Mathai 24

¹ Zisu achhyna-o tawhtapa pua ta, a sie chy ta, a pachupazy cha Khazohpa achhyna-ozy pamosa awpa ta a hnohta a vy ei ta.

² Ano chata ama hnohta, “He zydua he nama hmô ma? Hmeihseihta ta, ei cha chho ei chuh, cho leipa ta alô a pachopa rai sâkha hmah he liata y aw vei,” tah ta a chhy ta.

³ Zisu Ôli tlâh chô liata a tyu nota, pachupazy cha âmo deita ta a hnohta a vy ei ta, “Cha cha khatita e a vaw y aw, nâ vy heihna nata khizaw chhâna pahnona cha kheihta e a châ aw? maniah chho teh,” tah ei ta.

⁴ Zisu ta a chhy ta ama hnohta, “Ahy hmah ta ama cha dôpakhei lei nawpa ta a chado teh u.

⁵ Chyhsa hluhpi ta, ‘Mesiah cha ei châ,’ tahpa ta keima moh a bipa ta a vy aw ei ta, chyhsa hluhpi dô tlôh aw ei ta.

⁶ Chinazy nata chariah pyu pathâhpazy pahno aw eichi ta; nama nôpo lei nawpa ta a chado teh u, cha zydua cha a vaw y awpana a châ; anodeikua a chhâna cha châ mâh vei.

⁷ Pho hropa nata pho hropa adyuh aw ei ta, râh hropa nata râh hropa adyuh aw ei ta, su to liata chakâhnazy y aw ta, alozy a sih aw:

⁸ cha zydua cha sawzei pasana a thaona hawhta a châ.

⁹ Cha tina chata riethei tao awpa ta cha patusa aw ei ta, ama cha thie hra aw ei; ei moh vâta pho zydua a haopa ta nama y aw.

¹⁰ Cha tina chata chyhsa hluhpi amâ ngiapâna pahlei aw ei ta, âmo nata âmo a patusa aw ei ta, amâ hao rairieh aw.

¹¹ Chatawhcha hrohso pakheipa a hluhpi pua aw ei ta, chyhsa hluhpi ama dô aw.

¹² Moleina papôhsa ta a ypa vâta, chyhsa hluhpi ama kyhpachâna cha a dia aw.

¹³ Châhrasala a chhâna taihta a taopa maih deikua cha, cha chyhsa tlai cha pachhapa ta a y aw.

¹⁴ Chatawhcha he Khihnarâh Thâtihpha he pho zydua pahnosa awpa ta, khizaw zydua liata chhopa ta a y aw; cha khai tawhna chata chhâna cha a vaw y aw.

¹⁵ “Cha tina chata roryhrapa pasichhihna hrohsopa Daniel ta a reipa kha, su pathaihpa liata a duah ta nama hmô tina chata, (a reipa maihta a yzie pahno mawh sy),

¹⁶ Zudia râh liata ypazy cha tlâhzy lâta a râ ei se;

¹⁷ o chô liata a ypa cha o liata hmo la awpa ta chô khah se;

¹⁸ lyu liata a ypa cha a poh la awpa ta kua heih kha se.

¹⁹ Cha daihti liata chanô sawphaohpazy nata hawsaih a pyh haipa cha ama hu a po aw!

²⁰ Nama râ nawpa daihti cha chasipaw ta ma, pahânoh ta tlyma a vaw tlô lei nawpa ta thlahchhâ teh u.

²¹ Cha daihti liana chata rietheina thata y tlôh aw ta, cha hawhpa rietheina cha aleilô pi no tawhta atahmâ taih y beih leipa ta, khâpa nota hmahta y heih khao aw vei.

²² Cha nohzy cha pachyusapa châ leipa sala, chyhsa rai a hrohpa ta pua aw veih ei; châhrasala atlypazy vâta cha noh cha pachyusapa a châ aw.

²³ “Chatawhcha ahyrai ta nama hnohta, ‘Moh teh, Mesiah cha he liana heta a y!’ tlyma ‘He lia hih!’ tlyma ama tah khiahtala zo kha u.

²⁴ Krista pakheipazy nata hrohso pakheipazy vaw pua tlôh aw ei ta, chazy chata tao theipa châ ei sala, atlyhpazy chhao tlai ama dô thei nawpa ta ngiana nata hmonoâhpa rôhnah ngaitapazy ama tao aw.

²⁵ Pachâ teh u, ei cha chho chhielie ei hih.

²⁶ Cha tina chata nama hnohta, ‘Pachâ teh u, râhpathohpa liata a y,’ ama cha tah khiahtala pua kha u; ‘Chhôhpadâhpa chhôh chaipa liatazy a y,’ ama cha tah khiahtala zo kha u.

²⁷ Dôhla nochhi lâta vaw pathli ta notla lâ taih chhao a khaipa hawhta, Chyhsa Sawchapawpa a vy heihna cha cha hawhna cha châ tlôh aw ta.

²⁸ Khataih liata rai athiruapa yna maih ta, vâkhieh zy chhao ama y pakhy aw.

²⁹ “Cha noh rietheipasana khai tawhna chata, noh pazohsapa ta y aw ta, thlâpâ ta khaih khao leipa aw ta, avâ tawhta awhsizy tla aw ta, avâ hmotaotheinazy cha chalyusapa a châ aw.

³⁰ Chatawhcha Chyhsa Sawchapawpa ngiana cha avâ liata a lâ aw, cha tina chata alei liata pho tozy cha mâchhiesapa ta y aw ei ta, Chyhsa Sawchapawpa cha hmotaotheina nata rôhnah ngaitapa ta avâ meido chô liata a zupa ama hmô aw,

³¹ Chatawhcha a vâlyuhchâpazy cha chiahmie paro ngaitapa chhaota a tuah aw, âmo chata atlyhpazy cha kaokih miapalih tawhta, avâ chy chhâna tawhta hiakha lâ chhâna taihta ama pakhy aw.

³² Theiku kô liana heta a pakhona bie a chu teh u.” A chhyh vaw thao ta, a hna a vaw pathlie khiahtala, nopi a hnia haw tahpa nama pahno tyh.

³³ Cha hawhna hra chata nâmo chhaota cha zydua cha nama hmô tita, ano cha a vaw hnia ha ta, ochhi thaby lia tlaita a y tahpa pahno teh u.

³⁴ Hmeihseihta ta, ei cha chho ei chuh, cha zydua cha a tlô paki hlâ via la, he chhâzy he lei aw veih ei.

³⁵ Alei nata avâ a lei aw, ei biezy deikua cha lei aw vei.

³⁶ “Châhrasala cha noh nata dawh cha, Paw dei leipa ta cha ahyhmah ta, avâ liata vâlyuhchâpa chhaota, Sawchapawpa chhaota pahno veih ei.

³⁷ Naw hro no hawhna hra khata. Chyhsa Sawchapawpa a vy heihna cha a châ aw.

³⁸ Cha nohzy tipa-ua tlô hlâna khata, Naw balyh liata a ngia no taihta, niepa ta doh ei ta, a hneipa ta amâ pakia tyh,

³⁹ tipa-ua vaw tlô ta ama zydua ta a pahlei khai hlâ lei ta cha, khâpa hmahta pahno leipa ei ta, Chyhsa Sawchapawpa a vy heina cha cha hawhna hra chata a châ aw.

⁴⁰ Chatawhcha lyu liata chyhsa pano y aw ei ta; pakha cha lapa ta y aw ta, pakha cha a râsaipa ta a y aw.

⁴¹ Chanô pano sâh daina liata y aw ei ta; pakha cha lapa ta y aw ta, pakha cha a râsaipa ta a y aw.

⁴² Chatanachata a hrohrua teh u, khâpa nota ma nama Abeipa cha a vy aw pahno tlôh chi va.

⁴³ Châhrasala he he pahno teh u, a parupa a vy awpa daihti cha o hneituhpa ta pahno ha sala vaih ha aw ta a o chhao pangiasa aw vei.

⁴⁴ Cha vâna chata nâmo chhao a mâ chiehpa ta y teh u; nama pangiasa leipa daihti liata Chyhsa Sawchapawpa cha a vy tlôh aw ta.

⁴⁵ “Sei ngâchhihpa so ngaitapa, a zibeipa ta a daihti maihta ama niepa pie awpa ta, a sanawhzy chô liata hyutuhpa ta a raopa cha ahyma a châ tly?

⁴⁶ A zibeipa a vy tita, sei cha hawhta a taopa a vaw hmô awpa cha a nohhlao aw.

⁴⁷ Hmeihseihta ta, ei cha chho ei chuh, a hneipa zydua chô liata hyutuhpa ta a tao aw.

⁴⁸ Châhrasala sei moleipa chata anosasyh ta, ‘Ei zibeipa cha charâta a vy aw vei,’ tahpa ta.

⁴⁹ a seiheizy tu sala, chyhsa paripazy hnohta niepa ta doh sala,

⁵⁰ cha sei zibeipa cha a pangiasa leina dawh nata a pahno lei chhôhta a vy aw ta,

⁵¹ thata hrie aw ta, chyhsa haiphiahpazy topa cha a patosa aw; cha liana cha chana nata hâhriena cha a y aw.