Zawsua 21

¹ Chatanachata Livai chi chhôhkha pawhrâhpa zy cha theihthaipa Eliaza lâta nata Nuna sawchapawpa Zawsua lâta nata Izarel pathlazy pho chhôhkha pawhrâhpa zy lâna chata vawh ei ta;

² Kana râh liata Shilôh khih liana chata, “ABEIPA ta Mawsi hmâpa ta eima yna awpa khihpi zy, eima sahroh patosana awpa a chheipâh zy chhaota, maniah pie awpa ta bie a pie haw mâ tâh,” tahpa ta reih ei ta.

³ Chatanachata Izarel pathlazy chata ABEIPA biepiepa hawhta ama tovyuh tawhtapa cha khihpi zy cha a chheipâh zy chhaota Livai chizy pie ei ta.

⁴ Pachaopa cha Kôha mozy pho chô liata tlu ta. Chatanachata theihthaipa Arawna pathla Livai chi liatahpa zy chata Zudah pho tovyuh liatahpa zy, Simeôna mozy pho tovyuh liatahpa zy, Benzami pho tovyuh liatahpa zy, khihpi miahrawhleithôh pachaopa ta ama to hra.

⁵ Kôha pathla hropa zy chata Ephrai pho pathlazy tovyuh liatahpa zy, Dana pho tovyuh liatahpa zy, Manase pho khophie tovyuh liatahpa zy, khihpi miahrawh pachaopa ta to haw hra ei ta.

⁶ Kasao pathlazy chata Iskara pho pathlazy tovyuh liatahpa zy, Asera pho tovyuh liatahpa zy, Nathalai pho tovyuh liatahpa zy, Basana râh liata Manase pho khophie tovyuh liatahpa zy, khihpi miahrawhleithôh pachaopa ta to hra ei ta.

⁷ Merari pathlazy chata ama chhôhkha yzie lymâ hawhta Rubena pho tovyuh liatahpa zy, Kada pho tovyuh liatahpa zy, Zebulawna pho tovyuh liatahpa zy, khihpi miahrawhleino to hra ei ta.

⁸ Izarel pathlazy chata ABEIPA ta Mawsi hmâpa ta bie a piepa hawhna khata Livai mozy cha khihpi zy nata a chheipâh zy cha pachaopa ta pie ei ta.

⁹ Zudah pathlazy pho tovyuh liatahpa zy, Simeôna pathlazy pho tovyuh liatahpa zy cha pie ei ta, he khihpi a moh reipa zy he,

¹⁰ chazy cha Livai pathla Kôha mo pho zy, Arawna pathlazy sahlao châta a châ; pachaopa cha ama chô liata tlu tua chai ta.

¹¹ Zudah râh liata Kiriathaba khih cha a chheipâh zy chhaota pie ei ta, cha Araba cha Anaki paw châ ta, (cha cha Hebraw a châ). Khihpi chheipâh zy nata a khih chheipâh zy deikua cha Zephune sawchapawpa Kaleba tovyuh châta pie ei ta.

¹³ Chatawhcha theihthaipa Arawna pathlazy cha Hebraw (chyhsa a thietuhpa zy a pabohna khihpi a châ) a chheipâh zy chhaota, Libnah khih a chheipâh zy chhaota,

¹⁴ Zati khih a chheipâh zy chhaota, Estemôa khih a chheipâh zy chhaota,

¹⁵ Hôlô khih a chheipâh zy chhaota, Debi khih a chheipâh zy chhaota,

¹⁶ Aina khih a chheipâh zy chhaota, Zutah khih a chheipâh zy chhaota, Beseme khih a chheipâh zy chhaota, cha pho nopa zy tovyuh liatahpa khihpi miachaki cha pie ei ta;"

¹⁷ Benzami pho tovyuh liatahpa cha, Kibia khih a chheipâh zy chhaota, Keba khih a chheipâh zy chhaota,

¹⁸ Anathô khih a chheipâh zy chhaota, Almaw khih a chheipâh zy chhaota, khihpi miapalih pie ei ta.

¹⁹ Arawna pathla theihthaipa sahlao khihpi zydua cha khihpi miahrawhleithôh a châ, a chheipâh zy chhao ta.

²⁰ Kôha pathlazy chhôhkha Livai mo Kôha pathla hropa zy chhao chata ama tovyuh khihpi zy cha Ephrai pho tovyuh liatahpa ama hnei.

²¹ Ephrai tlâh râh liata Sekhe, chyhsa a thietuhpa zy a pabohna khihpi cha a chheipâhzy chhaota, Keza khih a chheipâh zy chhaota,

²² Kibazai khih a chheipâh zy chhaota, Behôrô khih a chheipâh zy chhaota, khihpi miapalih pie ei ta.

²³ Dana pho tovyuh liatahpa zy chhaota,

²⁴ Aizalô khih a chheipâh zy chhaota, Katharimaw khih a chheipâh zy chhaota, khihpi miapalih.

²⁵ Manase pho khophie tovyuh liatahpa Tanaka khih a chheipâh zy chhaota, Katharimaw khih a chheipâh zy chhaota, khihpi miano.

²⁶ Kôha pathla hropa zy pho khihpi zydua cha khih hrawh châ ta, a chheipâh zy chhaota.

²⁷ Kasao pathlazy Livai phozy cha Manase pho khophie tovyuh liatahpa Basana râh liata Kôla, chyhsa a thietuhpa zy a pabohna khihpi cha a chheipâh zy chhaota, Besatera khih a chheipâh zy chhaota, khihpi miano pie ei ta;

²⁸ Iskara pho tovyuh liatahpa Kishiôna khih a chheipâh zy chhaota, Debare khih a chheipâh zy chhaota,

²⁹ Zamu khih a chheipâh zy chhaota, Enakani khih a chheipâh zy chhaota, khihpi miapalih;

³⁰ Asera pho tovyuh liatahpa Mishal khih a chheipâh zy chhaota, Abadaw khih a chheipâh zy chhaota,

³¹ Helaka khih a chheipâh zy chhaota, Rehô khih a chheipâh zy chhaota, khihpi miapalih.

³² Nathalai pho tovyuh liatahpa Kalili râh liata Kedesa, chyhsa a thietuhpa zy a pabohna khihpi cha a chheipâh zy chhaota, Hamôdaw khih a chheipâh zy chhaota, Karata khih a chheipâh zy chhaota, khihpi miathôh.

³³ Kasao mo ama chhôhkha yzie lymâ hawhta, ama tovyuh khihpi zydua cha khihpi miahrawhleithôh a châ, a chheipâh zy chhaota.

³⁴ Merari pathlazy chhôhkha Livai mo hropa zy cha, Zebulawna pho tovyuh liatahpa Zônia khih a chheipâh zy chhaota, Karata khih a chheipâh zy chhaota,

³⁵ Dimnah a chheipâh zy chhaota, Nahala khih a chheipâh zy chhaota, khihpi miapalih.

³⁶ Rubena pho tovyuh liata Beza khih a chheipâh zy chhaota, Zahaza khih a chheipâh zy chhaota,

³⁷ Kedemô khih a chheipâh zy nata Mepha chheipâh zy chhaota, khihpi miapalih;

³⁸ Kada pho tovyuh liatahpa Kilia râh liata Ramô, chyhsa a thietuhpa zy a pabohna khihpi cha a chheipâh zy chhaota, Mahanai khih a chheipâh zy chhaota.

³⁹ Hesbaw khih a chheipâh zy chhaota, Zaza khih a chheipâh zy chhaota, a zydua ta khihpi miapalih.

⁴⁰ Cha zydua cha Livai mo chhôhkha hropa zy, Merari pathlazy ama chhôhkha yzie lymâ hawhta ama khihpi zy cha a châ, ama tovyuh cha khihpi miahrawhleino a châ.

⁴¹ Izarel pathlazy tovyuh liatahpa Livai mo khihpi zydua cha khihpi sypalih nata miacharie a châ, a chheipâh zy chhaota,

⁴² cha khihpi zy cha a chheipâh a hnei chyupa a châ; cha khihpi zydua cha cha haw sai ta a châ.

⁴³ Cha hawhna chata ABEIPA ta ama pathlatupa zy chhiesapa ta pie â taih hawpa râh zydua cha Izarel zy cha pie ta; chatanachata râh cha pahrâ ei ta, yna su tao ei ta.

⁴⁴ Chatawhcha ABEIPA ta ama pathlazy hnohta chhiesapa ta a vaw taih hawpa hawh tlai khata su to liata thlalôhna pie ta; ama khakhaipa zydua cha ahyhmah ama hmiakô liata a duah theipa rai y veih ei, ABEIPA ta ama khakhaipa zydua cha ama ku liata pie khai ta.

⁴⁵ ABEIPA ta Izarel chhôhkha hnohta a phana lâ kyh a rei hawpa zydua kha a patlô leipa rai y leipa ta; a vaw tlô khai haw.