Athaona 1

¹ Athaona liata Khazohpa ta alei nata avā tao ta.

² Alei he yzie hnei leipa ta a ruapa ta y thlāh ha ta, ti a thu ngaitapa chō cha zohkaluh thlāh ha ta; Khazohpa chata ti chōzy liana cha a pasi ngāthlāh ta.

³ Khazohpa ta, “Khaihna vaw y se,” tah ta; khaihna vaw y ta.

⁴ Chatawhcha Khazohpa ta khaihna cha moh ta, a pha kawpa ta pahno ta; Khazohpa ta khaihna nata zohna cha pachhaih ta.

⁵ Khazohpa ta khaihna cha Chhō bi ta, noh khana cha.

⁶ Chatawhcha Khazohpa ta, “Ti nata ti likawh liana chata a ruapa kawh ngaitapa y sala, cha chata ti nata tizy cha pachhaih mawh sy,” tah ta.

⁷ Chatanachata Khazohpa ta a ruapa kawh ngaitapa cha tao ta, a ruapa kawh ngaitapa ry liata ti a ypazy nata a ruapa kawh ngaitapa chōta ti a ypazy cha pachhaih haw ta. Cha hawhna chata vaw chā haw ta.

⁸ Chatawhcha Khazohpa ta a ruapa kawh ngaitapa cha Avā bi ta. Chatanachata zālā y ta, my y hra ta, a noh nona cha.

⁹ Chatawhcha Khazohpa ta, “Avā ry liata tizy cha su kha ta a pahmaoh sala, lyurāhpa cha a lā mawh sy,” tah ta. Cha hawhna chata vaw chā haw ta.

¹⁰ Khazohpa ta lyurāhpa cha Alei bi ta, ti a pahmaohpazy cha Tilaipi bi ta. Chatawhcha Khazohpa ta cha cha moh ta, a pha kawpa ta pahno ta.

¹¹ Khazohpa ta, “Alei ta sipopazy, chicheipa a chi a hneipazy, theilāpa kō alei liata āmo chi yzie awpa hawhta a patheipa, a theilāpa chhōh liata a chi a ypzy cha papua mawh sy,” tah ta. Cha hawhna chata vaw chā haw ta.

¹² Alei chata sipopazy, chicheipa āmo chi yzie awpa hawhta chi a hneipazy, tho āmo chi yzie awpa hawhta a patheipa a theilāpa chhōh liata a chi a ypazy cha papua ta. Chatawhcha Khazohpa ta moh ta, a pha kawpa ta pahno ta.

¹³ Chatanachata zālā y ta, my y hra ta, a noh thōhna cha.

¹⁴ Chatawhcha Khazohpa ta, “Chhō nata zā pachhaihna awpa ta avā a ruapa kawh ngaitapa liata a khaihtuhpa y sala; chazy cha ngiana zy, daihti zy, noh zy, kō zy, pahnona awpa chā mawh sy.

¹⁵ alei chō a khaih awpa ta avā aruapa kawh ngaitapa liana chata a khaihtuhpazy y hra mawh sy,” tah ta.

¹⁶ Chatanachata Khazohpa ta a khaihpa rōhnah ngaitapa mianozy khi tao haw ta, khaihna rōhnah viapa cha chhō ryurei awpa ta, khaihna chyh viapa cha zā ryu a reih awpa ta tao ta; awhsizy chhao tao hra ta.

¹⁷ Chatawhcha Khazohpa ta chazy cha alei chō liata a khaih awpa nata.

¹⁸ chhō chōta nata zā chōta ryu a reih awpa nata, khaihna nata zohna pachhaih awpa ta avā ruapa kawh ngaitapa liana khita paysa ta.

¹⁹ Khazohpa ta cha cha moh ta, a pha kawpa ta pahno ta. Chatanachata zālā y ta, my y hra ta, a noh palihna cha.

²⁰ Chatawhcha Khazohpa ta, “Tizy chata hmo hroh hneipa ā pie theipa hrona a hneipazy a hluhpi papua sala, pavawzy chhao avā a ruapa kawh ngaitapa liata a zawpa ta alei chō liata a zaw mawh sy,” tah ta.

²¹ Chatanachata Khazohpa ta tilaipi hmo rōhnahpa lai ngaitapazy cha tao ta, hmo hroh hneipa ā pie theipa to, ti ta a papuapazy cha āmo chi yzie awpa hawh chyu ta tao hra ta. Pavaw mathlaw a hneipa to chhao, amo chi yzie awpa hawh chyu ta tao hrata. Khazohpa ta cha cha moh ta, a pha kawpa ta pahno ta.

²² Chatawhcha Khazohpa ta, “Chi hluhpi pathlapa ta pōh ula, tilaipi tizy bie teh u, pavawzy chhao alei liata pōh mawh sy,” tahpa ta byhnā aw ta.

²³ Chatanachata zālā y ta, my y hra ta, a noh pangawhna cha.

²⁴ Khazohpa ta, “Alei chata hmo hroh hneipa āmo chi yzie awpa hawh chyu ta, sahrohzy, alyh theipazy, lyurāhpa sazy, āmo chi yzie awpa hawh chyu ta papua mawh sy,” tah ta. Cha hawhna cha vaw chā haw ta.

²⁵ Chatanachata Khazohpa ta lyurāhpa sa āmo chi yzie awpa hawh chyu ta, sahrohzy āmo chi yzie awpa hawh chyu ta alei liata alyhpa maih, āmo chi yzie awpa hawh chyu ta tao ta. Khazohpa ta cha cha moh ta, a pha kawpa ta pahno ta.

²⁶ Chatanachata Khazohpa ta, “Keimo kakuapa ta, keimo hawh tlaita chyhsapa tao ei sihla; āmo cha tilaipi liata nga chō liata zy, a zawpa pavaw chō liata zy, sahroh chō liata zy, alei chō liata zy, alei liata alyh thaipa zydua chō liata zy bie pahneisa ei suh u,” tah ta.

²⁷ Chatanachata Khazohpa ta ano alyupa ta chyhsapa tao ta, Khazohpa kakuapa ta chyhsapa tao ta, Khazohpa kakuapa tlaita taopa a chā; chapaw nata chanō ta a tao.

²⁸ Chatawhcha Khazohpa ta āmo byhnā pie ta, Khazohpa chata ama hnohta, “Chi hluhpi pathlapa ta pōhpa ta, aleilō he bie ula, nama reisai ta paysa teh u; tilaipi liata a pie thaipa zydua chō liata zy biehnei hra teh u,” tah ta.

²⁹ Chatawhcha Khazohpa ta, “Pachā teh u, alei chō zydua liata chicheipa chi a hneipa to nata tho to, tho chi a hneipa theilāpa ynazy cha ei pie ei; nama niepa chāta a chā aw.

³⁰ Chatawhcha alei liata sa to hnohta zy, a zawpa pavaw to hnohta zy, hmo to alei liata alyh thaipa, hrona a hneipa to hnohta zy, ama niepa chāta sipopa hrohpa to ei pie,” tah ta. Cha hawhna chata vaw chā haw ta.

³¹ Chatawhcha Khazohpa ta a hmo taopa to cha moh ta, a pha kawpa ta pahno ta. Chatanachata zālā y ta, my y hra ta, a noh charun cha.