” tah ta.

³⁴ Chatanachata Zehôiada sawchapawpa Benai cha khy ta, tusao ta, thie haw ta; râhpathohpa liata ano o liana chata pabu haw ei ta.

³⁵ Abeipa ta Zehôiada sawchapawpa Benai cha pheisaih sahlao chô liata a vyuhpa ta paysa ta, theihthaipa Zadôka cha abeipa ta Abiatha vyuhpa ta paysa ta.

³⁶ Chatawhcha abeipa ta Shimei cha pa-awsa ta a hnohta, “Zerusale liana heta o sa la, cha liana chata y la, cha tawhtapa cha khataih lâ hmah pua khâ.

³⁷ Na pua no, Kidraw chavah na chaka no tlaita na thi aw tahpa pahno teh; na thisaih cha nâma luh chô lia tlaita a y aw,” tah ta.

³⁸ Shimei chata abeipa hnohta, “Â do na; abeipa ei zibeipa ta a reipa hawhna chata na chakaotuhpa ta a tao lymâ aw,” tah ta. Shimei cha Zerusale liana chata bohpi y ta.

³⁹ Châhrasala kô thôh tawhna chata Shimei seizy hry liata pano cha Katha khih abeipa Maaka sawchapawpa Akisa lâta a râ ei ta, “Na seizy cha Katha khih liata ama y,” tahpa ta Shimei cha chho ei ta.

⁴⁰ Shimei cha thyu ta, alâ ky padia ta, a seizy tlua awpa ta Katha khih lâ Akisa lâna chata sie haw ta; Shimei chata Katha khih tawhtapa a seizy cha kei dy haw ta.

⁴¹ Shimei Zerusale khih tawhtapa pua ta, a vaw tlô haw heih, tahpa Sawlawmaw cha chho ei ta,

⁴² abeipa chata Shimei cha pa-awsa ta a hnohta, “Na pua no, râh hro lâ na pua no tlaita na thi aw,” tahpa ta ABEIPA moh reipa ta chhie cha pasasapa ta cha pahnosa haw vana mâ? Chatawhcha nâ chhaota ei hnohta, ‘Na bie reipa ei theipa he a pha na,’ na tah kha zaw.

⁴³ Khâpa vâta ABEIPA chhiesapa nata bie ei cha piepa kha na patlô vei?” tah ta.

⁴⁴ Abeipa chata Shimei hnohta, “Na pathipalôh chhôh moleizie ei paw Davi chô liata na taona ziezy kha pahno khai chi ta; ABEIPA ta na moleina he nâma luh chô liata tlai a vaw palie aw.

⁴⁵ Abeipa Sawlawmaw deikua cha byhnâ awpa ta y aw ta, Davi abeidyuchhai cha ABEIPA hmiakô liata chhâzaw ta pa-ipa ta a y aw,” tah ta.

⁴⁶ Chatanachata abeipa chata Zehôiada sawchapawpa Benai cha bie pie ta; ano cha pua ta, tusao ta, thie haw ta. Chatanachata khihnarâh cha Sawlawmaw ku liata pa-ipa ta y haw ta.